ଲଣ୍ଡନ,୧୩।୮: ଐତିହାସିକ ଲଡର୍ସ କ୍ରିକେଟ ଗ୍ରାଉଣ୍ଡରେ ଖେଳାଯାଉଥିବା ଭାରତ-ଇଂଲଣ୍ଡ ଦ୍ୱିତୀୟ ଟେଷ୍ଟରେ ଇଂଲଣ୍ଡ ଟସ୍ ଜିତି ପ୍ରଥମେ ବୋଲିଂ କରୁଛି। ବୋଲର୍ମାନେ ପ୍ରାରମ୍ଭରେ ଉଇକେଟ ନେବେ ବୋଲି ଦଳ ଆଶା କରିଥିଲେ ହେଁ ଭାରତୀୟ ଓପନର୍ ରୋହିତ ଶର୍ମା ଏବଂ କେଏଲ୍ ରାହୁଲ ସବୁ ଯୋଜନାକୁ ପଣ୍ଡ କରିଦେଇଥିଲେ। ପ୍ରଥମ ଉଇକେଟ ପାଇଁ ଉଭୟ ଶତକୀୟ ଭାଗିଦାରୀ କରିଥିଲେ। ଦୀର୍ଘ ୪୪ ଓଭର ଅପେକ୍ଷା ପରେ ଇଂଲଣ୍ଡକୁ ପ୍ରଥମ ଉଇକେଟ ମିଳିଥିଲା।
ଓପନର୍ ରୋହିତ-ରାହୁଲ ପୂର୍ବରୁ ନଟିଂହାମରେ ଖେଳାଯାଇଥିବା ପ୍ରଥମ ଟେଷ୍ଟ ଇନିଂସରେ ୯୭ ରନ୍ର ଭାଗିଦାରୀ କରିଥିଲେ। ମିଳିତ ଭାବେ ସେମାନେ ଦ୍ୱିତୀୟ ଇନିଂସରେ ୩୭ ରନ୍ ଯୋଡ଼ିଥିଲେ। ଗୁରୁବାର ଲଣ୍ଡନରେ ଖେଳାଯାଉଥିବା ଦ୍ୱିତୀୟ ଟେଷ୍ଟରେ ପଡ଼ିଆକୁ ଓହ୍ଲାଇବା ପରେ ସେ ସମସ୍ତଙ୍କ ହୃଦୟ ଜିତିବାରେ ସଫଳ ହୋଇଛନ୍ତି। ଉଭୟ ଲଡର୍ସ ଟେଷ୍ଟରେ ଯତ୍ନର ସହ ପ୍ରଥମେ ବ୍ୟାଟିଂ କରୁଥିଲେ। ହେଲେ ପରେ ରୋହିତ ଖେଳିବା ଆରମ୍ଭ କରିଥିଲେ। ରାହୁଲ ତାଙ୍କୁ ସମର୍ଥନ କରିଥିଲେ। ଫଳରେ ଉଭୟ ୧୨୬ରନ୍ର ଭାଗିଦାରୀ କରିଥିଲେ। ଜେମ୍ସ ଆଣ୍ଡରସନ ବୋଲ୍ଡ କରିବା ପରେ ୮୩ ରନ୍ରେ ରୋହିତଙ୍କ ଇନିଂସ ଶେଷ ହୋଇଥିଲା।
ତେବେ ଭାରତୀୟ ଟିମ୍ ବିଗତ କିଛି ବର୍ଷ ମଧ୍ୟରେ ଅନେକ ଖେଳାଳିଙ୍କୁ ଓପନର୍ ଭାବେ ସୁଯୋଗ ଦେଇଛି। ହେଲେ ପୂର୍ଣ୍ଣ ଭାବେ ସଫଳତା ମିଳି ନ ଥିଲା। ଶୁଭମନ ଗିଲ ଆହତ ହେବା ପରେ ରୋହିତଙ୍କ ସହ କେଏଲ୍ ରାହୁଲଙ୍କୁ ଖେଳିବାର ସୁଯୋଗ ଦିଆଯାଇଥିଲା। ଏଯାବତ ଉଭୟ ଦଳ ପରିଚାଳନାର ଆଶା ପୂରଣ କରୁଥିବା ଦେଖାଯାଉଛି। ଏଭଳି ସ୍ଥିତିରେ ଭାରତୀୟ ଟେଷ୍ଟ ଦଳ ଏକ ନିର୍ଭରଯୋଗ୍ୟ ଓପନିଂ ଯୋଡ଼ି ପାଇଛନ୍ତି ବୋଲି କୁହାଯାଉଛି।
