ଚଣ୍ଡିଖୋଲ,୧୨ା୪(ଡି.ଏନ.ଏ.):କେନ୍ଦ୍ର ସରକାର ପେଟ୍ରୋଲିୟମ୍ ଜାତ ଦ୍ରବ୍ୟର ମୂଲ୍ୟ ବଢ଼ାଇ ଚାଲିଛନ୍ତି। ଏହି ମୂଲ୍ୟବୃଦ୍ଧିରୁ କିରୋସିନ୍ ବାଦ୍ ପଡିନାହିଁ। ଗତ ୪ମାସ ମଧ୍ୟରେ କିରୋସିନ୍ର ମୂଲ୍ୟ ଅହେତୁକ ବୃଦ୍ଧି ପାଇଛି। ୨୦୨୨ ଜାନୁୟାରୀରେ କିରୋସିନ ଲିଟର ୫୦ଟଙ୍କା ଥିବା ବେଳେ ତାହା ଧିରେ ଧିରେ ବଢି ଏବେ ୭୬ଟଙ୍କାରେ ପହଞ୍ଚତ୍ଲାଣି। ୨୦୨୦ ଏପ୍ରିଲରେ କିରୋସିନର ଲିଟର ପ୍ରତି ମୂଲ୍ୟ ୧୫ଟଙ୍କା ଥିଲା। ଏବେ ୫ଗୁଣା ମୂଲ୍ୟ ବୃଦ୍ଧି ପାଇଛି। ସେଥିପାଇଁ ହିତାଧିକାରୀମାନେ ରାଶନ କାର୍ଡରେ କିରୋସିନ ନେବାକୁ ଅମଙ୍ଗ ହେଉଥିବା ଅଭିଯୋଗ ହୋଇଛି।
ସାଧାରଣତଃ ଗ୍ରାମାଞ୍ଚଳରେ କିରୋସିନର ଅଧିକ ବ୍ୟବହାର ହୋଇଥାଏ। ଯେଉଁମାନଙ୍କ ଘରେ ବିଦ୍ୟୁତ୍ ସଂଯୋଗ ନାହିଁ ସେମାନେ କିରୋସିନ ଉପରେ ନିର୍ଭରଶୀଳ। ଏପରିକି ଆଦିବାସୀପଡ଼ାରେ ଡ଼ିବି ଓ ଲଣ୍ଠନ ଆଲୁଅ ଉପରେ ନିର୍ଭର କରିବାକୁ ପଡ଼ିଥାଏ। ଏହା ସହ ଗ୍ରାମାଞ୍ଚଳରେ ଘନ ଘନ ବିଦ୍ୟୁତ୍ କାଟ୍ ଯୋଗୁ କିରୋସିନ୍ର ଆବଶ୍ୟକତା ଅଧିକ ରହିଥାଏ। ଏପରି କି ଯେଉଁମାନେ ଜାଳେଣୀ ଗ୍ୟାସ୍ ସିଲିଣ୍ଡର କିଣିପାରୁ ନାହାଁନ୍ତି ସେମାନେ କିରୋସିନରେ ଷ୍ଟୋଭ ଜଳାଇ ରୋଷେଇ କରିଥାନ୍ତି। ଏବେ କିରୋସିନର ଅତ୍ୟଧିକ ମୂଲ୍ୟ ବୃଦ୍ଧି ଗରିବଙ୍କ ପାଇଁ ମହଙ୍ଗା ମାଡ଼ ସଦୃଶ ହୋଇଛି। କେବଳ ସେତିକି ନୁହେଁ ସରକାରଙ୍କ ତରଫରୁ ପୂର୍ବରୁ ମୁଣ୍ଡପିଛା କିରୋସିନ୍ ୨ଲିଟର ଦିଆଯାଉଥିବା ବେଳେ ଏହା ଏବେ ତାହା କମି ୧ଲିଟର ୩.୪୦ ମିଲିଲିଟର ପ୍ରଦାନ କରିବାକୁ ସ୍ଥିର ହୋଇଯାଇଛି। ସେଥିପାଇଁ ଗ୍ରାମାଞ୍ଚଳରେ ଯୋଗାଣ କରୁଥିବା ସରକାରୀ ରିଟେଲର ଓ ପାଇକାରୀ ବିକ୍ରେତାମାନଙ୍କ ମଧ୍ୟରେ ଛକାପଞ୍ଝା ଆରମ୍ଭ ହୋଇଛି। କିରୋସିନର ମୂଲ୍ୟ ବୃଦ୍ଧି ଯୋଗୁ ହିତାଧିକାରୀମାନେ ନେବେ ନାହିଁ ବୋଲି ରିଟେଲରମାନେ କହୁଛନ୍ତି। ସେଥିପାଇଁ ସେମାନେ ଡ଼ିପୋରୁ କିରୋସିନ ଉଠାଉ ନାହାନ୍ତି। ହେଲେ ଡ଼ିପୋ ମାଲିକମାନେ ଆବଶ୍ୟକ ପରିମାଣର କିରୋସିନ ଉଠାଇବାକୁ ରିଟେଲରମାନଙ୍କ ଉପରେ ଚାପ ପକାଉଛନ୍ତି। ଯାହାକୁ ନେଇ ବିବାଦ ସୃଷ୍ଟି ହୋଇଛି। ମୂଲ୍ୟ ବୃଦ୍ଧି ଘଟିଛି। ଆମେ ଆଉ କିରୋସିନ୍ ନେବୁ ନାହିଁ ବୋଲି ମଙ୍ଗଳା ସୋରେନ୍, କିଷାନ ସୋରେନ୍, ପୁରସ୍ତମ ସେଠୀ, ଅନାଦୀ ସେଠୀ ପ୍ରମୁଖ ବହୁ ହିତାଧିକାରୀ କହିଛନ୍ତି। ଏ ସମ୍ପର୍କରେ ବଡ଼ଚଣା ବ୍ଲକ ଯୋଗାଣ ଅଧିକାରୀ ବିଶ୍ୱଜିତ୍ ମିଶ୍ରଙ୍କୁ ପଚାରିବାରେ ସେ କୁହନ୍ତି, କିରୋସିନ୍ର ମୂଲ୍ୟ ସରକାର ସ୍ଥିର କରୁଛନ୍ତି। ସେହି ନିଷ୍ପତ୍ତି ଅନୁଯାୟୀ ଆମେ ବିକ୍ରି କରିବାକୁ ବାଧ୍ୟ। ଏଥିରେ ଆମର କିଛି କରିବାର କ୍ଷମତା ନାହିଁ।
