ଭୁବନେଶ୍ୱର,୨୪।୩(ବ୍ୟୁରୋ): ଜୀବନ ସଂଘର୍ଷରେ ହିଁ ଥାଏ ସଫଳତାର ବାଟ। ବଞ୍ଚତ୍ବାକୁ ସଂଘର୍ଷ କରୁଥିବା ଏମିତି ଏକ ଶ୍ରମିକ ପରିବାରରୁ ଆସି ବମ୍ବେରେ ପହଞ୍ଚତ୍ଛନ୍ତି ୧୧ବର୍ଷୀୟ ରୋଶନ କୁମାର। ଦେଶର ଲୋକପ୍ରିୟ ରିଆଲିଟି ଶୋ’ ଡ୍ୟାନ୍ସ ଇଣ୍ଡିଆ ଡ୍ୟାନ୍ସ (ଡିଆଇଡି) ଲିଟିଲ ମାଷ୍ଟର ସିଜନ-୫ରେ ହିପ୍ହପ୍କୁ ନେଇ ନୃତ୍ୟ ପ୍ରଦର୍ଶନ କରି ଲକ୍ଷ ଲକ୍ଷ ଲୋକଙ୍କ ହୃଦୟ ଜିତିଛନ୍ତି ଝାରସୁଗୁଡ଼ାର ଏହି ବାଳକ। ସେ ପ୍ରଥମ ରାଉଣ୍ଡ୍ କ୍ଲିଅର କରିଛନ୍ତି। ତେବେ ପୁଅର ଏହି ସଫଳତା ପାଇଁ ମା’ ଶାରଦା ସାହୁଙ୍କ ସ୍ବପ୍ନ ଆଉ ସଂଘର୍ଷର କାହାଣୀ ଆଜି ସମସ୍ତଙ୍କୁ ସ୍ତମ୍ଭୀଭୂତ କରିଛି। ଶୋ’କୁ ଯିଏ ଦେଖୁଛି, ଓଡ଼ିଶାର ଏହି ମହାନ ମା’ ଆଉ ତାଙ୍କ ସୁଯୋଗ୍ୟ ସନ୍ତାନଙ୍କୁ ସଲାମ୍ ଜଣାଉଛି।
ନୃତ୍ୟରେ ଚକିତ ହୋଇଯିବା ପରେ ବିଚାରକମାନେ ତାଙ୍କ ମା’ ଶାରଦାଙ୍କୁ ଷ୍ଟେଜ୍କୁ ଡାକିଥିଲେ। ଆଉ ଶାରଦା ଯେତେବେଳେ ନିଜ ସଂଘର୍ଷର କାହାଣୀ କହିଥିଲେ ତାହା ଉପସ୍ଥିତ ସମସ୍ତଙ୍କ ଆଖିରେ ଲୁହ ଭରି ଦେଇଥିଲା। ଶାରଦାଙ୍କୁ ତାଙ୍କ ସ୍ବାମୀ ପୋଡ଼ି ମାରିଦେବାକୁ ଚାହୁଁଥିବାବେଳେ ସେ ଘର ଛାଡ଼ି ୩ ପିଲାଙ୍କୁ ଧରି ବାହାରକୁ ପଳାଇ ଆସିଥିଲେ। ଏଠି ସେଠି ମୁଣ୍ଡ ଗୁଞ୍ଜିବା ସହ ଚୁଡ଼ି ବିକି ପିଲାଙ୍କୁ ମଣିଷ କରୁଛନ୍ତି। ବଡ଼ ପୁଅ ଶ୍ରମିକ କାମ କରୁଥିବାବେଳେ ରୋଶନ ତାଙ୍କୁ ତାଙ୍କ ପରିଶ୍ରମର ମୂଲ୍ୟ ଦେଇଥିବା କହିଛନ୍ତି ଶାରଦା। ରୋଶନଙ୍କର ଛୋଟବେଳୁ ପ୍ରତିଭା ଦେଖି ସେ ନାଚିବାକୁ ସୁଯୋଗ ଓ ସାହସ ଦେଇଥିଲେ।
