ଭୋଗରାଇ, ୨।୬(ଡ଼ି. ଏନ. ଏ.): ରାଜ୍ୟ ସରକାର ଚଳିତ ଖରିଫଋତୁରେ ଧାନ ବିହନର କୁଇଣ୍ଟାଲ ପିଛା ୧ଶହ ଟଙ୍କା ମୂଲ୍ୟ ବୃଦ୍ଧି କରିଥିବା ବେଳେ କୃଷିନୀତିରେ ବ୍ୟାପକ ପରିବର୍ତ୍ତନ କରିଥିବାରୁ ଚାଷୀକୁଳ ମୁଣ୍ଡରେ ହାତ ଦେଇ ବସିଛନ୍ତି। କୃଷିବିଭାଗ ଚାଷୀଙ୍କୁ ପୁରା ଦାମରେ ବିହନ ନିଗମରୁ ଡିଲରଙ୍କ ମାଧ୍ୟମରେ ବିହନ କିଣିବାକୁ ନିର୍ଦ୍ଦେଶ ଦେଇଥିବା ବେଳେ ଚାଷୀଙ୍କ ବ୍ୟାଙ୍କ ଖାତାକୁ ସବ୍ସିଡି ଅର୍ଥ ଦିଆଯିବାର ସୂଚନା ଦେଇଛନ୍ତି। ଯେଉଁ କୃଷକମାନେ ପଞ୍ଜୀକୃତ ହୋଇଥିବେ ସେମାନଙ୍କୁ ଧାନ ଓ ଅଣଧାନ ବିହନ ମୋବାଇଲର ଓଟିପି ନମ୍ବର ମାଧ୍ୟମରେ ବିହନ କ୍ରୟ କରିବା ପାଇଁ କୁହାଯାଇଛି। ବହୁ ଗରିବ ଓ ଭାଗଚାଷୀଙ୍କ ମୋବାଇଲ ନ ଥିବା କିମ୍ବା ଓଟିପି ସମ୍ବନ୍ଧୀୟ ଜ୍ଞାନ ନ ଥିବାରୁ ଚାଷୀମାନେ ହଇରାଣ ହରକତ ହେଉଥିବା ଖବର ମିଳୁଛି। ଏଭଳି ସ୍ଥିତିରେ କୃଷିବିଭାଗ ଚାଷୀଙ୍କୁ ଧାନ କ୍ରୟର ସବ୍ସିଡି ଅର୍ଥ କେବେ ବ୍ୟାଙ୍କ ଖାତାକୁ ଯିବ ତାହା ସ୍ପଷ୍ଟ ନୀତି ଘୋଷଣା କରି ନ ଥିବାରୁ ବିହନ କିଣିବାକୁ ଚାଷୀ ଆଗ୍ରହ ପ୍ରକାଶ କରୁନାହାନ୍ତି।
ଅପରପକ୍ଷରେ ବାଲେଶ୍ୱର ଜିଲାରେ ୧ଲକ୍ଷ ୯୮ହଜାର ହେକ୍ଟର ଜମିରେ ଖରିଫ ଧାନଚାଷ ନିମନ୍ତେ ଲକ୍ଷ୍ୟ ଧାର୍ଯ୍ୟ କୃଷିବିଭାଗ ଆକଳନ କରିଥିଲା। ଅଦ୍ୟାବଧି ଭୋଗରାଇ ବ୍ଲକକୁ ୩୫, ବାଲିଆପାଳ ବ୍ଲକକୁ ୨୮, ଜଳେଶ୍ୱର ବ୍ଲକକୁ ୧ଶହ, ବସ୍ତା ବ୍ଲକକୁ ୧ଶହ ୨୦ ସମଗ୍ର ଜିଲାରେ ମୋଟ ୧୧ ଶହ ୭o କୁଇଣ୍ଟାଲ ମାତ୍ର ଧାନବିହନ ବିହନ ନିଗମ ଡିଲରମାନଙ୍କୁ ବିକ୍ରି ହୋଇଥିବା ବେଳେ ଚାଷୀମାନେ ଡିଲରଙ୍କଠାରୁ ବୁଧବାର ସୁଦ୍ଧା ୧୬୨.୮ କୁଇଣ୍ଟାଲ ବିହନ କିଣିଥିବା ନିଗମର ଜୋନାଲ ମ୍ୟାନେଜର ସୁଦାମ ଚନ୍ଦ୍ର ନାୟକ ପ୍ରକାଶ କରିଛନ୍ତି। ଜିଲାର ଗଭୀର ଓ ଲୁଣି ମିଶ୍ରିତ ଜମି ପାଇଁ ବର୍ଷା, ସରଳା ଓ ଲୁଣିଶ୍ରୀ କିସମର ଧାନ ବିହନ ମିଳୁ ନ ଥିବାରୁ ଅଧିକାଂଶ ଜମି ପଡିଆ ପଡିବା ଆଶଙ୍କା ଦେଖାଦେଇଛି ବୋଲି ଚାଷୀମାନେ କ୍ଷୋଭର ସହିତ କହିଛନ୍ତି। ବିହନ ନିଗମ ଯୋଗାଇ ଦେଇଥିବା ୧୦୦୯ ସାଗୁଆନ, କଳାଚମ୍ପା, ପୂଜା ଆଦି କିସମର ଧାନ ବିହନ ନିମ୍ନମାନର ଓ ଗଜା ହେଉ ନ ଥିବା ଚାଷୀମାନେ ଅଭିଯୋଗ କରିଛନ୍ତି। କୃଷି ବିଭାଗର ଜଟିଳ ନୀତି ଯୋଗୁ ବିହନ ନିଗମରେ ଆଶାତୀତ ଭାବେ ବିହନ ବିକ୍ରି ହେଉ ନ ଥିବାରୁ ଗୋଦାମ ଘରେ ଗଚ୍ଛିତ ଥିବା ହଜାର ହଜାର କୁଇଣ୍ଟାଲ ଧାନ ବିକ୍ରି ନ ହୋଇ କ୍ଷତି ହେବାର ଆଶଙ୍କା ଦେଖାଦେଇଛି। ଅବିଳମ୍ବେ ଓଡିଶା ସରକାର କୃଷିବିଭାଗ ନୂତନ କୃଷିନୀତି ପ୍ରତ୍ୟାହାର କରିବା ସହିତ ଚାଷୀଙ୍କୁ ପ୍ରତ୍ୟକ୍ଷ ଭାବେ ସବସିଡି ମାଧ୍ୟମରେ ବିହନ, ସାର, କୀଟନାଶକ ଔଷଧ, କୃଷି ଯନ୍ତ୍ରପାତି ଯୋଗାଇ ଦେବାକୁ ବିଭିନ୍ନ କୃଷକ ସଙ୍ଗଠନ ଦାବି ରଖିଛି।
