ବରଗଡ଼ ଅଫିସ୍,୧୧।୧: ବରଗଡ଼ ସହରର ଏକ ହୋଟେଲ ପରିସରରୁ ରବିବାର ୨.୩୫ ଲକ୍ଷ ଟଙ୍କା ଲୁଟ୍ ଘଟଣାର ପର୍ଦ୍ଦାଫାଶ ହୋଇଛି । ସ୍ଥାନୀୟ ଟାଉନ ଥାନା ପୋଲିସ ଲୁଟ୍ ଘଟଣାରେ ସମ୍ପୃକ୍ତ ୨ ଅଭିଯୁକ୍ତଙ୍କୁ ଗିରଫ କରିଛି । ସେମାନେ ହେଲେ ବରଗଡ଼ ପୌର ପରିଷଦ ଅଧୀନ ୱାର୍ଡ଼ ନଂ-୫ର ରାମ ଓରଫ ରାଘବ ନାଏକ ଏବଂ ହର୍ଲୁ ଗୁର୍ଲା। ପୋଲିିସ ତାଙ୍କ ପାଖରୁ ଲୁଟ୍ ହୋଇଥିବା ୨ଲକ୍ଷ ୩୫ହଜାର ଟଙ୍କା, ଗୋଟିଏ ବାଇକ୍(ନଂ-ଓଡ଼ି୧୫ଜେ୮୭୩୭), ୨ଟି ଛୁରୀ ଏବଂ ୪ଟି ମୋବାଇଲ ଫୋନ ଜବତ୍ କରିଛି। ଏ ନେଇ ଦଫା ୩୯୪ରେ ଏକ ମାମଲା(ନଂ.୧୬/୨୦୨୧) ରୁଜୁ ହୋଇଛି। ଗିରଫ ଅଭିଯୁକ୍ତମାନଙ୍କୁ ମଙ୍ଗଳବାର କୋର୍ଟ ଚାଲାଣ କରାଯିବ ବୋଲି ଟାଉନ ଥାନା ଆଇଆଇସି ସଦାନନ୍ଦ ପୂଜାହାରୀ ସୂଚନା ଦେଇଛନ୍ତି। ପ୍ରକାଶଥାଉକି, ରବିବାର ସହରର ଏକ ହୋଟେଲ ପରିସରରେ ଛତିଶଗଡ଼ ରାଜ୍ୟ ଭତାପଦର ଗ୍ରାମର ଆଲୋକ ଭଟ୍ଟରଙ୍କୁ ୨ ଜଣ ଯୁବକ ଆକ୍ରମଣ କରି ସେ ଧରିଥିବା ୨.୪୫ ଲକ୍ଷ ଟଙ୍କା ଲୁଟି ନେଇ ଥିଲେ। ଏନେଇ ସେ ଥାନାରେ ଏକ ଏତଲା ଦେଇଥିଲେ । ଏତଲା ପାଇବା ପରେ ପୋଲିସ ତନାଘନା ଚଲାଇଥିଲା। ଘଟଣାର ୨୪ ଘଣ୍ଟା ମଧ୍ୟରେ ପୋଲିସ ଅଭିଯୁକ୍ତଙ୍କୁ ଗିରଫ କରିବା ସହିତ ଲୁଟ୍ ଟଙ୍କା ଜବତ କରିବାରେ ସକ୍ଷମ ହୋଇଛି।
