ନୂଆଦିଲ୍ଲୀ,୨୫।୯: ଭାରତର ପର୍ବତନ କ୍ରିକେଟର ସବା କରିମ ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟାଙ୍କ ଫିଟ୍ନେସ୍କୁ ନେଇ ପ୍ରଶ୍ନ ଉଠାଇଛନ୍ତି। ଆସନ୍ତା ମାସରେ ୟୁଏଇ ଏବଂ ଓମାନରେ ଆରମ୍ଭ ହେବାକୁ ଥିବା ଟି-୨୦ ବିଶ୍ୱକପ୍ ପାଇଁ ଭାରତୀୟ କ୍ରିକେଟ ଟିମ୍ରେ କାହିଁକି ତାଙ୍କୁ ସାମିଲ କରାଯାଇଛି ସେ ବିଷୟରେ ସବା ମନ୍ତବ୍ୟ ଦେଇଛନ୍ତି।
ଆଇପିଏଲ୍ ୨୦୨୧ର ଦ୍ୱିତୀୟ ପର୍ଯ୍ୟାୟରେ ମୁମ୍ବାଇ ଇଣ୍ଡିଆନ୍ସ ପାଇଁ ପ୍ରଥମ ଦୁଇଟି ମ୍ୟାଚ୍ରୁ ହାର୍ଦ୍ଦିକଙ୍କୁ ବାଦ୍ ଦିଆଯାଇଥିଲା। ସେ କେବେ ଦଳ ପାଇଁ ଖେଳିବେ ତାହା ସ୍ପଷ୍ଟ ହୋଇନାହିଁ। ଏହାକୁ ନେଇ ସବା କହିଛନ୍ତି, ହାର୍ଦ୍ଦିକ ଭାରତୀୟ ଦଳ ପାଇଁ ଜଣେ ବଡ଼ ଖେଳାଳି। ଯେତେବେଳେ ଭାରତୀୟ ଦଳରେ ତାଙ୍କର ଚୟନ ହୋଇଥିଲା ସେ ଫିଟ୍ ଥିଲେ କି? ଯଦି ସେ ଫିଟ୍ ଥିଲେ ତେବେ ତାଙ୍କର ଚୟନ ଯଥାର୍ଥ ଅଟେ। ଏଯାବତ ସେ ମୁମ୍ବାଇ ଇଣ୍ଡିଆନ୍ସ ପାଇଁ ଦୁଇଟି ମ୍ୟାଚ୍ ଖେଳିନାହାନ୍ତି, ସେ କେବେ ଆହତ ହୋଇଥିଲେ। ଭାରତୀୟ ଦଳ ଚୟନ ସମୟରେ କିମ୍ବା ଆଇପିଏଲ୍ ପାଇଁ ପ୍ରସ୍ତୁତି ସମୟରେ ଏହା ଘଟିଥିଲା କି? ଏସବୁ ଜିନିଷକୁ ବ୍ୟାଖ୍ୟା କରିବା ଆବଶ୍ୟକ ବୋଲି ସେ କହିଛନ୍ତି।
ଏହାଛଡ଼ା ଯଦି ହାର୍ଦ୍ଦିକ ଆହତ ହୋଇଥିଲେ, ତାଙ୍କୁ ଜାତୀୟ ଦଳରେ କାହିଁକି ସାମିଲ କରାଗଲା? ନିୟମ ଅନୁଯାୟୀ ଫିଟ୍ ନ ଥିଲେ ଏନ୍ସିଏ ଯିବାକୁ ହୋଇଥାଏ। ଏହାପରେ ଚୟନ ପାଇଁ କେହି ଖେଳାଳି ଉପଲବ୍ଧ ହୋଇଥାନ୍ତି। ହେଲେ ହାର୍ଦ୍ଦିକଙ୍କ କ୍ଷେତ୍ରରେ ତାହା ହୋଇ ନ ଥିବା ଅନେକ ପ୍ରଶ୍ନ ଉଠାଉଛି ବୋଲି ସବା କହିଛନ୍ତି।
