ରାଞ୍ଚି, ୧୪।୯: ନିଶାରେ ଥିବା ଜଣେ ବ୍ୟକ୍ତି ହିତାହିତ ଜ୍ଞାନ ଭୁଲି ଗୋଟିଏ ବଣୁଆ ହାତୀକୁ ନମସ୍କାର କରିବା ମହଙ୍ଗା ପଡ଼ିଛି। ହାତୀଟି ଏଥିରେ ଉତ୍ୟକ୍ତ ହୋଇ ସାମ୍ନାରେ ଠିଆ ହୋଇଥିବା ସେହି ବ୍ୟକ୍ତିଙ୍କୁ କଚାଡ଼ି ମାରି ଦେଇଛି। ଏଭଳି ଏକ ଚକିତ କଲାଭଳି ଘଟଣା ଝାଡ଼ଖଣ୍ଡ ଗୁମଲା ଜିଲାର ଉପରଦାରି ଗ୍ରାମରେ ଘଟିଯାଇଛି। ମୃତ୍ୟୁବରଣ କରିଥିବା ବ୍ୟକ୍ତି ଜଣଙ୍କ ହେଉଛନ୍ତି, ଲୋହଦଗା ଜିଲାର ବିଫଇ ମୁଣ୍ଡା। ୫୩ ବର୍ଷୀୟ ବିଫଇ କରମା ପର୍ବ ପାଳିବା ଲାଗି ଉପରଦାରିରେ ରହୁଥିବା ନିଜର ଜଣେ ସମ୍ପର୍କୀୟଙ୍କ ଘରକୁ ଯାଇଥିଲେ। ପର୍ବ ପାଳନ ଅବସରରେ ବିଫଇ ପ୍ରଚୁର ମଦ ପିଇଦେଇ ନିଶାରେ ଗ୍ରାମ ନିକଟରେ ଥିବା ଫୁଟ୍ବଲ ପଡ଼ିଆ ନିକଟକୁ ଚାଲି ଯାଇଥିଲେ। ଅଚାନକ ଏହି ସମୟରେ ସ୍ଥାନୀୟ ଜଙ୍ଗଲରୁ ୨ଟି ବଣୁଆ ହାତୀ ପଡ଼ିଆ ମଧ୍ୟକୁ ଚାଲି ଆସିଥିଲେ। ହାତୀ ୨ଟିକୁ ଦେଖି ଉପସ୍ଥିତ ଲୋକ ଯିଏ ଯୁଆଡ଼େ ଦୌଡ଼ି ପଳାଇଥିଲେ। ତେବେ ଏହି ନିଶାରେ ଚୁର୍ ଥିବା ବିଫଇ ହାତୀ ନିକଟକୁ ଚାଲିଯାଇଥିଲେ। ସେଠାରେ ନିଶାରେ ସେ ଗୋଟିଏ ହାତୀକୁ ନମସ୍କାର କରିଥିଲେ। କିନ୍ତୁ ଏହି ସମୟରେ ଗୋଟିଏ ହାତୀ ବିଫଇକୁ କଚାଡ଼ି ତଳେ ପକାଇ ଗୋଡ଼ରେ ଦଳି ମାରି ଦେଇଥିଲା। ସରକାରୀ ବ୍ୟବସ୍ଥା ଅନୁଯାୟୀ ମୃତକଙ୍କ ପରିବାରକୁ କ୍ଷତିପୂରଣ ଦିଆଯିବ ବୋଲି ଡିଏଫ୍ଓ ସୂଚନା ଦେଇଛନ୍ତି।
