ଡର୍ହାମ,୨୦।୭: ଚେଷ୍ଟର ଲେ-ଷ୍ଟ୍ରିଟ୍ସ୍ଥିତ ରିଭରସାଇଡ୍ ଗ୍ରାଉଣ୍ଡରେ ମଙ୍ଗଳବାରଠାରୁ କାଉଣ୍ଟି ସିଲେକ୍ଟ ଏକାଦଶ ଓ ଭାରତୀୟ ଦଳ ମଧ୍ୟରେ ଆରମ୍ଭ ହୋଇଛି ୩ ଦିନିଆ ଅଭ୍ୟାସ ମ୍ୟାଚ୍। ଏହି ଅଭ୍ୟାସ ମ୍ୟାଚ୍ରେ ଫେଲ୍ ମାରିଛନ୍ତି ଟିମ୍ ଇଣ୍ଡିଆର ଷ୍ଟାର ଓପନର ରୋହିତ ଶର୍ମା ଓ ଟେଷ୍ଟ ସ୍ପେଶାଲିଷ୍ଟ ଚେତେଶ୍ୱର ପୂଜାରା। ଟସ୍ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲା ଭାରତୀୟ ଦଳ। ଅଧିନାୟକ ବିରାଟ କୋହଲି ଓ ଉପ ଅଧିନାୟକ ଅଜିଙ୍କ୍ୟ ରାହାନେଙ୍କ ଅନୁପସ୍ଥିତିରେ ଅଧିନାୟକ ଭାର ସମ୍ଭାଳୁଥିବା ରୋହିତ ମାତ୍ର ୯ ରନ କରି ଆଉଟ୍ ହୋଇଥିଲେ। ସେହିଭଳି ମାତ୍ର ୨୧ ରନ୍ କରିବାକୁ ସକ୍ଷମ ହୋଇଥିଲେ ପୂଜାରା। ଅବଶ୍ୟ ଡବ୍ଲ୍ୟୁଟିସି ଫାଇନାଲରେ ସମାଲୋଚିତ ହେବ ପରେ ତାଙ୍କ ଷ୍ଟ୍ରାଇକ୍ରେଟରେ କିଛି ସୁଧାର ଆସିଛି। ସେ ୪୭ ବଲ ଖେଳି ୨ ଚୌକା ଲଗାଇଥିଲେ।
ରିପୋର୍ଟ ଲେଖା ହେବା ସୁଦ୍ଧା ୫୪ ଓଭରରେ ୪ ଉଇକେଟ କ୍ଷତିରେ ଭାରତ ୧୭୦ ରନ୍ କରିଛି। ଦଳ ପାଇଁ ମୟଙ୍କ ଅଗ୍ରଓ୍ବାଲ ୨୮ ଓ ହନୁମା ବିହାରୀ ୨୪ ରନ୍ କରି ପ୍ୟାଭିଲିଅନ ଫେରିଥିବାବେଳେ ୫୬ ରନ୍ରେ ଖେଳୁଛନ୍ତି ଲୋକେଶ ରାହୁଲ। ଉଲ୍ଲେଖଯୋଗ୍ୟ, ଅଗଷ୍ଟ ୪ ତାରିଖରୁ ଆରମ୍ଭ ହେବାକୁ ଯାଉଥିବା ଇଂଲଣ୍ଡ ବିପକ୍ଷ ୫ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ ପୂର୍ବରୁ ଏହା ଟିମ୍ ଇଣ୍ଡିଆ ପାଇଁ ଏକମାତ୍ର ଅଭ୍ୟାସ ମ୍ୟାଚ୍।
