ଡିଏସ୍‌ଏମ୍‌ ପାଇଁ ନିବେଶ ହେବ ୪୪୧ କୋଟି
9:53 amNovember 16, 2021November 16, 2021 / 09

ଭୁବନେଶ୍ୱର,୧୬।୧୧: ଏନର୍ଜି ଏଫିସିଏନ୍ସି ସର୍ଭିସେସ୍‌ ଲିମିଟେଡ୍‌ (ଇଇଏସ୍‌ଏଲ୍‌) ପକ୍ଷରୁ ଓଡ଼ିଶାର ଶକ୍ତି ବିତରଣ କମ୍ପାନୀଗୁଡ଼ିକ ଲାଗି ୟୁଟିଲିଟି ଭିତ୍ତିକ ଡିମାଣ୍ଡ ସାଇଡ ମ୍ୟାନେଜମେଣ୍ଟ(ଡିଏସ୍‌ଏମ୍‌) ଆରମ୍ଭ କରାଯାଇଛି। ପର୍ଯ୍ୟାୟ ଭିତ୍ତିରେ ଏହି ଯୋଜନା ଲାଗି ରାଜ୍ୟରେ ୪୪୧ କୋଟି ଟଙ୍କା ନିବେଶ ଯୋଜନା ରଖାଯାଇଛି। ଆଗାମୀ ୩ରୁ ବର୍ଷ ଲାଗି ପ୍ରକଳ୍ପ କାର୍ଯ୍ୟାନ୍ବୟନ ଲାଗି ଇଇଏସ୍‌ଏଲ୍‌ ବିଭିନ୍ନ କାର୍ଯ୍ୟକ୍ରମ ହାତକୁ ନେବ। ଆଗାମୀ ଦିନରେ ଗ୍ରାହକଙ୍କଠାରୁ ଏହି ଅର୍ଥ ରାଶି ସେବା ଯୋଗାଣ ମାଧ୍ୟମରେ ସଂଗ୍ରହ କରିବାକୁ ମଧ୍ୟ ଲକ୍ଷ୍ୟ ରଖାଯାଇଛି। ରାଜ୍ୟରେ ଟାଟା ପାଓ୍ବାର ସେଣ୍ଟ୍ରାଲ ଓଡ଼ିଶା ଡିଷ୍ଟ୍ରିବ୍ୟୁଶନ ଲିମିଟେଡ୍‌(ଟିପିସିଓଡିଏଲ୍‌) ଏବଂ ଟିପି ନର୍ଦନ ଓଡ଼ିଶା ଡିଷ୍ଟ୍ରିବ୍ୟୁଶନ ଲିମିଟେଡ୍‌(ଟିପିଏନ୍‌ଓଡିଏଲ୍‌) ଏହି ପାଇଲଟ ପ୍ରକଳ୍ପଗୁଡ଼ିକ କାର୍ଯ୍ୟକାରୀ କରାଇବା ଲାଗି ଆଗ୍ରହ ପ୍ରକାଶ କରିଛନ୍ତି। ଡିଏସ୍‌ଏମ୍‌ କାର୍ଯ୍ୟକ୍ରମରେ ଶକ୍ତି ସଞ୍ଚୟ କରୁଥିବା ଟେକ୍ନୋଲୋଜିଗୁଡ଼ିକର ଗ୍ରହଣୀୟତା ବୃଦ୍ଧି କରିବା ଲକ୍ଷ୍ୟ ରଖାଯାଇଛି। ଏହାଦ୍ୱାରା ଗ୍ରୀନ୍‌ ହାଉସ ଗ୍ୟାସ୍‌ ନିର୍ଗମନକୁ କମାଇବା ଏବଂ ଶକ୍ତି ସଞ୍ଚୟକୁ ବଢ଼ାଇବା ଦିଗରେ ଫୋକସ ରଖାଯାଇଛି। ଉଭୟ ଝାଡ଼ଖଣ୍ଡ ଏବଂ ତେଲଙ୍ଗାନାରେ ଏହି କାର୍ଯ୍ୟକ୍ରମ ପାଇଁ ମଧ୍ୟ ଯୋଜନା ରଖାଯାଇଛି। ଏଭଳି ପଦକ୍ଷେପ ଦ୍ୱାରା ଶକ୍ତି ବିତରଣ କମ୍ପାନୀଗୁଡିକ ଆର୍ଥତ୍କ ସମସ୍ୟାକୁ ଦୂରୀକରଣ କରାଯିବା ସହ ଖାଉଟି ଲାଭବାନ୍‌ ହୋଇପାରିବେ ବୋଲି ଶକ୍ତି ବିଭାଗ ପ୍ରମୁଖ ଶାସନ ସଚିବ ନିକୁଞ୍ଜ ବିହାରୀ ଧଳ ଏଠାରେ ଅନୁଷ୍ଠିତ ଏକ କାର୍ଯ୍ୟକ୍ରମରେ କହିଛନ୍ତି। ଶକ୍ତି ନିରାପତ୍ତା କ୍ଷେତ୍ରରେ ଏହି କାର୍ଯ୍ୟକ୍ରମଗୁଡିକ ବିଶେଷ ସହାୟକ ହେବ ବୋଲି ଓଇଆର୍‌ସି ଅଧ୍ୟକ୍ଷ ୟୁ.ଏନ୍‌. ବେହେରା କହିଛନ୍ତି। କାର୍ଯ୍ୟକ୍ରମରେ ଗ୍ରୀଡ୍‌କୋ ଏମ୍‌ଡି ତ୍ରିଲୋଚନ ଜେନା, ପିଜି ଡାଇରେକ୍ଟର ଇନ୍‌ଭେଷ୍ଟମେଣ୍ଟ ସରବିନ୍ଦର ସିଂ, ଇଇଏସ୍‌ଏଲ୍‌ର କାର୍ଯ୍ୟନିର୍ବାହୀ ନିର୍ଦ୍ଦେଶକ ସି.ପି.ଗଡ଼ନାୟକ, କ୍ଲଷ୍ଟର ମୁଖ୍ୟ ଅଭିଷେକ ଗୁପ୍ତା ପ୍ରମୁଖ ଉପସ୍ଥିତ ଥିଲେ।