ନୂଆଦିଲ୍ଲୀ,୧୫।୭: ଅନନ୍ତ ଅମ୍ବାନୀ ଏବଂ ରାଧିକା ମର୍ଚାଣ୍ଟଙ୍କ ବିବାହ ୧୨ ଜୁଲାଇରେ ବହୁ ଧୂମଧାମରେ ଅନୁଷ୍ଠତ ହୋଇଯାଇଛି। ଏହି ବିବାହରେ ଅତିଥିମାନଙ୍କ ଆଗମନ କିଛି ଦିନ ପୂର୍ବରୁ ଆରମ୍ଭ ହୋଇଥିଲା। ଚଳଚ୍ଚିତ୍ର ତାରକା, ବ୍ୟବସାୟୀଙ୍କ ଠାରୁ ଆରମ୍ଭ କରି କ୍ରୀଡ଼ାବିତ୍ ପର୍ଯ୍ୟନ୍ତ ଅନେକ ପ୍ରସିଦ୍ଧ ଲୋକ ଏହି ଗ୍ରାଣ୍ଡ ବିବାହରେ ଯୋଗ ଦେଇଥିଲେ। କିନ୍ତୁ କିଛି କ୍ରିକେଟର ଥିଲେ ଯେଉଁମାନେ ଏହି ବିବାହରେ ଦେଖା ନ ଥିଲେ। ବିଶେଷକରି ବିରାଟ କୋହଲି ଏବଂ ରୋହିତ ଶର୍ମା ଏହି ବିବାହରୁ ଦୂରରେ ଥିଲେ।
ଟି -୨୦ ବିଶ୍ୱକପ ୨୦୨୪ ଟ୍ରଫି ଜିତିବା ଏବଂ ମୁମ୍ବାଇରେ ବିଜୟ ପରେଡରେ ଯୋଗଦେବା ପରେ ବିରାଟ କୋହଲି ତୁରନ୍ତ ଲଣ୍ଡନ ଅଭିମୁଖେ ଯାତ୍ରା କରିଥିଲେ। ଯେଉଁଠାରେ ସେ ବର୍ତ୍ତମାନ ତାଙ୍କ ପତ୍ନୀ ଅନୁଷ୍କା ଶର୍ମା ଏବଂ ପିଲାମାନଙ୍କ ସହିତ ସମୟ ବିତାଉଛନ୍ତି। ଗୋଟିଏ ପଟେ ସେଲିବ୍ରିଟିମାନେ ଅନନ୍ତ ଅମ୍ବାନୀ ଏବଂ ରାଧିକା ମର୍ଚାଣ୍ଟଙ୍କ ବିବାହରେ ଯୋଗ ଦେଇଥିବା ବେଳେ ଷ୍ଟାର କ୍ରିକେଟର ବିରାଟ କୋହଲି ଏବଂ ଅଭିନେତ୍ରୀ ଅନୁଷ୍କା ଶର୍ମା ଲଣ୍ଡନରେ ଏକ କୀର୍ତ୍ତନରେ ନଜର ଆସିଥିଲେ। ଭାରତୀୟ କ୍ରିକେଟ ଦଳର ଅଧିନାୟକ ରୋହିତ ଶର୍ମା ମୁମ୍ବାଇରେ ଅନନ୍ତ ଅମ୍ବାନୀଙ୍କ ବିବାହ ଉତ୍ସବରେ ଯୋଗ ଦେଇନଥିଲେ। ଏହା ବଦଳରେ ତାଙ୍କୁ ଶନିବାର ଲଣ୍ଡନର ୱିମ୍ବଲଡନରେ ଦେଖିବାକୁ ମିଳିଥିଲା।
ଏହା ନୁହେଁ ଯେ ଅନନ୍ତ-ରାଧିକାଙ୍କ ବିବାହରେ କେବଳ କୋହଲି ଏବଂ ରୋହିତ ସାମିଲ ନଥିଲେ। ଅନ୍ୟ ଅନେକ କିମ୍ବଦନ୍ତୀ କ୍ରିକେଟର ମଧ୍ୟ ଏହି ବିବାହରେ ଯୋଗ ଦେଇନଥିଲେ। ଏହି ବିବାହରେ ହରଭଜନ ସିଂ ଏବଂ ଯୁବରାଜ ସିଂଙ୍କୁ ଦେଖିବାକୁ ମିଳି ନ ଥିଲା। ଏହା ବ୍ୟତୀତ ରାହୁଲ ଦ୍ରାବିଡ, ପୂର୍ବତନ ଭାରତୀୟ ଅଧିନାୟକ ସୌରଭ ଗାଙ୍ଗୁଲିଙ୍କୁ ମଧ୍ୟ ଏହି ଗ୍ରାଣ୍ଡ ବିବାହରେ ଦେଖିବାକୁ ମିଳି ନ ଥିଲା।
