ଯାଜପୁର ଅଫିସ,୧୮ା୭: ରାଜ୍ୟରେ ପାଠାଗାର ନିର୍ଦ୍ଦେଶାଳୟ ନ ଥିବାରୁ ସର୍ବସାଧାରଣ ପାଠାଗାରର ପ୍ରଚାର ପ୍ରସାରରେ ଅନ୍ତରାୟ ହୋଇଛି। ଯାଜପୁର ଜିଲା ବିଞ୍ଝାରପୁରଠାରେ ଏକ ପଠନ କେନ୍ଦ୍ର ଗଠନ ନିମନ୍ତେ ଦାବି ହୋଇଆସୁଥିବା ବେଳେ ସରକାର କିମ୍ବା ପ୍ରଶାସନ ଏଥିପ୍ରତି ଦୃଷ୍ଟି ଦେଉ ନ ଥିବା ଦୁଃଖର ବିଷୟ। ବିଭିନ୍ନ ହାଇସ୍କୁଲରେ ଥିବା ପାଠାଗାରଗୁଡିକ ଅନେକ ହଜାର ପୁସ୍ତକ ତତ୍ତ୍ୱାବଧାନ ଅଭାବରୁ ନଷ୍ଟ ହେବାକୁ ବସିଲାଣି। ପ୍ରତିବର୍ଷ ରାଜା ରାମମୋହନ ରାୟ ଫାଉଣ୍ଡେଶନ ପକ୍ଷରୁ ଦିଆଯାଉଥିବା ପୁସ୍ତକ ହାଇସ୍କୁଲଗୁଡ଼ିକରେ ଅବ୍ୟବସ୍ଥିତ ଅବସ୍ଥାରେ ପଡ଼ିରହୁଛି। ଠିକ୍ ପରିଚାଳନା ଅଭାବରୁ ପାଠାଗାରକୁ ଛାତ୍ରୀଛାତ୍ରମାନେ ଆସୁ ନ ଥିବା ଦେଖାଯାଉଛି। ହାଇସ୍କୁଲ ପାଠାଗାରରେ ପିଲାମାନେ ଜ୍ଞାନଗର୍ଭକ ପୁସ୍ତକ ପାଠ କରି ନିଜର ଦୃଷ୍ଟିଭଙ୍ଗୀକୁ ବଢ଼ାଇ ପାରିବା ନେଇ ଲକ୍ଷ୍ୟ ରହିଛି। କିନ୍ତୁ ସେଥିପ୍ରତି ସରକାରଙ୍କ ସୁଚିନ୍ତିତ ଯୋଜନା ଅଭାବରୁ ତାହା ଫସରଫାଟି ଯାଇଛି। ପୁସ୍ତକ ଚୟନ କ୍ଷେତ୍ରରେ ପ୍ରଶାସନର ପ୍ରିୟାପ୍ରୀତି ମନୋବୃତ୍ତି ଯୋଗୁ ଉପାଦେୟ ପୁସ୍ତକ ବଦଳରେ ଅଦରକାରୀ ପୁସ୍ତକ କିଣାଯାଇ ସ୍କୁଲ ଲାଇବ୍ରେରି ଉପରେ ଲଦି ଦିଆଯାଉଛି। ଏ ସମ୍ପର୍କରେ ୧୦ ବର୍ଷଧରି ହୋଇ ଆସୁଥିବା ଅଭିଯୋଗ ପ୍ରତି ସରକାର ଦୃଷ୍ଟି ଦେଉ ନ ଥିବା ଅଖିଳଚକ୍ରର ସମ୍ପାଦକ ହରେକୃଷ୍ଣ ପଣ୍ଡା ଏବଂ ଶିକ୍ଷାବିତ୍ମାନେ ରାଜ୍ୟ ସଂସ୍କୃତି ବିଭାଗ ସଚିବଙ୍କ ଦୃଷ୍ଟି ଆକର୍ଷଣ କରିଛନ୍ତି। ଅଭିଯୋଗ ଅନୁସାରେ ବିଞ୍ଝାରପୁର ବ୍ଲକ ଅଞ୍ଚଳରେ ୧୨ଟି ସାଧାରଣ ଲାଇବ୍ରେରି ଅତୀତରେ ଥିବାବେଳେ ଏବେ ତାହା ଅବଲୁପ୍ତ ଅବସ୍ଥାରେ। କେତେକ ସ୍ଥାନରେ ଘର ଥିବାବେଳେ ପାଠାଗାର ଆଉ ନାହିଁ। ଜିଲା ସଂସ୍କୃତି ଅଧିକାରୀଙ୍କ ପାଖରେ ଏହାର ତାଲିକା ମଧ୍ୟ ନାହିଁ। ଜିଲାରେ ଏବେ ମାତ୍ର ୫ଟି ସର୍ବସାଧାରଣ ପାଠାଗାର ଦେଖିବାକୁ ମିଳେ। ଶତାଧିକ ପାଠାଗାର ଅବଲୁପ୍ତ ଅବସ୍ଥାରେ। ଅର୍ଦ୍ଧ ଅବଲୁପ୍ତ ପାଠାଗାରଗୁଡିକର ପୁନରୁଦ୍ଧାର ପାଇଁ ସରକାର ଉଦ୍ୟମ କଲେ ତାହା ପୁଣି ଶିକ୍ଷାର ଆଲୋକବର୍ତ୍ତୀ ହୋଇପାରନ୍ତା। ତତ୍ତ୍ୱାବଧାରକ ଅଭାବରୁ ପାଠାଗାରଗୁଡ଼ିକ ନଷ୍ଟ ହୋଇଯାଉଛି। ଗ୍ରାମାଞ୍ଚଳରେ ଶିକ୍ଷାର ବୃଦ୍ଧି ନିମନ୍ତେ ପ୍ରଶାସନିକ ଆନ୍ତରିକତା ପ୍ରକାଶ ପାଉ ନ ଥିବା ଦୁଃଖର ବିଷୟ ବୋଲି ପଣ୍ଡା ପ୍ରକାଶ କରିଛନ୍ତି। ସେ ସରକାରଙ୍କ ନିକଟରେ ଦାବି ଉପସ୍ଥାପନ କରି କହିଛନ୍ତି ଯେ ହାଇସ୍କୁଲ ଗୁଡ଼ିକରୁ ଲୋପ ପାଇଯାଉଥିବା ପାଠାଗାରଗୁଡିକୁ ମୋ ସ୍କୁଲ ଅଭିଯାନରେ ସାମିଲ କରି ପୁନରୁଦ୍ଧାର କରାଯାଉ। ପୁରାତନ ଛାତ୍ରମାନଙ୍କୁ ଲାଇବ୍ରେରି ବ୍ୟବହାର କରିବାକୁ ସୁଯୋଗ ଦିଆଯାଉ। ମାସିକ ସ୍ବଳ୍ପ ପାରିଶ୍ରମିକ ଦିଆଯାଇ ସବୁ ଲାଇବ୍ରେରିରେ ଲାଇବ୍ରେରିଆନ ନିଯୁକ୍ତି କରାଯାଉ। ଏକ ପରିଚାଳନା କମିଟି ମାଧ୍ୟମରେ ପୁସ୍ତକ କିଣା ଯିବା ପାଇଁ ଚୟନ କରାଯିବାକୁ ସେ ଗୁରୁତ୍ୱ ଦେଇଛନ୍ତି। ପ୍ରତି ବ୍ଲକରେ ସରକାରଙ୍କ ପକ୍ଷରୁ ଏକ ସର୍ବସାଧାରଣ ପାଠାଗାର ଓ ପଠନ କେନ୍ଦ୍ର ପ୍ରତିଷ୍ଠା କରାଯିବା ପାଇଁ ସେ ନିବେଦନ କରିଛନ୍ତି।
