ରାଉରକେଲା ଅଫିସ,୮।୫: ସୁନ୍ଦରଗଡ଼ ଜିଲା ଲାଠିକଟା, କୁଆଁରମୁଣ୍ଡା, ନୂଆଗାଁ ଓ ବିଶ୍ରା ଆଦି ବ୍ଲକର ପରିବା ଚାଷ କରୁଥିବା ୫ହଜାରରୁ ଊର୍ଦ୍ଧ୍ୱ ମହିଳା ଚାଷୀଙ୍କ ଅଭାବୀ ବିକ୍ରି ସମସ୍ୟା ଦୂର ହେବ। ଷ୍ଟିଲସିଟି ରାଉରକେଲା ସହରରେ ବର୍ଷଯାକ ତଟକା ପନିପରିବା ଉପଲବ୍ଧ ହେବ। ଚାଷୀଙ୍କ ବଳକା ପରିବା ଆଉ ଫିଙ୍ଗା ଫୋପଡା ହେବନାହିଁ। ଏହାକୁ ଦୃଷ୍ଟିରେ ରଖି ବର୍ତ୍ତମାନ ରାଉରକେଲାରେ ୮କୋଟି ଟଙ୍କା ବ୍ୟୟରେ ୩୦ ମେଟ୍ରିକ ଟନ୍ ବିଶିଷ୍ଟ ୪ଟି ବୃହତ୍ ଶୀତଳଭଣ୍ଡାର ନିର୍ମାଣ କାର୍ଯ୍ୟ ଆଗେଇ ଚାଲିଛି।
୨୦୧୧ରେ ଅନ୍ତର୍ଜାତୀୟ ବ୍ଲୁମବର୍ଗ ମେୟର ଚ୍ୟାଲେଞ୍ଜ ପ୍ରତିଯୋଗିତାରେ ବିଶ୍ୱର ଶ୍ରେଷ୍ଠ ୧୫ଟି ସହର ମଧ୍ୟରୁ ଏ ତାଲିକାରେ ରାଉରକେଲା ସ୍ଥାନ ପାଇଥିଲା। ପରବର୍ତ୍ତୀ ସମୟରେ ୨୦୨୨ରେ ଫଳାଫଳ ଘୋଷଣା ହୋଇଥିଲା ଏବଂ ରାଉରକେଲା ସହରରେ ୪ଟି ଶୀତଳ ଭଣ୍ଡାର ସ୍ଥାପନ ପାଇଁ ୮କୋଟି ଟଙ୍କା ଜାତିସଂଘ ଉନ୍ନୟନ କାର୍ଯ୍ୟକ୍ରମ (ୟୁଏନ୍ଡିପି) ମାଧ୍ୟମରେ ଅନୁମୋଦନ ହୋଇଥିଲା। ସ୍ଥାନୀୟ ପରିବା ଚାଷୀ ଓ ସ୍ବୟଂ ସହାୟିକା ଗୋଷ୍ଠୀଙ୍କ ଆର୍ଥିକ ଓ ସାମାଜିକ ବିକାଶ ପାଇଁ ଏପ୍ରକାର ଉଦ୍ୟମ ଆରମ୍ଭ ହୋଇଥିଲା। ପୂର୍ବରୁ କୁଆଁରମୁଣ୍ଡା, ଲାଠିକଟା, ନୂଆଗଁା ଓ ବିଶ୍ରା ବ୍ଲକରୁ ମହିଳା ଚାଷୀମାନେ ପନିପରିବା ଧରି ରାଉରକେଲା ସହରକୁ ଆସୁଥିଲେ ଏବଂ ଅଭାବୀ ବିକ୍ରିର ଶିକାର ହୋଇ ଆର୍ଥତ୍କ କ୍ଷତି ସହୁଥିଲେ। ବିପୁଳ ପରିମାଣର ତଟକା ପନିପରିବା ନଷ୍ଟ ମଧ୍ୟ ହେଉଥିଲା। ତେଣୁ ପରିବା କିଭଳି ନଷ୍ଟ ନ ହେବ ସେଥିପାଇଁ ରାଉରକେଲା ଟ୍ରାଫିକ ଗେଟ ମାର୍କେଟରେ ଚାଲିଥିବା ଶୀତଳଭଣ୍ଡାର ନିର୍ମାଣ କାମ ଇତିମଧ୍ୟରେ ସମ୍ପୂର୍ଣ୍ଣ ହୋଇସାରିଛି। ଛେଣ୍ଡ୍ଠାରେ ନିର୍ମାଣ କାର୍ଯ୍ୟ ଚାଲିଛି। ଯଥାଶୀଘ୍ର ଆମ୍ବାଗାନ ଓ ପାନପୋଷ ମାର୍କେଟରେ ନିର୍ମାଣ କାର୍ଯ୍ୟ ଶୁଭାରମ୍ଭ କରାଯିବ ବୋଲି ବିଭାଗୀୟ ସୂତ୍ରରୁ ଜଣାପଡିଛି। ଏ ନେଇ ରାଉରକେଲା ମହାନଗର ନିଗମ ଡେପୁଟି କମିଶନର ସୁଧାଂଶୁ ଭୋଇଙ୍କୁ ପଚାରିବାରୁ ସେ କହିଲେ, ୪ଟି ଶୀତଳଭଣ୍ଡାର ନିର୍ମାଣ ନିମନ୍ତେ ୮କୋଟି ଟଙ୍କା ଅନୁମୋଦନ ହୋଇଛି। ରାଉରକେଲା ଟ୍ରାଫିକ୍ ଗେଟ ମାର୍କେଟରେ ଶୀତଳଭଣ୍ଡାର ନିର୍ମାଣ କାର୍ଯ୍ୟ ଶେଷ ହୋଇଥିବା ବେଳେ ଛେଣ୍ଡରେ ନିର୍ମାଣ କାର୍ଯ୍ୟ ଚାଲିଛି। ସେହିପରି ଆମ୍ବାଗାନ ଓ ପାନପୋଷ ମାର୍କେଟରେ ଏହା ଆରମ୍ଭ ହେବ ବୋଲି ସେ କହିଥିଲେ। ସେହିପରି ରାଉରକେଲା ଉଦ୍ୟାନ ବିଭାଗ ସହକାରୀ ନିର୍ଦ୍ଦେଶକ ଦୁଷ୍ମନ୍ତ ବେହେରା କହିଛନ୍ତି, ଏହିସବୁ ଶୀତଳ ଭଣ୍ଡାର ୩୦ ମେଟ୍ରିକ ଟନ୍ ବିଶିଷ୍ଟ ଅଟେ। ତେଣୁ ପରିବା ଖରାରେ ନଷ୍ଟ ହେବନାହିଁ। ପୂର୍ବରୁ ଚାଷୀ ଶସ୍ତାରେ ପରିବା ବିକ୍ରି କରୁଥିଲେ, ତାହା ଆଉ ହେବନାହିଁ। ପରିବା ଚାଷ କରୁଥିବା ୪ଟି ବ୍ଲକର ୫ହଜାରରୁ ଊର୍ଦ୍ଧ୍ୱ ମହିଳା ଗୋଷ୍ଠୀଙ୍କ ପାଇଁ ଏହି ଶୀତଳଭଣ୍ଡାର ବିଶେଷ ସହାୟକ ହେବ ବୋଲି ସେ କହିଥିଲେ।