ରୋଶନ ସବୁବେଳେ ନୃତ୍ୟ ଅଭ୍ୟାସ କରିବା ସହ ଘର ପାଖରେ ହେଉଥିବା କାର୍ଯ୍ୟକ୍ରମରେ ନୃତ୍ୟ ପ୍ରଦର୍ଶନ କରନ୍ତି। ତେବେ ବମ୍ବେରେ ହେଉଥିବା ଡିଆଇଡି ଲିଟିଲ ମାଷ୍ଟର-ସିଜନ ୫ରେ ଭାଗନେବାକୁ ରୋଶନ ତାଙ୍କ ମା’ଙ୍କୁ କହିଥିଲେ। ପୁଅର ମନ ଛୋଟ ନ ହେଉ ଓ ସେ ଆଗକୁ ବଢ଼ୁ ବୋଲି ମା’ ଶାରଦା ଚାହିଁଥିଲେ ମଧ୍ୟ ଅର୍ଥ ଚିନ୍ତା ଘାରିଥିଲା। ହେଲେ ସେ ଭାଙ୍ଗି ନ ପଡ଼ି ନିଜ ପରିଶ୍ରମକୁ ବଢ଼ାଇ କିଛି ଟଙ୍କା ଯୋଗାଡ଼ କରିଥିଲେ। ଏଥିସହ ଟ୍ରେନରେ ଚୁଡ଼ି ବିକି ବିକି ସେ ପୁଅକୁ ଧରି ବମ୍ବେରେ ପହଞ୍ଚତ୍ଥିଲେ। ପୁଅର ସ୍ବପ୍ନ ଆଗରେ ମା’ ଯେ ସର୍ବସଂହା ଓ କେତେ ଶକ୍ତିଶାଳୀ ହୋଇପାରେ ତାହା ସେ ପ୍ରମାଣ କରିଥିଲେ। ତାଙ୍କର ଏହି ସଂଘର୍ଷପୂର୍ଣ୍ଣ କାହାଣୀ ଶୁଣିବା ପରେ ଉପସ୍ଥିତ ବିଚାରକମଣ୍ଡଳୀ ଓ ଅନ୍ୟମାନେ ଭାବବିହ୍ବଳ ହୋଇପଡ଼ିଥିଲେ।
ଅଭିନେତ୍ରୀ ସୋନାଲି ରୋଶନଙ୍କ ସଫଳତା ହିଁ ଜଣେ ମା’ର ବିଶ୍ୱାସ ବୋଲି କହିଛନ୍ତି। ଅନ୍ୟତମ ବିଚାରକ ବଲିଉଡ କୋରିଓଗ୍ରାଫର ରେମୋ ଡିସୁଜା କହିଛନ୍ତି, ରୋଶନଙ୍କ ଫୁଟ୍ ଷ୍ଟେପଗୁଡ଼ିକ ସ୍ମୁଥ୍ ଓ ଫାଷ୍ଟ ଥିଲା, ଯାହା ତାଙ୍କୁ ଭଲ ଲାଗିଥିଲା। ସେ ବହୁତ ଭଲ କରିବେ ବୋଲି ପ୍ରଥମରୁ ଜାଣିପାରିଥିଲେ। ସେ ଯେବେ ଯାଏ ଡ୍ୟାନ୍ସ କରିବେ ସେ ତାଙ୍କୁ ସାହାଯ୍ୟ କରିବେ। ଏବେଠୁ ରୋଶନ ତାଙ୍କର ବୋଲି ରେମୋ ଷ୍ଟେଜ୍ରେ ଘୋଷଣା କରିଥିଲେ। ସେହିଭଳି ବିଚାରକ ତଥା ଅଭିନେତ୍ରୀ ମୌନି ମଧ୍ୟ ସମସ୍ତଙ୍କ ବିଶ୍ୱାସ ସହ ରୋଶନଙ୍କୁ ଆଗକୁ ବଢ଼ିବାକୁ ପ୍ରେରଣା ଦେଇଥିଲେ।
