ଦେଶରେ କୋର୍ଟର ସ୍ଥାନ ବହୁତ ଉପରେ। ଏହାର ସରକାରଙ୍କୁ ନିର୍ଦ୍ଦେଶ ଦେବାର ଶକ୍ତି ଥାଏ। କୋର୍ଟର ଫଇସଲାକୁ ସମସ୍ତେ ମାନିବାକୁ ବାଧ୍ୟ। ତେବେ କୋର୍ଟକୁ ଆସୁଥିବା ମାମଲାକୁ ଦୁଇଜଣ ଓକିଲ ଲଢନ୍ତି। ଜଣେ ମାମଲାର ପକ୍ଷରେ ଲଢନ୍ତି ତ ଅନ୍ୟଜଣଙ୍କ ମାମଲା ବିପକ୍ଷରେ ଲଢନ୍ତି। ଉଭୟଙ୍କ ଦଲିଲ ଶୁଣିବା ପରେ ଜଜ୍ ନିଷ୍ପତ୍ତି ନିଅନ୍ତି। କିନ୍ତୁ ଅନେକ ସମୟରେ ଦେଖାଯାଉଛି ଧନୀକ ବ୍ୟକ୍ତିମାନେ ଜଜ୍ ଓ ଓକିଲଙ୍କୁ ଟଙ୍କାର ପ୍ରଲୋଭନ ଦେଖାଇ ରାୟକୁ ନିଜ ସପକ୍ଷରେ କରାଇ ନିଅନ୍ତି। କେବେ କେବେ ଏମିତି ବି ହୁଏ ଜୀବନ ଭୟରେ ଜଜ୍ ଓ ଓକିଲ ଦୋଷୀ ସପକ୍ଷରେ ଯିବାକୁ ବାଧ୍ୟ ହୁଅନ୍ତି। ହେଲେ ଖୁସିର ଖବର ଏଭଳି ଘଟଣା ଆଗକୁ ଆଉ ଘଟିବ ନାହିଁ। କାରଣ ଖୁବ୍ ଶୀଘ୍ର ଜଜ୍ ଓ ଓକିଲଙ୍କ ସ୍ଥାନରେ ବସିବେ ରୋବୋ। ଆଉ ସମସ୍ତେ ଜାଣନ୍ତି ଯେ, ମେସିନ୍ ଲାଞ୍ଚ ନିଏ ନାହିଁ କି ତାକୁ କାହାର ଭୟ ନ ଥାଏ। ଅନେକ ଆଇନ ବିଶେଷଜ୍ଞ ଏହାକୁ ସ୍ବାଗତ କରିଛନ୍ତି। ସେମାନଙ୍କ ମତରେ ଏଆଇ(ଆର୍ଟିଫିସିଆଲ ଇଣ୍ଟେଲିଜେନ୍ସ) ମଣିଷଠୁ ଭଲ ନିଷ୍ପତି ନେଇପାରିବେ। ସେମାନେ କୌଣସି ନିଷ୍ପତ୍ତି ନେବାରେ ଦ୍ୱନ୍ଦ୍ୱରେ ପଡିବେନି। ଏବେ ୟୁକେର କୋର୍ଟରେ ପ୍ରଥମ କରି ଏହାର ଟ୍ରାଏଲ କରାଯାଉଛି। ଏହାପରେ ଅନ୍ୟଦେଶ ବି ଏହାକୁ ଆପଣେଇବେ। ଅନେକେ ଏହି ରୋବୋ ଜଜ୍ ଓ ଓକିଲକୁ ବିରୋଧ ବି କରୁଛନ୍ତି।
