ଧର୍ମଶାଳା,୨୬ା୬(ବଟକୃଷ୍ଣ ପରିଡ଼ା): ପାଣିକୋଇଲି ପୂର୍ତ୍ତ ବିଭାଗ ପକ୍ଷରୁ ଧର୍ମଶାଳା-କବାଟବନ୍ଧ ରାସ୍ତାର ଇମାମନଗର ଗ୍ରାମ ନିକଟରେ ଉଦ୍ଘାଟନ ହୋଇଥିବା ସେତୁର ଆପ୍ରୋଚ ରୋଡ୍ ଧସିପଡ଼ିଥିବା ନେଇ ରବିବାର ଗଣମାଧ୍ୟମରେ ଖବର ପ୍ରକାଶ ପରେ ତରବରିଆ ଭାବେ ଏହାର ମରାମତି କରାଯାଇଛି। ବିଭାଗ ପକ୍ଷରୁ ଠିକାଦାରଙ୍କ ସହାୟତାରେ ବାଲି ଭର୍ତ୍ତି କରାଯାଇ ଫାଟ ବନ୍ଦ କରି ଦିଆଯାଇଥିବା ଦେଖିବାକୁ ମିଳିଛି।
କୁଅଁାରିଆ ନାଳରେ ପୂର୍ତ୍ତ ବିଭାଗ ପକ୍ଷରୁ ୩ କୋଟି ୮୦ ଲକ୍ଷ ଟଙ୍କା ବ୍ୟୟରେ ପୋଲ ସହ ସଂଯୋଗୀକରଣ ରାସ୍ତା ନିର୍ମାଣ କରାଯାଇଥିଲା। ମେ’ ୧୮ରେ ଧର୍ମଶାଳା ବ୍ଲକ ଅଧ୍ୟକ୍ଷ ଏହାକୁ ଉଦ୍ଘାଟନ କରିଥିଲେ। ହେଲେ ଏବେ ମୌସୁମୀ ବର୍ଷା ଆରମ୍ଭ ହେବା ମାତ୍ରେ ସେହି ସଂଯୋଗୀକରଣ ପିଚୁ ରାସ୍ତାଟି ଧସିପଡ଼ି ବିରାଟ ଫାଟ ସୃଷ୍ଟି ହୋଇଥିଲା। ନିମ୍ନମାନର କାମ ଯୋଗୁ ସାମାନ୍ୟ ବର୍ଷାରେ ରାସ୍ତା ଏଭଳି ଧସିପଡ଼ିଥିଲା। ରାସ୍ତାରେ ଦୈନିକ ଆଖପାଖ ୧୫ଟି ପଞ୍ଚାୟତର ଲୋକେ ୪ ଓ ୨ ଚକିଆ ଯାନରେ ଯାତାୟାତ କରିଥାନ୍ତି। ତେବେ ରାସ୍ତା ଧସିପଡ଼ିବାରୁ ଏଥିରେ ଯାତାୟାତ କରିବାକୁ ଲୋକେ ଅସୁରକ୍ଷିତ ମଣୁଛନ୍ତି। ଉଦ୍ଘାଟନର ମାତ୍ର ୧ ମାସ ମଧ୍ୟରେ ରାସ୍ତାର ଅବସ୍ଥା ଏପରି ହୋଇପଡ଼ିଥିବାରୁ ସମ୍ପୃକ୍ତ ଠିକାଦାର ଓ ବିଭାଗୀୟ ଅଧିକାରୀଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସାଧାରଣରେ ଦାବି ହୋଇଛି। ଏ ସମ୍ପର୍କରେ ବିଭାଗୀୟ ଯନ୍ତ୍ରୀ ନରେନ ଜେନାଙ୍କୁ ପଚାରିବାରୁ ସେ କହିଛନ୍ତି, ରାସ୍ତାର ସାଇଡ୍ ଅଂଶ ସାମାନ୍ୟ ଧସିପଡ଼ିଛି। ଧସିପଡ଼ିଥିବା ସ୍ଥାନରୁ ପିଚୁ କଢ଼ାଯାଇ କଂକ୍ରିଟ କରିବାକୁ ଠିକାଦାରଙ୍କୁ ନିର୍ଦ୍ଦେଶ ଦିଆଯାଇଛି।
