କୋଲକାତା,୨୯।୨: ପଶ୍ଚିମବଙ୍ଗ ପୋଲିସର ବଡ଼ କାର୍ଯ୍ୟାନୁଷ୍ଠାନ। ଦୀର୍ଘ ୫୫ ଦିନ ପରେ ଗିରଫ ହୋଇଛନ୍ତି ସନ୍ଦେଶଖାଲି ମାମଲାର ମୁଖ୍ୟ ଅଭିଯୁକ୍ତ ତଥା ଟିଏମ୍ସି ନେତା ଶାହଜାହାନ ଶେଖ। ତାଙ୍କୁ ବୁଧବାର ରାତି ୩ଟାରେ ମୀନାଖାନର ଏକ ଅଜ୍ଞାତ ସ୍ଥାନରୁ ଗିରଫ କରାଯାଇଛି। ତେବେ ସେ ସନ୍ଦେଶଖାଲିରେ ଶତାଧିକ ମହିଳାଙ୍କୁ ଯୌନ ନିର୍ଯାତନା ଦେବା ସହ ସେମାନଙ୍କ ଜମି ହଡ଼ପ କରିଥିବା ଅଭିଯୋଗ ହୋଇଥିଲା।
ଶାହାଜାହାନ ଉତ୍ତର ୨୪ ପରଗାନା ଜିଲା ପରିଷଦର ମତ୍ସ୍ୟ ଓ ପଶୁ ସମ୍ପଦ ଅଧିକାରୀ ତଥା ସନ୍ଦେଶଖାଲିର ବ୍ଲକ ସଭାପତି ଅଟନ୍ତି। ସେ ମମତା ସରକାରରେ ଜଙ୍ଗଲ ମନ୍ତ୍ରୀ ଜ୍ୟୋତିପ୍ରିୟ ମଲ୍ଲିକଙ୍କ ନିକଟତର ବୋଲି କୁହାଯାଏ। ତେବେ ତାଙ୍କ ଗିରଫଦାରୀକୁ ନେଇ ମୀନାଖାନ ଏସ୍ଡିପିଓ ଅମିନୁଲ ଇସଲାମ ଖାଁ କହିଛନ୍ତି ଯେ ଶାହାଜାହାନଙ୍କୁ ପଶ୍ଚିମବଙ୍ଗ ପୋଲିସ ଉତ୍ତର ୨୪ ପରଗାନାର ମିନାଖାନ ଅଞ୍ଚଳରୁ ଗିରଫ କରିଛି । ତାଙ୍କୁ ବସିରହାଟ କୋର୍ଟକୁ ନିଆଯାଇଛି। ପଶ୍ଚିମବଙ୍ଗ ପୋଲିସ ବ୍ୟତୀତ ସିବିଆଇ ଏବଂ ଏନଫୋର୍ସମେଣ୍ଟ ନିର୍ଦ୍ଦେଶାଳୟ (ଇଡି) ମଧ୍ୟ ଶାହାଜାହାନଙ୍କୁ ଗିରଫ କରିପାରିବ ବୋଲି କୋଲକାତା ହାଇକୋର୍ଟ ବୁଧବାର ନିର୍ଦ୍ଦେଶ ଦେଇଛନ୍ତି। ସେ ଦୀର୍ଘଦିନରୁ ଫେରାର ଥିଲେ। ଏହା ପରେ ତାଙ୍କୁ ଗିରଫ କରିବା ପାଇଁ ସିବିଆଇ ଏବଂ ଇଡି ମଧ୍ୟ ମୁକ୍ତ ବୋଲି କୋର୍ଟ ନିର୍ଦ୍ଦେଶ ଦେଇଛନ୍ତି।
ଜାନୁଆରୀ ୫ ରେ, ପଶ୍ଚିମବଙ୍ଗର ଉତ୍ତର ୨୪ ପରଗାନା ଜିଲାର ସନ୍ଦେଶଖାଲିରେ ପ୍ରାୟ ଏକ ହଜାର ଲୋକଙ୍କ ଭିଡ ଇଡି ଅଧିକାରୀଙ୍କ ଉପରେ ଆକ୍ରମଣ କରିଥିଲା। ରାଜ୍ୟରେ ଥିବା ରାସନ ବଣ୍ଟନ ଦୁର୍ନୀତିର ତଦନ୍ତ ସଂପର୍କରେ ଇଡି ଟିମ ଶାହାଜାହାନ ଶେଖଙ୍କ ଘରକୁ ଚଢ଼ାଉ କରିବାକୁ ଯାଇଥିଲେ। ଶାହାଜାହାନଙ୍କ ଘରର ତାଲା ଭଙ୍ଗାଯିବା ସମୟରେ ଲୋକମାନେ ଆକ୍ରମଣ କରିଥିଲେ। ଏହାପୂର୍ବରୁ ଫୋନରେ ଶାହାଜାହାନଙ୍କୁ ଡାକିବାକୁ ଅନେକଥର ଚେଷ୍ଟା କରାଯାଇଥିଲା, କିନ୍ତୁ ସେ ଆସ ନ ଥିଲେ। ଜିଲ୍ଲାର ଏସପିଙ୍କ ସହ କଥାବାର୍ତ୍ତା କରିବାକୁ ଚେଷ୍ଟା କରାଯାଇଥିଲା, କିନ୍ତୁ ସେ ମଧ୍ୟ କଥାବାର୍ତ୍ତା କରି ନ ଥିଲେ। ଏହି ଘଟଣା ପରେ ଶାହାଜାହାନ ଏବଂ ତାଙ୍କ ସମର୍ଥକଙ୍କ ଉପରେ ସ୍ଥାନୀୟଲୋକେ ଜମି ହଡ଼ପ ଏବଂ ମହିଳାଙ୍କୁ ଯୌନ ନିର୍ଯାତନା ଅଭିଯୋଗ ଆଣିଥିଲେ। ଏହାକୁ ନେଇ ସେମାନେ ବିରୋଧ ପ୍ରଦର୍ଶନ କରିଥିଲେ। ସେବେଠାରୁ ସନ୍ଦେଶଖାଲି ଅଞ୍ଚଳରେ ଉତ୍ତେଜନା ଲାଗି ରହିଛି।
