ବରଗଡ଼ ଅଫିସ୍,୨୪।୧: ସଞ୍ଚାର ଏକ ପ୍ରାଚୀନ ଲୋକକଳା। ବୃହତ୍ ମୁକ୍ତାକାଶ ରଙ୍ଗମଞ୍ଚ ବରଗଡ଼ ଧନୁଯାତ୍ରା ମହୋତ୍ସବର ଏହା ମୂଳ ଅଙ୍ଗ। ତଥାପି ଆଜିକାର କମ୍ପ୍ୟୁଟର, ପ୍ରଯୁକ୍ତିବିଦ୍ୟା ଯୁଗରେ ଆଧୁନିକ ପିଢ଼ି ଏଭଳି ଏକ ଲୋକକଳା ଉପରେ ସେତେ ଅବଗତ ନୁହଁନ୍ତି । ଏଥର କରୋନା କଟକଣା ଯୋଗୁ ଧନୁଯାତ୍ରା ହୋଇପାରିନାହିଁ। ଏଭଳି ସମୟରେ ସର୍ବଭାରତୀୟ ସଞ୍ଚାର ସମ୍ମିଳନୀ ଆୟୋଜନ ଧନୁଯାତ୍ରାର ଉପଲବ୍ଧିକୁ ପରିସ୍ଫୁଟ କରି ପାରିଛି । ରବିବାର ବରଗଡ଼ ପୁରୁଣା କଚେରୀ ପରିସରରେ ଆୟୋଜିତ ସର୍ବଭାରତୀୟ ସଞ୍ଚାର ସମ୍ମିଳନୀ ତଥା ଗାହାକ୍ ବାହାକ୍ (ସଞ୍ଚାର ପରମ୍ପରାରେ କୃଷ୍ଣଲୀଳା) କାର୍ଯ୍ୟକ୍ରମର ଉଦଘାଟନୀ ସମାରୋହରେ ବକ୍ତାମାନେ ଏହା ମତ ପ୍ରକାଶ କରିଛନ୍ତି ।
ବରଗଡ଼ ସାମ୍ବାଦିକ ସଂଘ ପକ୍ଷରୁ ଆୟୋଜିତ ଏହି କାର୍ଯ୍ୟକ୍ରମରେ ଗ୍ରାମ୍ୟ ଉନ୍ନୟନ ତଥା ଶ୍ରମମନ୍ତ୍ରୀ ସୁଶାନ୍ତ ସିଂ ମୁଖ୍ୟଅତିଥି ଭାବେ ଯୋଗଦେଇ ଏହାକୁ ଉଦ୍ଘାଟନ କରିଥିଲେ। ବରଗଡ଼ ପଞ୍ଚାୟତ କଲେଜ ଅଧ୍ୟାପକ ଶେଷନ ବିଶି ଅତିଥି ଭାବେ ଯୋଗଦେଇ ଏହି କାର୍ଯ୍ୟକ୍ରମ ଲୁପ୍ତପ୍ରାୟ ସଞ୍ଚାର ଲୋକକଳାକୁ ଉଜ୍ଜୀବିତ କରି ପାରିଛି ବୋଲି ମତପ୍ରକାଶ କରିଥିଲେ। ବରଗଡ଼ ସାମ୍ବାଦିକ ସଂଘର ଉପସଭାପତି ଉମେଶ ବିଶ୍ୱାଳ କାର୍ଯ୍ୟକ୍ରମ ଆୟୋଜନର ଆଭିମୁଖ୍ୟ ଉପରେ ଆଲୋକପାତ କରିଥିବା ବେଳେ ଜିଲା ସୂଚନା ଓ ଲୋକସମ୍ପର୍କ ତଥା ସଂସ୍କୃତି ଅଧିକାରୀ କଲ୍ୟାଣୀ ଦାଶ ସଭା ପରିଚାଳନା କରିଥିଲେ। ୪ଦିନ ଧରି ହେବାକୁ ଥିବା ଏହି କାର୍ଯ୍ୟକ୍ରମର ଉଦ୍ଘାଟନୀ ଦିବସରେ ଜୟନ୍ତୀ ଦୀପ୍, ପିଙ୍କି ଭୋଇ, ଗୋପେଶ ବେହେରା, ଅଲେଖ ସାହୁ, ଅଚ୍ୟୁତ ବେହେରା, ହରିଲାଲ ସାହୁ, ପ୍ରହଲ୍ଲାଦ ଦୀପ ଏବଂ ସାଥୀମାନେ ସଞ୍ଚାର ପରିବେଷଣ କରିଥିଲେ। ଆସନ୍ତା ୨୭ତାରିଖ ପର୍ଯ୍ୟନ୍ତ ଏହି କାର୍ଯ୍ୟକ୍ରମ ଚାଲିବ।
