ମୁମ୍ବାଇ,୨ା୫: ଟି୨୦ କ୍ରିକେଟ ବିଶ୍ୱକପ ପାଇଁ ଦଳ ଚୟନକୁ ସମର୍ଥନ କରିଛନ୍ତି ଭାରତୀୟ ଅଧିନାୟକ ରୋହିତ ଶର୍ମା। ଗୁରବାର ଭାରତୀୟ ଦଳର ଅଧିନାୟକ ରୋହିତ ଶର୍ମା ଓ ମୁଖ୍ୟ ଚୟନକର୍ତ୍ତା ଅଜିତ ଅଗରକର ଏକ ଖବରଦାତା ସମ୍ମିଳନୀରେ ଟିମ୍ ସମ୍ପର୍କରେ ସୂଚନା ଦେଇଥିଲେ।
ଭାରତୀୟ ଦଳରେ ବିଶ୍ୱକପ ପାଇଁ ୪ ଜଣ ସ୍ପିନର ଓ ୩ ପେସରଙ୍କୁ ସାମିଲ କରାଯାଇଛି। ଓ୍ବେଷ୍ଟଇଣ୍ଡିଜ ଓ ଆମେରିକାର ପରସ୍ଥିତିକୁ ଦୃଷ୍ଟିରେ ରଖି ଏଭଳି ନିଷ୍ପତ୍ତି ନିଆଯାଇଥିବା ରୋହିତ ସ୍ପଷ୍ଟ କରିଛନ୍ତି।
ଓ୍ବେଷ୍ଟଇଣ୍ଡିଜର ପିଚ୍ ଗୁଡିକ ଧୀମା ରହୁଥିବାରୁ ଦଳୀୟ ସନ୍ତୁଳନ ବଜାୟ ରଖିବାକୁ ଏଭଳି ନିଷ୍ପତ୍ତି ନିଆଯାଇଥିବା ରୋହିତ ସ୍ପଷ୍ଟ କରିଛନ୍ତି। ଭାରତୀୟ ଦଳରେ ୟୁଜବେନ୍ଦ୍ର ଚହଲ ଓ କୁଲଦୀପ ଯାଦବ ରିଷ୍ଟ ସ୍ପିନର ଭାବରେ ରହିଥିବା ବେଳେ ରବୀନ୍ଦ୍ର ଜାଡେଜା ଓ ଅକ୍ଷର ପଟେଲ ଅଲରାଉଣ୍ଡର ଭାବେ ସ୍ଥାନ ପାଇଛନ୍ତି। ସମସ୍ତ ମ୍ୟାଚ୍ ଦିନରେ ଖେଳାଯିବ। ତେଣୁ କାକରର ସମ୍ଭାବନା ନ ଥିବାରୁ ସ୍ପିନରଙ୍କ ଭୂମିକା ଗୁରୁତ୍ୱପୂର୍ଣ୍ଣ ରହିବ ବୋଲି ରୋହିତ କହିଛନ୍ତି। ସେହିପରି ହାର୍ଦ୍ଦିକ ପାଣ୍ଡ୍ୟା ଓ ଶିବମ ଦୁବେ ଅଲରାଉଣ୍ଡର ଭୂମିକା ନିର୍ବାହ କରିବେ ବୋଲି କହିଛନ୍ତି ରୋହିତ।
