ମେଲବୋର୍ନ, ୩୧ା୧୨- କ୍ରିକେଟ ଅଷ୍ଟ୍ରେଲିଆ (ସିଏ) ଇଲେଭେନ ଅଫ୍ ଦି ଇୟରରେ ଭାରତର ହ୍ବାଇଟ ବଲ୍ ଅଧିନାୟକ ରୋହିତ ଶର୍ମା ଓ ପ୍ରମୁଖ ଅଫ୍ ସ୍ପିନର ଆର. ଅଶ୍ୱିନଙ୍କ ସମେତ ଦେଶର ୪ଜଣ ଖେଳାଳି ସ୍ଥାନ ପାଇଛନ୍ତି। ରୋହିତ ଓ ଅଶ୍ୱିନଙ୍କ ବ୍ୟତୀତ ଉଇକେଟକିପର-ବ୍ୟାଟର ରିଷଭ ପନ୍ତ ଓ ବାମହାତୀ ସ୍ପିନର ଅକ୍ଷର ପଟେଲଙ୍କୁ ଏଥିରେ ସ୍ଥାନ ମିଳିଛି। ରୋହିତଙ୍କ ସହ ଓପନର ଭାବେ ସ୍ଥାନ ପାଇଛନ୍ତି ଶ୍ରୀଲଙ୍କାର ଦିମୁଥ କରୁଣାରନେତ୍। ୩ ନମ୍ବର ଲାଗି ଅଷ୍ଟ୍ରେଲିଆନ ବ୍ୟାଟର ମାର୍ନସ ଲାବୁସେନେଙ୍କୁ ବଛା ଯାଇଛି। ଷ୍ଟ୍ରେଲିଆର ଏକମାତ୍ର ଖେଳାଳି ଭାବେ ଲାବୁସେନଙ୍କୁ ଏହି ଦଳରେ ସ୍ଥାନ ପାଇଛନ୍ତି। ବ୍ୟାଟିଂ ଅର୍ଡରରେ ତାଙ୍କ ପଛକୁ ପଛ ରହିଛନ୍ତି ଇଂଲଣ୍ଡ ଟେଷ୍ଟ ଅଧିନାୟକ ଜୋ ରୁଟ୍, ପାକିସ୍ତାନର ଫାଓ୍ବାଦ ଆଲାମ ଓ ପନ୍ତ।
୨୦୨୧ରେ ରୁଟ୍ଙ୍କ ପରେ ରୋହିତ ସବୁଠାରୁ ଅଧିକ ରନ ସଂଗ୍ରହ କରିଛନ୍ତି। ସେ ଏକାଧିକ ଥର ଦଳକୁ ଭଲ ଆରମ୍ଭ ଦେବା ସହ ଆକର୍ଷଣୀୟ ଶତକ ମଧ୍ୟ ହାସଲ କରିପାରିଛନ୍ତି। ରୋହିତ ଶେଷ କରିଥିବା ତାଙ୍କ ୧୯ଟି ଇିନଂସ ମଧ୍ୟରୁ ୧୪ଟିରେ ୨୦ କିମ୍ବା ତଦୁର୍ଦ୍ଧ୍ୱ ରନ ସଂଗ୍ରହ କରିଛନ୍ତି। ତାଙ୍କର ଦୁଇଟି ଶତକ ମଧ୍ୟରୁ ଗୋଟିଏ ସେ ଚେନ୍ନାଇରେ ହାସଲ କରିଥିଲେ।
ପନ୍ତଙ୍କୁ ଉଇକେଟକିପର ଭାବେ ଦଳରେ ସ୍ଥାନ ଦିଆଯିବା ପଛରେ ମୁଖ୍ୟ କାରଣ ହେଲା ଚଳିତବର୍ଷ ତାଙ୍କର ବ୍ୟାଟିଂ ରେକର୍ଡ। ସିଡ୍ନୀଠାରେ ୯୭ ରନ, ବ୍ରିସ୍ବେନ୍ଠାରେ ଅପରାଜିତ ୮୯ ଏବଂ ଚେନ୍ନାଇରେ ୯୧ ରନର ପାଳି ପାଇଁ ତାଙ୍କ ନାମ ବିଚାରକୁ ନିଆଯାଇଥିଲା। ବର୍ଷ ଆରମ୍ଭରେ ଅଷ୍ଟ୍ରେଲିଆ ଓ ଇଂଲଣ୍ଡରେ ତାଙ୍କ ପ୍ରଦର୍ଶନ ଏତେ ଉଚ୍ଚ କୋଟୀର ରହିଥିଲା ଯେ, ତାଙ୍କୁ ମହାନ ଉଇକେଟ କିପର ଆଡାମ ଗିଲକ୍ରିଷ୍ଟଙ୍କ ସହିତ ଅନେକ ତୁଳନା କରିଥିଲେ ବୋଲି କ୍ରିକେଟ ଅଷ୍ଟ୍ରେଲିଆ କହିଛି। ସ୍ପିନ ବିଭାଗରେ ଭାରତର ଦୁଇଜଣ ଅଶ୍ୱିନ ଓ ଅକ୍ଷର ସ୍ଥାନ ପାଇଛନ୍ତି। ଅଶ୍ୱିନଙ୍କୁ ଚଳିତ ବର୍ଷ ଟେଷ୍ଟରେ ସର୍ବାଧିକ ଟେଷ୍ଟ ଉଇକେଟହାସଲକାରୀ ବୋଲର ବିବେଚନା କରାଯାଉଛି। ଅକ୍ଷର ଘରୋଇ ମାଟିରେ ଇଂଲଣ୍ଡ ବିପକ୍ଷରେ ଦର୍ଶନୀୟ ପ୍ରଦର୍ଶନ କରିଥିଲେ। ଚଳିତବର୍ଷ ସେ ୭ଟି ମ୍ରାଚରେ ୫୪ ଉଇକେଟ ନେଇଥିବା ବେଳେ ଅକ୍ଷର ୫ଟିରେ ୨୭ ଉଇକେଟ ସଫଳତା ପାଇଛନ୍ତି।
କ୍ରିକେଟ ଅଷ୍ଟ୍ରେଲିଆ ଇଲେଭେନ ଅଫ୍ ୨୦୨୧: ରୋହିତ ଶର୍ମା, ଦୁମୁଥ କରୁଣାରନେତ୍ (ଅଧିନାୟକ), ମାର୍ନସ ଲାବୁସେନ୍, ଜୋ ରୁଟ୍, ଫଓ୍ବାଦ ଆଲାମ, ରିଷଭ ପନ୍ତ (ଉଇକେଟକିପର), ରବିଚନ୍ଦ୍ରନ ଅଶ୍ୱିନ, କାଇଲ ଜେମିସନ, ଅକ୍ଷର ପଟେଲ, ହସଲ ଅଲି, ଶାହିନ ଶାହା ଆଫ୍ରିଦୀ।
