ମୁମ୍ବାଇ: କରୋନା ମହାମାରୀ ଯୋଗୁ ସାରା ଦେଶରେ ଲକ୍ଡାଉନ ଲାଗୁ ହୋଇଥିବାରୁ ଲକ୍ଷ ଲକ୍ଷ ଲୋକଙ୍କ ଆୟ ପ୍ରଭାବିତ ହୋଇଛି। ଏଥିରୁ ଫିଲ୍ମ ଇଣ୍ଡଷ୍ଟ୍ରି କି ଟିଭି ସିରିୟଲ୍ ଜଗତ ମଧ୍ୟ ବାଦ୍ ପଡ଼ିନାହିଁ। ଯେଉଁଥିରେ କଳାକାରମାନଙ୍କୁ ବହୁ ସମସ୍ୟା ଦେଇ ଗତି କରିବାକୁ ପଡ଼ିଛି। ପ୍ରତିଦିନ କୌଣସି ନା କୌଣସି କଳାକାରଙ୍କ ଦୁଃଖ କାହାଣୀ ଶୁଣିବାକୁ ମିଳୁଛି। ଇତିମଧ୍ୟରେ ଲୋକପ୍ରିୟ ଟିଭି ସିରିୟଲ୍ ‘ସାଥ ନିଭାନା ସାଥିଆ’ରେ ଗୋପୀ ବୋହୁଙ୍କ ‘ଉର୍ମିଲା ମାମି’ ଚରିତ୍ରରେ ଅଭିନୟ କରୁଥିବା ଅଭିନେତ୍ରୀ ବନ୍ଦନା ବିଠ୍ଲାନିଙ୍କୁ ନେଇ ଏକ ବଡ ଖବର ସାମ୍ନାକୁ ଆସିଛି। ନିକଟରେ ବନ୍ଦନା ୱେବ ପୋର୍ଟାଲ ସ୍ପଟ ବଏ ସହ ଆଲୋଚନା କରୁଥିବା ବେଳେ ପ୍ରକାଶ କରିଛନ୍ତି ଯେ, ଲକ୍ଡାଉନ ସମୟରେ ତାଙ୍କୁ ଅନେକ ଅସୁବିଧା ସହ ଆର୍ଥିକ ସମସ୍ୟା ମଧ୍ୟ ଦେଖାଦେଇଥିଲା। ଲକ୍ଡାଉନ ଯୋଗୁ ସମସ୍ତଙ୍କ କାମ ବନ୍ଦ ହୋଇଯାଇଥିଲା। ଫଳରେ ଆୟ ବନ୍ଦ ହୋଇଯାଇଥିଲା କିନ୍ତୁ ଖର୍ଚ୍ଚ କମି ନ ଥିଲା। ତେଣୁ ଘର ଚଳାଇବା ପାଇଁ ବନ୍ଦନା ଅନ୍ୟ କାମ ଖୋଜିବାକୁ ଆରମ୍ଭ କରିଥିଲେ। ଶେଷରେ ସେ ନିଜେ ହାତରେ ରାଖୀ ତିଆରି କରି ଅନ୍ଲାଇନ୍ରେ ବିକ୍ରି କରିଥିଲେ। ଏହାପରେ ବନ୍ଦନାଙ୍କ ନିକଟକୁ ରାଖୀ ଅର୍ଡର ଆସିବା ଆରମ୍ଭ ହୋଇଯାଇଛି। ଏତଦ୍ ବ୍ୟତୀତ ଜୁଏଲାରୀ ଡିଜାଇନ ମଧ୍ୟ ଶିଖିଛନ୍ତି ବୋଲି ବନ୍ଦନା କହିଛନ୍ତି। ଯଦିଓ ତାଙ୍କୁ ଏବେ ଅଭିନୟରେ କାମ ମିଳିଯାଇଛି, କିନ୍ତୁ ବର୍ତ୍ତମାନ ବି ବନ୍ଦନା ରାଖୀ କାମ ଜାରି ରଖିଛନ୍ତି। ଶୁଟିଂ ସେଟରେ ଟିକେ ସମୟ ମିଳିଲେ ସେ ରାଖୀ ତିଆରି କରନ୍ତି। ବର୍ତ୍ତମାନ ତାଙ୍କ ପାଖରେ ୨୦ଟି ରାଖୀର ଅର୍ଡର ରହିଛି ବୋଲି ବନ୍ଦନା କହିଛନ୍ତି। ସୂଚନା ମୁତାବକ ଷ୍ଟାରପ୍ଲସର ଲୋକପ୍ରିୟ ଶୋ’ ‘ସାଥ ନିଭାନା ସାଥିଆ’ ପୁଣି ଥରେ ‘ତେରା ମେରା ସାଥ ରହେ’ ନାମରେ ଲୋକଙ୍କ ସାମ୍ନାକୁ ଆସିବାକୁ ଯାଉଛି। ଏଥିରେ ପୁଣି ଥରେ ବନ୍ଦନାଙ୍କ ଅଭିନୟ ଦେଖିବାକୁ ମିଳିବ। ତେବେ ଖୁବ୍ଶୀଘ୍ର ଏହି ସିରିୟଲ୍ ଅଗଷ୍ଟ ୧୬ରୁ ଷ୍ଟାରପ୍ଲସ୍ରେ ଆରମ୍ଭ ହେବା ବୋଲି ଜଣାପଡ଼ିଛି।
