ନୂଆଦିଲ୍ଲୀ, ୧୬ା୯ (ପି.ଟି.): ଜାତୀୟ କ୍ୟାମ୍ପଗୁଡ଼ିକ ଆରମ୍ଭ ହେବାପୂର୍ବରୁ କୋଭିଡ୍-୧୯କୁ ହାତେଇବା ଲାଗି ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ (ସାଇ) ଏହାର ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜିଓର (ଏସ୍ଓପି)କୁ ଅପ୍ଗ୍ରେଡ୍ କରିଛନ୍ତି। ତଦନୁସାରେ କ୍ୟାମ୍ପରେ ଯୋଗଦାନ ପୂର୍ବରୁ ଆଥଲେଟ୍ମାନଙ୍କୁ ୧୫ ଦିନ ସେଲ୍ଫ ଆଇସୋଲେଶନରେ ରହିବାକୁ ହେବ। ସମଗ୍ର ଦେଶରେ କ୍ରୀଡ଼ା କାର୍ଯ୍ୟକଳାପ ପୁନଃ ଆରମ୍ଭ ପାଇଁ ଗତ ମେ ମାସରେ ସାଇ ସେକ୍ରେଟାରୀ ରୋହିତ ଭରଦ୍ୱାଜଙ୍କ ଅଧ୍ୟକ୍ଷତାରେ ଗଠିତ ୬ ଜଣିଆ କମିଟି ମୂଳ ଏସଓପି ପ୍ରସ୍ତୁତ କରିଥିଲେ। ୫ ମାସ ଶଟ୍ ଡାଉନ୍ ପରେ ବକ୍ସିଂ, ଆଥଲେଟିକ୍ସ ଏବଂ ବ୍ୟାଡମିଣ୍ଟନ ସମେତ ଅନ୍ୟ କେତେକ ଖେଳର ଜାତୀୟ କ୍ୟାମ୍ପ ଇତିମଧ୍ୟରେ ଆରମ୍ଭ ହୋଇଛି। ଟ୍ରେନିଂ କ୍ୟାମ୍ପରେ ଯୋଗଦାନ କରିବାକୁ ଥିବା ନୂଆ ଟ୍ରେନିଙ୍କ ଲାଗି ଅପ୍ଗ୍ରେଡ୍ ଏସଓପି ପ୍ରସ୍ତୁତ କରାଯାଇଛି। ଯେଉଁମାନେ ବର୍ତ୍ତମାନ କିମ୍ବା ପରେ କ୍ୟାମ୍ପରେ ଯୋଗ ଦେବେ ସେମାନଙ୍କ ଲାଗି ଏହା ଉଦ୍ଦିଷ୍ଟ। ଲୋ-ଭେଣ୍ଟିଲେଶନ ଚେଞ୍ଜ୍ରୁମ୍ର ଉଚ୍ଛେଦ, ପ୍ରତିଟି ଥର ବ୍ୟବହାର ପରେ ଟ୍ରେନିଂ ସରଞ୍ଜାମଗୁଡ଼ିକୁ ସଂକ୍ରମଣ ମୁକ୍ତ କରାଯିବା, ଜିମ୍ଗୁଡ଼ିକୁ ସିଫ୍ଟ ଭିତ୍ତିରେ ବ୍ୟବହାର ଆଦି ନିୟମ ସାଇ ତରଫରୁ ପୂର୍ବରୁ କାର୍ଯ୍ୟକାରୀ ହେଉଛି। ଟେଷ୍ଟିଂ ଓ ସେଲ୍ଫ ଆଇସୋଲେଶନ ଅପ୍ଗ୍ରେଡ୍ ଏସଓପିର ମୁଖ୍ୟାଂଶ। ଟ୍ରେନିଂ କ୍ୟାମ୍ପରେ ଯୋଗଦାନ ପୂର୍ବରୁ ଆଥଲେଟ୍ସ, କୋଚ୍ ଏବଂ ସପୋର୍ଟ ଷ୍ଟାଫ୍ଙ୍କର ସମସ୍ତ କୋଭିଡ୍-୧୯ ଟେଷ୍ଟ ଖର୍ଚ୍ଚ ସାଇ ବହନ କରିବ। କ୍ୟାମ୍ପକୁ ଆସିବା ପୂର୍ବରୁ ଆଥଲେଟମାନଙ୍କୁ ୧୫ ଦିନ ସେଲ୍ଫ ଆଇସୋଲେଶନରେ ରହିବାକୁ ହେବ। ଏନେଇ ସେଲ୍ଫ ଡିକ୍ଲାରେଶନ ଉପସ୍ଥାପନ କରିବାକୁ ହେବ। ସେଣ୍ଟର ଅଭିମୁଖେ ଯାତ୍ରା କରିବା ପୂର୍ବରୁ ସମସ୍ତ ଆଥଲେଟ୍, କୋଚ୍ ଏବଂ ସପୋର୍ଟ ଷ୍ଟାଫ୍ଙ୍କୁ କୋଭିଡ୍-୧୯ ପାଇଁ ଆରଟି-ପିସିଆର୍ ଟେଷ୍ଟ ବାଧ୍ୟତାମୂଳକ। ସେଣ୍ଟରରେ ପ୍ରବେଶ ପୂର୍ବରୁ ସେମାନଙ୍କୁ କୋଭିଡ୍-୧୯ ନେଗେଟିଭ୍ ସାର୍ଟିଫିକେଟ ଦାଖଲ କରିବାକୁ ପଡ଼ିବ ବୋଲି ସାଇ କହିଛିି।
