ନୂଆଦିଲ୍ଲୀ : ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ ଚାମ୍ପିୟନ ମୁମ୍ବାଇ ଇଣ୍ଡିଆନ୍ସର ନେତୃତ୍ୱ ନେଇଥିବା ରୋହିତ ଶର୍ମାଙ୍କ ଫିଟ୍ନେସ୍କୁ ନେଇ ଆଲୋଚନା ଜୋର ଧରିଛି। ବିଶେଷ କରି ଅଷ୍ଟ୍ରେଲିଆ ଗସ୍ତ ପାଇଁ ଭାରତୀୟ ଦଳରେ ତାଙ୍କୁ ପ୍ରଥମେ ସ୍ଥାନିତ କରା ନ ଯିବା ଏବଂ ପରେ କେବଳ ଟେଷ୍ଟ ସିରିଜ ପାଇଁ ସାମିଲ କରାଯିବାକୁ ନେଇ ଚର୍ଚ୍ଚା ହେଉଛି। ମାତ୍ର ଏବେ ସେ ସମ୍ପୂର୍ଣ୍ଣ ଫିଟ୍ ନାହାନ୍ତି, ମାତ୍ର ୭୦ ପ୍ରତିଶତ ଫିଟ୍ ଅଛନ୍ତି ବୋଲି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ସଭାପତି ସୌରଭ ଗାଙ୍ଗୁଲି ପ୍ରକାଶ କରିଛନ୍ତି। ସେଥିପାଇଁ ତାଙ୍କୁ ଦିନିକିଆ ଏବଂ ଟି୨୦ ଦଳରେ ସାମିଲ କରାଯାଇନାହିଁ, କେବଳ ଟେଷ୍ଟ ଦଳରେ ନିଆ ଯାଇଛି ବୋଲି ସୌରଭ କହିଛନ୍ତି। ଅକ୍ଟୋବର ୧୮ରେ ରୋହିତ ମୁମ୍ବାଇ ଇଣ୍ଡିଆନ୍ସର କିଙ୍ଗ୍ସ ଇଲେଭେନ ପଞ୍ଜାବ ବିପକ୍ଷ ମ୍ୟାଚ ଅବସରରେ ଆହତ ହୋଇଥିଲେ। ଏହା ପରବର୍ତ୍ତୀ ୪ଟି ମ୍ୟାଚରେ ସେ ଖେଳି ନ ଥିଲେ। ତେବେ ଫାଇନାଲକୁ ମିଶାଇ ମୁମ୍ବାଇର ଶେଷ ୩ଟି ମ୍ୟାଚରେ ସେ ଖେଳିଥିଲେ ଏବଂ ମୁମ୍ବାଇକୁ ରେକର୍ଡ ୫ମ ଥର ଟାଇଟଲ ବିଜୟୀ କରାଇଥିଲେ।
ଜାତୀୟ ଚୟନକର୍ତ୍ତାମାନେ ପ୍ରଥମେ ସମ୍ପୂର୍ଣ୍ଣ ଅଷ୍ଟ୍ରେଲିଆ ଟୁର୍ରୁ ରୋହିତଙ୍କୁ ବାଦ୍ ଦେଇଥିଲେ। ପରେ ତାଙ୍କୁ କେବଳ ଟେଷ୍ଟ ସିରିଜ ପାଇଁ ଦଳରେ ନିଆଯାଇଥିଲା। ଅଷ୍ଟ୍ରେଲିଆ ଯିବା ପୂର୍ବରୁ ସେ ବେଙ୍ଗାଲୁରୁସ୍ଥିତ ଜାତୀୟ କ୍ରିକେଟ ଏକାଡେମୀରେ ରିହାବିଲିଟେଶନରେ ରହିବେ। ଡିସେମ୍ବର ୧୭ରେ ପ୍ରଥମ ଟେଷ୍ଟ ହେଉଥିବାରୁ ଅଷ୍ଟ୍ରେଲିଆ ଯିବା ପୂର୍ବରୁ ତାଙ୍କୁ ଫିଟ୍ନେସ୍ ଟେଷ୍ଟ ଦେବାକୁ ପଡ଼ିବ। ଭାରତୀୟ ଦଳର ଅନ୍ୟତମ ସଦସ୍ୟ ରିଦ୍ଧିମାନ ଶାହା ମଧ୍ୟ ହାମ୍ଷ୍ଟ୍ରିଙ୍ଗ ଇଞ୍ଜୁରିରୁ ମୁକୁଳୁଛନ୍ତି। ସେ ନିଜ ଫ୍ରାଞ୍ଚାଇଜ୍ ଦଳ ସନ୍ରାଇଜର୍ସ ହାଇଦ୍ରାବାଦର ଶେଷ ୨ଟି ମ୍ୟାଚରେ ଖେଳିପାରି ନ ଥିଲେ। ଖେଳାଳିଙ୍କ ଆହତ ସମସ୍ୟା ଉପରେ ବିସିସିଆଇ ନଜର ରଖିଛି ଏବଂ ସେମାନଙ୍କ ଫିଟ୍ନେସ ପାଇଁ କାର୍ଯ୍ୟ କରୁଛି। ଯେଉଁମାନେ ଆହତ ସମସ୍ୟା ସମ୍ପର୍କରେ ଜାଣି ନାହାନ୍ତି ବିଭିନ୍ନ କଥା କହୁଛନ୍ତି। ଏ ଦିଗରେ ବିସିସିଆଇ, ଭାରତୀୟ ଫିଜିଓ, ଜାତୀୟ କ୍ରିକେଟ ଏକାଡେମୀ (ଏନସିଏ) କାର୍ଯ୍ୟକରୁଛି। ଟେଷ୍ଟ ବେଳକୁ ରିଦ୍ଧିମାନ ଫିଟ୍ ହୋଇଥିବେ। ତେଣୁ ସେ ଦଳସହ ଅଷ୍ଟ୍ରେଲିଆ ଯାତ୍ରା କରିଛନ୍ତି ବୋଲି ଗାଙ୍ଗୁଲି କହିଛନ୍ତି। ଭାରତୀୟ କ୍ରିକେଟ ଦଳ ଗୁରୁବାର ଅଷ୍ଟ୍ରେଲିଆରେ ପହଞ୍ଚତ୍ବାପରେ କ୍ୱାରାଣ୍ଟାଇନ୍ ଅବଧି ଆରମ୍ଭ ହୋଇଛି।
