ଧର୍ମଗଡ଼,୨।୩(ଘାସିରାମ ଜଗତ): କଳାହାଣ୍ଡି ଜିଲା ଧର୍ମଗଡ଼ ଜଗନ୍ନାଥ ପଡାର ଏକ ଭଡା ଘରେ ନକଲି ବିଦେଶୀ ମଦ ପ୍ରସ୍ତୁତ କରାଯାଉଥିବା ସୂଚନା ପାଇ ସୋମବାର ସକାଳୁ ଅବକାରୀ ବିଭାଗ ପକ୍ଷରୁ ଅତର୍କିତ ଚଢ଼ାଉ କରାଯାଇଥିଲା। ଏହି ସମୟରେ ସେଠାରୁ ୩୫ ଲିଟର ଅପମିଶ୍ରିତ ନକଲି ବିଦେଶୀ ମଦ, ମଦ ପାଇଁ ବ୍ୟବହୃତ ୬୨ଟି ବୋତଲ, ୮୨୦ଟି ଠିପି ଓ ୧୫୫ଟି ଲେବଲ ଜବତ କରିଥିବାବେଳେ ଏହି ଘଟଣାରେ ସଂପୃକ୍ତ ୩ଜଣଙ୍କୁ ଗିରଫ କରାଯାଇଛି। ଅଭିଯୁକ୍ତମାନେ ହେଲେ ବିହାରର ପବନ କୁମାର ଓ ଶୈଳେନ୍ଦ୍ର ସିଂ ଏବଂ ଝାରଖଣ୍ଡ ର ଅଜୟ କୁମାର । ଏନେଇ ଅବକାରୀ ବିଭାଗ ଏକ ମାମଲା ନଂ( ୨୧୭/୨୫-୨୬) ରୁଜୁ କରି ତିନି ଜଣଙ୍କୁ କୋର୍ଟ ଚାଲାଣ କରିଥିବା ସୂଚନା ମିଳିଛି। ଭବାନୀପାଟଣା ସଦର ଅବକାରୀ ଇନ୍ସପେକ୍ଟର ହେମକାନ୍ତ ସୁନାଙ୍କ ନେତୃତ୍ୱରେ ଏହି ଚଢ଼ାଉରେ ଧର୍ମଗଡ ଅବକାରୀ ଅଧିକାରୀ ଅରୁଣ କୁମାର ଯୋଶୀ, ଭବାନୀପାଟଣା ମୋବାଇଲ ୟୁନିଟ ଅବକାରୀ ଅଧିକାରୀ ବିଜୟ ଭୂଷଣ ନାୟକ, ଧର୍ମଗଡ଼ ଅବକାରୀ ଅଧିକାରିଣୀ ପ୍ରତିମା ବେହେରା, ପ୍ରମୁଖ ସାମିଲ ହୋଇଥିଲେ।
ପ୍ରକାଶ ଯେ,ଗତ ଫେବୃଆରୀ ୨୪ରେ ଜୁନାଗଡ଼ର ମଧ୍ୟ ଏହି ସମାନ ଘଟଣାରେ ଘଟଣାରେ ୨ ଜଣଙ୍କୁ ଗିରଫ କରାଯାଇଥିବାବେଳେ ସେମାନଙ୍କ ଠାରୁ ୩୩ ଲିଟର ନକଲି ବିଦେଶୀ ମଦ ସହ ନକଲି ବିଦେଶୀ ମଦ ଠିପି,ଖାଲି ବୋତଲ ,ଇଏଲ (ସରକାରୀ ଲୋଗୋ ଥିବା ଷ୍ଟିକର ) ଜବତ କରାଯାଇଥିଲା। ସବୁଠାରୁ ଆଶ୍ଚର୍ଯ୍ୟର ବିଷୟ ହେଲା ଉପରୋକ୍ତ ସମସ୍ତ ଅଭିଯୁକ୍ତ ସ୍ଥାନୀୟ ବିଦେଶୀ ମଦ ଦୋକାନରେ କାମ କରୁଥିବାବେଳେ ଏହି ମଦକୁ ସେମାନେ କୁଆଡେ ନେଇ ବିକ୍ରି କରୁଥିଲେ ତାହାକୁ ନେଇଁ ଏବେ ପ୍ରଶ୍ନବାଚୀ ସୃଷ୍ଟି ହୋଇଛି। ତେଣୁ ଅଭିଯୁକ୍ତମାନେ କାମ କରୁଥିବା ଦୋକାନ ଗୁଡିକୁ ଯାଞ୍ଚ କରାଗଲେ ପ୍ରକୃତ ରହସ୍ୟ ସାମ୍ନାକୁ ଆସନ୍ତା ବୋଲି ସାଧାରଣରେ ମତ ପ୍ରକାଶ ପାଇଛି।
