ଧରାକୋଟ,୨୯ା୫(ଡି.ଏନ୍.ଏ.): ଗଞ୍ଜାମ ଜିଲାର ଜୀବନ ରେଖା ଋଷିକୁଲ୍ୟା ନଦୀ ଏବେ କାଶତଣ୍ଡୀ ବା ଚଢ଼େୟା ଲତା ପାଇଁ ବିପଦରେ। ଋଷିମାଳ ପର୍ବତରୁ ବାହାରି ସୋରଡ଼ା, ଧରାକୋଟ, ଆସିକା, ପୁରୁଷୋତ୍ତମପୁର, ଛତ୍ରପୁର ଓ ଗଞ୍ଜାମ ବ୍ଲକ ଅଞ୍ଚଳରେ ଋଷିକୁଲ୍ୟା ନଦୀ ପ୍ରବାହିତ ହେଉଛି। ପୁରାଣ ବର୍ଣ୍ଣନା ଅନୁସାରେ ଏହି ନଦୀ ଗଙ୍ଗା ନଦୀଠାରୁ ପୁରାତନ। ଏହାର ଉତ୍ତର ପାର୍ଶ୍ୱରେ ପ୍ରଭୁ ରାମଚନ୍ଦ୍ର ଗମନ କରିଥିବା ବେଳେ ବିଭିନ୍ନ ସ୍ଥାନରେ ଶିବଲିଙ୍ଗ ପ୍ରତିଷ୍ଠା କରି ପୂଜା ଅର୍ଚ୍ଚନା କରିଥିଲେ। ସେଗୁଡିକ ଆଜି ପ୍ରସିଦ୍ଧ ଶିବାଳୟ ଭାବରେ ଖ୍ୟାତି ଲାଭ କରିଛି। ସେଥିମଧ୍ୟରୁ ପଞ୍ଚାନନ, ଧବଳେଶ୍ୱର,ମୁକ୍ତେଶର, ବୈଦ୍ୟେନଥେ ଶ୍ୱର, ଚନ୍ଦ୍ରକଳ୍ପେଶ୍ୱର, ପୁଡୁଗେଶ୍ୱର, ତୁମ୍ବେଶ୍ୱର ପୀଠ ସମେତ ଦକ୍ଷିଣ କାଳୀ ମନ୍ଦିର ସବୁ ପ୍ରସିଦ୍ଧି ଲାଭ କରିଛି। ଧାର୍ମିକ ଭାବନା ପାଇଁ ଏହା ଯେତିକି ପରିଚିତ ଜଳ ସେଚନ ସହ ପିଇବା ପାଣି ପାଇଁ ଏହାର ଗୁରୁତ୍ୱ ସେତିକି ଅଧିକ। ହେଲେ ଏହାର ଗର୍ଭରେ ଚଢ଼େୟା ଲତା ଆଚ୍ଛାଦିତ ହୋଇ ରହିଥିବାରୁ ବନ୍ୟା ସମ୍ଭାବନା ଅଧିକ ରହୁଥିବା ବେଳେ ଧାର୍ମିକ ପରମ୍ପରାର କାର୍ଯ୍ୟ ସମ୍ପନ୍ନରେ ମଧ୍ୟ ବାଧା ପହଞ୍ଚିଛି। ବର୍ଷା ଦିନେ ବନ୍ୟା ଜଳ ନଦୀ ଗର୍ଭରେ ପ୍ରବାହିତ ନ ହୋଇ ଚଢ଼େୟା ଲତା ଭର୍ତ୍ତି ହୋଇଥିବାରୁ ଦୁଇକୁଳରେ କ୍ଷତି ପହଞ୍ଚାଉଛି। ଅନ୍ୟ ପକ୍ଷରେ ଏହି ଲତା ଭିତରେ ବରହା, ବିଲୁଆ, ବିଷଧର ସାପ ବସକରି ରହିଥିବାରୁ ଲୋକେ ସ୍ନାନ, ତର୍ପଣ ଓ ଅସ୍ଥି ସଂସ୍କାର ସହ ସବ ସତ୍କାର ପାଇଁ ଭୟ କରୁଛନ୍ତି। ଏଣୁ ରାଜ୍ୟ ସରକାରଙ୍କ ଜଳ ସେଚନ ବିଭାଗ ତରଫରୁ ନଦୀ ଗର୍ଭରେ ଆଚ୍ଛାଦିତ ଚଢ଼େୟା ଲତା ବାହାର କରିବା ପାଇଁ ଦାବି ହେଉଛି।
