ମସ୍କୋ,୬।୧: ରୁଷିଆ ଓ ୟୁକ୍ରେନ୍ ଯୁଦ୍ଧ ମଧ୍ୟରେ ଭାରତ ସହିତ ରୁଷିଆ ତୈଳ ବ୍ୟବସାୟ କ୍ରମାଗତ ଭାବେ ଶୀର୍ଷରେ ପହଞ୍ଚିଛି। ଇତିମଧ୍ୟରେ ଏକ ଖବର ସାମ୍ନାକୁ ଆସିଛି, ଆର୍କଟିକ ଅଞ୍ଚଳରୁ ବାହାରୁଥିବା ଅଶୋଧିତ ତୈଳ ଯୋଗାଣକୁ ଭାରତ ଏବଂ ଚାଇନାକୁ ରିହାତିରେ ରୁଷିଆ ବିକ୍ରି କରୁଛି। ଏହାପୂର୍ବରୁ ଏହି ତେଲ ୟୁରୋପୀୟ ଦେଶକୁ ବିକ୍ରି କରାଯାଇଥିଲା। କିନ୍ତୁ ଗତ ମାସରୁ ୟୁରୋପୀୟ ଦେଶମାନେ ତେଲ କିଣିବା ବନ୍ଦ କରିଦେଇଥିଲେ ଯେଉଁଥିପାଇଁ ଏହାର ଯୋଗାଣ ଚେନ୍ ଅନ୍ୟ ଗ୍ରାହକମାନଙ୍କୁ ଦିଆଯାଇଥିଲା। ସୂଚନାଯୋଗ୍ୟ, ଡିସେମ୍ବରରେ ୟୁରୋପୀୟ ୟୁନିଅନ ଜି-୭ ଗୋଷ୍ଠୀ ଦେଶ ଏବଂ ଅଷ୍ଟ୍ରେଲିଆ ରୁଷିଆ ତେଲ ଉପରେ ପ୍ରାଇସ୍ କ୍ୟାପ୍ ଲଗାଇଥିଲେ। ପ୍ରାଇସ୍ କ୍ୟାପ୍ ଲାଗୁ କରିବା ବେଳେ କୁହାଯାଇଥିଲା ଯେ, ଯଦି ରୁଷିଆ ଏହାକୁ ଗ୍ରହଣ ନ କରେ ତେବେ ତା’ଉପରେ ଅନେକ ପ୍ରତିବନ୍ଧକ ଲଗାଯିବ। ଅନ୍ୟପଟେ ରୁଷିଆ ପ୍ରାଇସ୍ କ୍ୟାପକୁ ଗ୍ରହଣ କରିବାକୁ ମନା କରିଦେଇଛି। ଏଥିସହ ଯେଉଁ ଦେଶ ତା’ର ତୈଳ ଉପରେ ପ୍ରାଇସ୍ କ୍ୟାପ୍ ଲଗାଇବ, ତା’କୁ ରୁଷିଆ ତେଲ ବିକ୍ରି ବନ୍ଦ କରିଦେବ ବୋଲି କହିଛି। ଏହାପରେ ୟୁରୋପ ଦେଶକୁ ପଠାଯାଇଥିବା ଆର୍କଟିକ ଅଞ୍ଚଳରୁ ବାହାରୁଥିବା ଅଶୋଧିତ ତୈଳକୁ ବନ୍ଦ କରିଦିଆଗଲା। ଏଭଳି ପରିସ୍ଥିତିରେ ବର୍ତ୍ତମାନ ତୈଳ କମ୍ପାନୀଗୁଡିକ ନୂତନ କ୍ରେତା ଖୋଜିବା ଆରମ୍ଭ କରିଥିଲେ।
