ଭୁବନେଶ୍ୱର: ବଜେଟ ୨୦୨୧-୨୨ରେ ଓଡିଶାକୁ ବ୍ୟୟ ବରାଦ ବୃଦ୍ଧି କରାଯାଇଛି। ୨୦୨୦-୨୧ରେ ରାଜ୍ୟକୁ ୫୭୫୯.୬୪ କୋଟି ଟଙ୍କା ମିଳିଥିବା ବେଳେ ଚଳିତ ବର୍ଷ ବଜେଟରେ ଏହା ୬୯୯୫.୫୮ କୋଟି ଟଙ୍କାକୁ ବଢିଛି। ପାଣ୍ଠି ଅଭାବ ଯୋଗୁ ଯେଭଳି କୌଣସି ପ୍ରକଳ୍ପ କାମ ନ ଅଟକେ ସେ ଦିଗରେ ଧ୍ୟାନ ରଖାଯାଇଥିବା ରେଲଓ୍ବେ ପକ୍ଷରୁ ଗୁରୁବାର ସୂଚନା ଦିଆଯାଇଛି। ଯାତ୍ରୀ ସୁବିଧା, ନିରାପତ୍ତା କାର୍ଯ୍ୟ, ରୋଡ ଅଣ୍ଡରବ୍ରିଜ, ଓଭର ବ୍ରିଜ ଏବଂ ଲିମିଟେଡ ହାଇଟ୍ ସବ୍ଓ୍ବେ (ଏଲଏଚ୍ଏସ୍) ଭଳି କାର୍ଯ୍ୟ ସାମିଲ ରହିଛି।
ଚଳିତ ବର୍ଷ ଖୋର୍ଦ୍ଧାରୋଡ୍-ବଲାଙ୍ଗୀର ରେଳ ପ୍ରକଳ୍ପ ଲାଗି ୧୦୦୦.୫୦ କୋଟି ଟଙ୍କା ପ୍ରଦାନ କରାଯାଇଛି। ଗତ ବର୍ଷ ଏହା ୫୨୦ କୋଟି ଟଙ୍କା ରହିଥିବା ବେଳେ ଏଥିରେ ୯୨.୪% ବୃଦ୍ଧି ଘଟିଛି। ବିଭିନ୍ନ ପ୍ରକଳ୍ପର ଲାଇନ ଦୋହରୀକରଣ ଲାଗି ପାଣ୍ଠି ପ୍ରଦାନକୁ ଗୁରୁତ୍ୱ ଦିଆଯାଇଛି। ବାଂଶପାଣି- ଦୈତାରୀ-ଟମକା-ଯଖପୁରା ପ୍ରକଳ୍ପରେ ବ୍ୟୟବରାଦ ୧୮୫% ବଢି ୨୨୮ କୋଟି ଟଙ୍କା ରହିଛି। ସେହିଭଳି ବୃନ୍ଦାମାଳ-ଝାରସୁଗୁଡା ଫ୍ଲାଏଓଭର ଲାଗି ୨୦ କୋଟି, ଭଦ୍ରକ-ନିର୍ଗୁଣ୍ଡି ତୃତୀୟ ଲାଇନ ଲାଗି ୨୨୯ କୋଟି, ବୁଢାପଙ୍କ-ଶାଳଗାଁ ପ୍ରକଳ୍ପରେ ୨୧୫ କୋଟି, ରାଉରକେଲା-ଝାରସୁଗୁଡା ତୃତୀୟ ଲାଇନ ଲାଗି ୨୩୦ କୋଟି ଏବଂ ନୟାଗଡ-ଭଦ୍ରକ ତୃତୀୟ ଲାଇନ ଲାଗି ୨୨୫ କୋଟି ଟଙ୍କା ଦିଆଯାଇଛି। ଏଥିରେ ପ୍ରାୟ ୩୫୦% ଅନୁଦାନ ବଢାଯାଇଛି।
