ଭୁବନେଶ୍ୱର,୧୧ା୨(ବ୍ୟୁରୋ): ଓଡ଼ିଶା ପ୍ରଶାସନିକ ସେବା(ଓଏଏସ୍) ହେଉଛି ରାଜ୍ୟ ପ୍ରଶାସନର ମୁଖ୍ୟ ଅଂଶ। ବ୍ଲକ ଏବଂ ତହସିଲଗୁଡ଼ିକରେ ରାଜ୍ୟ ସରକାରଙ୍କ ବିଭିନ୍ନ ଯୋଜନା କାର୍ଯ୍ୟକାରୀ କରିବା କ୍ଷେତ୍ରରେ ଓଏଏସ୍ ଅଧିକାରୀ ଗୁରୁତ୍ୱପୂର୍ଣ୍ଣ ଅବଦାନ ଦେଇଆସିଛନ୍ତି। ତୃଣମୂଳସ୍ତରରେ ସରକାରଙ୍କ ଜନକଲ୍ୟାଣ ଯୋଜନାକୁ ପହଞ୍ଚାଇବାରେ ସେମାନେ ଦାୟିତ୍ୱର ସହ ପ୍ରମୁଖ ଭୂମିକା ଗ୍ରହଣ କରିଆସିଛନ୍ତି। ରାଜ୍ୟ ସରକାରଙ୍କ ବିଭିନ୍ନ ମହତାକାଂକ୍ଷୀ ଯୋଜନା ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା, ୫-ଟି ସ୍କୁଲ ରୂପାନ୍ତରୀକରଣ, ପୁରୁଷ ବିଶ୍ୱକପ୍ ହକି, ମେକ୍ ଇନ୍ ଓଡିଶା କନ୍କ୍ଲେଭ ଏବଂ କରୋନା ମହାମାରୀ ସମୟରେ ଓଏଏସ୍ ଅଧିକାରୀମାନଙ୍କର ଭୂମିକା ପ୍ରଶଂସନୀୟ ବୋଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଛନ୍ତି।
ଶୁକ୍ରବାର ଓଏଏସ୍ ସଂଘର ସାଧାରଣ ପରିଷଦର ଉଦ୍ଯାପନୀ ସଭାରେ ଯୋଗଦେଇ ମୁଖ୍ୟମନ୍ତ୍ରୀ କହିଛନ୍ତି, ୫-ଟି ଓ ମୋ ସରକାର ପ୍ରଶାସନିକ ରୂପାନ୍ତରୀକରଣ କରିବା ସହ ସରକାରୀ କର୍ମଚାରୀଙ୍କ ଜନସାଧାରଣଙ୍କ ପ୍ରତି ମନୋଭାବରେ ପରିବର୍ତ୍ତନ ଆଣିଛି। ପ୍ରତ୍ୟେକ କ୍ଷେତ୍ରରେ ଓଡ଼ିଶା ଉତ୍ତମ ପ୍ରଦର୍ଶନର ଆଶାପୋଷଣ କରିବା ସହ ହକ୍ଦାର ହୋଇପାରିଛି। ବିଶ୍ୱକପ୍ ଆୟୋଜନ, ମହାମାରୀ ସମୟରେ ଦେଶକୁ ସହାୟତା କରିବା ଏବଂ ଅନ୍ୟାନ୍ୟ ପଦକ୍ଷେପ ନୂଆ ଓଡ଼ିଶାର ସଙ୍କେତ ବହନ ସହ ଦେଶକୁ ମାନବିକ ଜୀବନ ଓ ମୂଲ୍ୟବୋଧ କ୍ଷେତ୍ରରେ ଆଗକୁ ନେବାରେ ସାହାଯ୍ୟ କରିଛି। ସମୃଦ୍ଧ ଓଡ଼ିଶା ଗଠନର ସ୍ବପ୍ନକୁ ସାକାର କରିବା ସକାଶେ ପରିବର୍ତ୍ତନକୁ ଗ୍ରହଣ କରିବା ପାଇଁ ପ୍ରଶାସନ ନିଶ୍ଚିତ ଭାବେ ଶକ୍ତିଶାଳୀ ହେବା ଦରକାର। ସରକାରଙ୍କ ସମସ୍ତ ଅଭିନବ କାର୍ଯ୍ୟକ୍ରମକୁ ସଫଳ କରିବା ପାଇଁ ଓଡ଼ିଶା ପ୍ରଶାସନିକ ସେବା ଅଧିକାରୀମାନେ ଉତ୍ସର୍ଗୀକୃତ ଭାବେ କାର୍ଯ୍ୟ କରିବାକୁ ମୁଖ୍ୟମନ୍ତ୍ରୀ ପରାମର୍ଶ ଦେଇଛନ୍ତି।
