କଲମ୍ବୋ,୨୨।୭: ଶ୍ରୀଲଙ୍କାରେ ଥିବା ଯୁବ ଭାରତୀୟ ଦଳ ଦିନିକିଆ ସିରିଜ୍କୁ ଆଗୁଆ ଜିତିନେଇଛି। ପ୍ରଥମ ମ୍ୟାଚ୍ରେ ଯୁବ ବ୍ୟାଟ୍ସମ୍ୟାନମାନେ ସେମାନଙ୍କ କ୍ଲାସ ଓ ଟେମ୍ପରାମେଣ୍ଟର ପରିଚୟ ଦେଇଥିଲେ। ଦ୍ୱିତୀୟ ଦିନିକିଆରେ ଅତ୍ୟଧିକ ଚାପରେ ଭାରତକୁ ଜିତାଇଥିଲେ ଦୀପକ ଚହର ଓ ଭୁବନେଶ୍ୱର କୁମାର। ଏକଦା ଅସମ୍ଭବ ମନେ ହେଉଥିବା ବିଜୟଲକ୍ଷ୍ୟକୁ ୫ ବଲ ପୂର୍ବରୁ ହାସଲ କରି ନେଇଥିଲା ଟିମ୍ ଇଣ୍ଡିଆ। ଏହି ଦୁଇ ବିଜୟ ଯୋଗୁ ଆତ୍ମବିଶ୍ୱାସରେ ପରିପୂର୍ଣ୍ଣ ଭାରତୀୟ ଦଳ ଶୁକ୍ରବାର ଶ୍ରୀଲଙ୍କା ବିପକ୍ଷରେ ୩ୟ ତଥା ଅନ୍ତିମ ଦିନିକିଆ ଖେଳିବ। ଏହାକୁ ମିଶାଇ ଟି୨୦ ବିଶ୍ୱକପ୍ ପୂର୍ବରୁ ଭାରତୀୟ ଦଳ ପାଖରେ ମାତ୍ର ୪ଟି ସୀମିତ ଓଭର ମ୍ୟାଚ୍ ରହିଛି। ଏଣୁ କୋଚ୍ ରାହୁଲ ଡ୍ରାଭିଡ୍ ଦୁଇ ନୂଆ ଯୁବ ପ୍ରତିଭାଙ୍କୁ ଅନ୍ତିମ ଦିନିକିଆରେ ସୁଯୋଗ ଦେଇପାରନ୍ତି।
ପ୍ରଥମ ମ୍ୟାଚ୍ରେ ଆଟାକିଂ ବ୍ୟାଟିଂର ଦର୍ଶନ କରାଇଥିବା ପୃଥ୍ବୀ ଶ’ ଦ୍ୱିତୀୟ ମ୍ୟାଚ୍ରେ ସ୍ପିନରଙ୍କ ବଲରେ ଫସୁଥିବା ଦେଖିବାକୁ ମିଳିଥିଲା। ଏଣୁ ତାଙ୍କ ଯାଗରେ ଦେବଦତ୍ତ ପାଡିକଲ ଓ ରୁତୁରାଜ ଗାଏକ୍ୱାଡଙ୍କ ମଧ୍ୟରୁ ଜଣଙ୍କୁ ସୁଯୋଗ ମିଳିପାରେ। ଏହାବାଦ୍ ଆହତ ଜନିତ ସମସ୍ୟା କାରଣରୁ ପ୍ରଥମ ଦିନିକିଆ ଲାଗି ଉପଲବ୍ଧ ନ ଥିବା ସଞ୍ଜୁ ସାମସନ ଏବେ ପୂରା ଫିଟ୍। ପଦାର୍ପଣ ଅପେକ୍ଷାରେ ଥିବା ସଞ୍ଜୁ ସମ୍ଭବତଃ ମନୀଷ ପାଣ୍ଡେଙ୍କ ସ୍ଥାନ ନେଇପାରନ୍ତି। କିନ୍ତୁ ମନୀଷ ଗତ ଦୁଇଟି ଦିନିକିଆରେ ଭଲ ବ୍ୟାଟିଂ କରିଥିଲେ।