ଯାତ୍ରୀ ସୁବିଧାକୁ ପ୍ରାଥମିକତା ସହ ବ୍ୟୟବରାଦ ୧୨୯ କୋଟିରୁ ୪୨୯ କୋଟି ଟଙ୍କାକୁ ବଢିଛି। ଏଲ୍ସି ଗେଟ୍ ଲେଭଲ କ୍ରସିଂ ହଟାଇବା ଲାଗି ୪୦୦ କୋଟି ଟଙ୍କା ବ୍ୟବସ୍ଥା କରାଯାଇଛି। ଏହା ଗତ ବର୍ଷ ୩୨୪ କୋଟି ଟଙ୍କା ରହିଥିଲା। ୨୦୨୧-୨୨ ଲାଗି ରେଳ ଭିତ୍ତିଭୂମି ଏବଂ ନିରାପତ୍ତା ସଂକ୍ରାନ୍ତ କାର୍ଯ୍ୟ ଲାଗି ବଜେଟରେ ୫,୫୨୮ କୋଟି ଟଙ୍କାର ବ୍ୟବସ୍ଥା କରାଯାଇଛି। ମୋଟ ପ୍ରକଳ୍ପ ବାବଦ ଯୋଜନାକୁ ଦେଖିଲେ ଏହା ୬୯୯୫.୫୮ କୋଟି ଟଙ୍କା ରହିଛି। ସେହିଭଳି ବିଭିନ୍ନ ପ୍ରକଳ୍ପ ବଜେଟ ଗ୍ରାଣ୍ଟ କଥା ବିଚାରକୁ ନେଲେ ନୂଆ ଲାଇନ ବାବଦ ୧୫୫୩ କୋଟି, ଦୋହରୀକରଣରେ ୧୭୦୨ କୋଟି, ଟ୍ରାଫିକ ସୁବିଧା ଲାଗି ୧୭.୧୫ କୋଟି, କମ୍ପ୍ୟୁଟରୀକରଣ ୩.୪୭ କୋଟି, ରୋଲିଂ ଷ୍ଟକ ୨୩.୫୨ କୋଟି, ଲିଜ୍ ଚାର୍ଜେସ ୬୫୧.୪୮ କୋଟି, ଲେଭଲ କ୍ରସିଂ ୧୮.୮୧ କୋଟି ଏବଂ ଆରଓବି-ଆର୍ୟୁବି ବାବଦ ୨୮୦.୪୦ କୋଟି ଟଙ୍କା ଖର୍ଚ୍ଚ ହେବ। ସେହିଭଳି ଟ୍ରାକ ନବୀକରଣ ଲାଗି ୪୦୨ କୋଟି, ବ୍ରିଜ କାର୍ଯ୍ୟ ଲାଗି ୩୮ କୋଟି, ପ୍ରକଳ୍ପ ବିଦ୍ୟୁତୀକରଣ ୧୭୩ କୋଟି, ଅନ୍ୟ ବିଦ୍ୟୁତୀକରଣ ବାବଦ ୨୪.୫୪ କୋଟି, ମେସିନେରି ପ୍ଲାଣ୍ଟ ୧୩.୫୯ କୋଟି, ଓ୍ବାର୍କଶପ ୩୬.୯୧ କୋଟି, କର୍ମଚାରୀ କଲ୍ୟାଣ ୧୭.୩୨ କୋଟି, ଯାତ୍ରୀ ସୁବିଧା ୩୦୦.୮୦ କୋଟି, ଅନ୍ୟାନ୍ୟ କାର୍ଯ୍ୟ ୧୦.୮୯ କୋଟି, ମାନବ ସମ୍ବଳ ତାଲିମ ୨.୯୧ କୋଟି ଷ୍ଟୋର ସସ୍ପେନ୍ସ ୫୨୪.୬୩ କୋଟି, ଡବ୍ଲ୍ୟୁଏମ୍ଏସ୍ ୧୯୦.୯୫ କୋଟି ସହ ଏସ୍ଇଆର୍ ଏବଂ ଏସ୍ଇସିଆର୍ କାର୍ଯ୍ୟ ବାବଦକୁ ୯୨୧ କୋଟି ଟଙ୍କା ଖର୍ଚ୍ଚ କରାଯିବ ବୋଲି ପୂର୍ବତଟ ରେଳପଥ ପକ୍ଷରୁ ସୂଚନା ମିଳିଛି।
