ମୁମ୍ବାଇ: ବମ୍ବେ ଷ୍ଟକ ଏକ୍ସଚେଞ୍ଜ(ବିଏସ୍ଇ)ରେ ସୂଚୀଭୁକ୍ତ କମ୍ପାନୀଗୁଡିକର ବଜାର ପୁଞ୍ଜୀକରଣରେ ଐତିହାସିକ ରେକର୍ଡ ଦେଖାଯାଇଛି। ଏହି କମ୍ପାନୀଗୁଡିକର ବଜାର ପୁଞ୍ଜୀକରଣ ଗୁରୁବାର ପ୍ରଥମଥର ଲାଗି ୨୦୦ ଲକ୍ଷ କୋଟି ଟଙ୍କା ଛୁଇଁଛି। ଭାରତୀୟ ପୁଞ୍ଜି ବଜାରରେ ଗତ କିଛି ଦିନ ହେବ ଭଲ କାରବାର ହେଉଛି। ବିଶେଷ କରି ବଜେଟ ପରଠାରୁ ଶେୟାର ବଜାରର ସୂଚକାଙ୍କ ଉର୍ଦ୍ଧ୍ୱଗାମୀ ହୋଇଛି। ୩୦ ଶେୟାର ବିଶିଷ୍ଟ ବମ୍ବେ ଷ୍ଟକ ଏକ୍ସଚେଞ୍ଜ କାରବାର ଗୁରୁବାର ୩୫୮.୫୪ ପଏଣ୍ଟ(୦.୭୧%) ଉର୍ଦ୍ଧ୍ୱରେ ରହିବା ଯୋଗୁ ଏହା ୫୦,୬୧୪.୨୯ ପଏଣ୍ଟ ସ୍ତରରେ ବନ୍ଦ ହୋଇଛି। ଗତ ୪ ଦିନ ଧରି ଶେୟାର ବଜାର ବଢିଚାଲିଛି। ସମ୍ପତ୍ତି ସୃଷ୍ଟିରେ ବିଏସ୍ଇ ଲଗାତର ଏହାର ଯୋଗଦାନ ରଖିଥିବା ଏହାର ସିଇଓ ଆଶିସ ଚୌହାନ କହିଛନ୍ତି। ସୂଚୀଭୁକ୍ତ କମ୍ପାନୀଙ୍କ ବଜାର ପୁଞ୍ଜୀକରଣ କ୍ଷେତ୍ରରେ ବିଏସ୍ଇ ବିଶ୍ୱର ନବମ ବୃହତ୍ତ ଷ୍ଟକ ବଜାର ହୋଇଛି ବୋଲି ସେ ସ୍ପଷ୍ଟ କରିଛନ୍ତି। ଗତ ୪ ଦିନରେ ନିବେଶକଙ୍କ ସମ୍ପତ୍ତି ୧୪.୩୪ ଲକ୍ଷ କୋଟି ଟଙ୍କା ବଢିଥିବା ଜଣାପଡିଛି।
