ଲଣ୍ଡନ, ୬ା୭: ଇନ୍ଫୋସିସ୍ ସହପ୍ରତିଷ୍ଠାତା ନାରାୟଣ ମୂର୍ତ୍ତିଙ୍କ ଜ୍ୱାଇଁ ତଥା ବ୍ରିଟେନ ଅର୍ଥମନ୍ତ୍ରୀ ଋଷି ସୁନକ ମଙ୍ଗଳବାର ବୋରିସ୍ ଜନ୍ସନ୍ କ୍ୟାବିନେଟରୁ ଇସ୍ତଫା ଦେଇଛନ୍ତି। ଋଷିଙ୍କ ସହ ସ୍ବାସ୍ଥ୍ୟମନ୍ତ୍ରୀ ସାଜିଦ୍ ଜାଭିଦ୍ ମଧ୍ୟ ପଦ ଛାଡ଼ିଛନ୍ତି। ଫଳରେ ଲକ୍ଡାଉନ ପାର୍ଟି ପାଇଁ ଚାପରେ ଥିବା ପ୍ରଧାନମନ୍ତ୍ରୀ ବୋରିସ୍ଙ୍କ ମୁଣ୍ଡବ୍ୟଥା ବଢ଼ିଛି। ଜନ୍ମିତ କଞ୍ଜରଭେଟିଭ୍ ପାର୍ଟିର ୪୨ ବର୍ଷୀୟ ଏମ୍ପି ଋଷି ସୁନକ ପ୍ରଧାନମନ୍ତ୍ରୀ ବୋରିସ୍ ଜନସନଙ୍କ ନିକଟକୁ ତାଙ୍କ ଇସ୍ତଫା ପତ୍ର ପଠାଇଛନ୍ତି। ଏ ନେଇ ସେ ଟୁଇଟ୍ କରି କହିଛନ୍ତି, ଆମ ଦେଶ ଅନେକ ବଡ଼ ଚ୍ୟାଲେଞ୍ଜକୁ ସାମ୍ନା କରୁଛି। ସରକାର ଠିକ୍ ଭାବେ ନିଜ କ୍ଷମତାକୁ ନେଇ ସମ୍ବେଦନଶୀଳ ହୋଇ ଚାଲୁ ବୋଲି ଲୋକେ ଆଶା କରିବା ଯଥାର୍ଥ। ଲୋକଙ୍କ ଆଶା ପୂରଣ ପାଇଁ ଆମେ ଲଢ଼ିବା ଉଚିତ ବୋଲି ମୁଁ ମନେକରେ। ତେଣୁ ଅର୍ଥମନ୍ତ୍ରୀ ପଦରୁ ଇସ୍ତଫା ଦେଇଛି। ପଦ ଛାଡ଼ି ମୁଁ ଦୁଃଖିତ। କିନ୍ତୁ ଆମେ ଏମିତି ସରକାର ଚଳାଇପାରିବା ନାହିଁ। ସେହିପରି ସ୍ବାସ୍ଥ୍ୟମନ୍ତ୍ରୀ ପାକିସ୍ତାନ ବଂଶୋଦ୍ଭବ ସାଜିଦ ଜାଭେଦ କହିଛନ୍ତି, ବୋରିସ୍ ଜନ୍ସନଙ୍କଠାରେ ଦେଶହିତରେ ସରକାର ଚଳାଇବା କ୍ଷମତା ନାହିଁ। ଏବେ ସେ ସେହି ସରକାରରେ କାମ କରିପାରିବେନି। ଦେଶସ୍ବାର୍ଥରେ ସରକାର ଚଳାଇବା ନେଇ ବୋରିସ୍ ଜନସନ୍ଙ୍କ ଉପରୁ ଅନେକ ଏମ୍ପି ଏବଂ ଜନତାଙ୍କ ଭରସା ତୁଟିଗଲାଣି। ପ୍ରଧାନମନ୍ତ୍ରୀଙ୍କ ନେତୃତ୍ୱରେ ବର୍ତ୍ତମାନର ସ୍ଥିତି ବଦଳିବ ନାହିଁ ବୋଲି ସ୍ପଷ୍ଟ ଜଣାପଡ଼ୁଛି। ତାଙ୍କ ଉପରେ ମୋର ବି ଆଉ ଆସ୍ଥା ନାହିଁ।
ଦୁଇ ବରିଷ୍ଠ ମନ୍ତ୍ରୀଙ୍କ ଇସ୍ତଫା ଫଳରେ ବୋରିସ୍ଙ୍କ ନେତୃତ୍ୱକୁ ବଡ଼ ଝଟକା ଲାଗିଛି। ପ୍ରକାଶ ଯେ, ନିକଟରେ ନିଲମ୍ବିତ ଏମ୍ପି କ୍ରିଶ୍ ପିଞ୍ଚର ଆଣିଥିବା ଅଭିଯୋଗଗୁଡ଼ିକୁ ନେଇ ଡାଉନିଂ ଷ୍ଟ୍ରିଟ୍ର ଆଭିମୁଖ୍ୟ ସମ୍ପର୍କରେ ଜଣେ ପୂର୍ବତନ ଅମଲାତନ୍ତ୍ରୀ ମନ୍ତବ୍ୟ ଦେବାର ଦିନକ ପରେ ଏହି ଘଟଣାକ୍ରମ ଦେଖିବାକୁ ମିଳିଛି। ଆଇନ ପ୍ରଣେତା କ୍ରିସ୍ ପିଞ୍ଚରଙ୍କ ବିରୋଧରେ ପୂର୍ବରୁ କେତେକ ଅଭିଯୋଗ ଆସିଥିଲା। ଏହା ପରେ ସେ ଡେପୁଟି ଚିଫ୍ ହୁଇପ୍ ପଦରୁ ଇସ୍ତଫା ଦେଇଥିଲେ। ପିଞ୍ଚରଙ୍କ ବିରୋଧରେ ଆସିଥିବା ଅଭିଯୋଗ ସମ୍ପର୍କରେ ପ୍ରଧାନମନ୍ତ୍ରୀ କ’ଣ ଜାଣିଛନ୍ତି ସେନେଇ ସ୍ପଷ୍ଟୀକରଣ ଦେବା ଲାଗି ବୋରିସ୍ଙ୍କ ଉପରେ ଚାପ ରହିଥିଲା। ସୋମବାର ହାଇପଲିଟିକାଲ ଡ୍ରାମାକୁ ନେଇ ବୋରିସ୍ କହିଥିଲେ ପ୍ରିଞ୍ଚରଙ୍କ ବିରୋଧରେ ଥିବା ଅଭିଯୋଗ ନେଇ ସେ ଅବଗତ ଥାଇ ସୁଦ୍ଧା ତାଙ୍କୁ ଉପମୁଖ୍ୟ ସଚେତକ ପଦ ଦିଆଯାଇଥିବାରୁ ସେ ଦୁଃଖିତ ନୁହନ୍ତି। ପିଞ୍ଚରଙ୍କୁ ୨୦୧୯ ଘଟଣା ପରେ ସରକାରୀ ପଦରୁ ବିଦା କରିବା ଦରକାର ଥିଲା। ତାଙ୍କ ନିଯୁକ୍ତି ପାଇଁ ମୁଁ କ୍ଷମା ମାଗୁଛି।
