ଢେଙ୍କାନାଳ ଅଫିସ,୬।୮: ଢେଙ୍କାନାଳ ସହର କାଞ୍ଚନ ବଜାରରେ ଥିବା ମଣିପୁରମ୍ ଘରୋଇ ସୁନା ଋଣ ପ୍ରଦାନକାରୀ ସଂସ୍ଥାରେ ଶନିବାର ସକାଳ ସାଢ଼େ ୯ଟାରେ ଡକାୟତି ଉଦ୍ୟମ ହୋଇଛି। ସଂସ୍ଥା କାର୍ଯ୍ୟାଳୟ ଖୋଲିବା ପରେ ୪ଜଣ ଦୁର୍ବୃତ୍ତ ୨ଟି ବାଇକ୍ରେ ଆସି କାର୍ଯ୍ୟାଳୟ ଆଗରେ ପହଞ୍ଚିଥିଲେ। ଦୁର୍ବୃତ୍ତମାନେ ମାକ୍ସ ଓ ଟୋପି ପିନ୍ଧି ଥିବା ବେଳେ କାନ୍ଧରେ ଏୟାର ବ୍ୟାଗ ସହ ହାତରେ ରିଭଲଭର ଧରି ଭିତରକୁ ପଶିଥିଲେ। ଜଣେ କାର୍ଯ୍ୟାଳୟ ସାମ୍ନାରେ ଜଗି ରହିଥିଲେ। ଅନ୍ୟ ୩ଜଣ କାର୍ଯ୍ୟାଳୟ ଭିତରକୁ ଯାଇ ଶାଖା ପରିଚାଳକ ଦେବାନନ୍ଦ ସାସ୍ମଲଙ୍କ ମୁଣ୍ଡରେ ବନ୍ଧୁକ ଲଗାଇ ସୁନା ଓ ଟଙ୍କା ରଖାଯାଇଥିବା ଷ୍ଟ୍ରଙ୍ଗ୍ରୁମ ଚାବି ମାଗିଥିଲେ। ଏହି ସମୟରେ ଅଜାଣତରେ ଦେବାନନ୍ଦଙ୍କ ଗୋଡ଼ ସାଇରନ ସୁଇଚ୍ରେ ବାଜିଯିବାରୁ ସାଇରନ ହଠାତ୍ ବାକି ଉଠିଥିଲା। ହେଲେ ଦୁର୍ବୃତ୍ତମାନେ ଶାଖା ପରିଚାଳକ ଏବଂ କର୍ମଚାରୀଙ୍କୁ ମାଡ଼ ମାରି ଫେରାର ହୋଇଯାଇଥିଲେ । ଖବର ପାଇ ସଦର ଏସ୍ଡିପିଓ ବିକାଶ ବେଉରା, ଟାଉନ ଥାନା ଅଧିକାରୀ ରାଜେନ୍ଦ୍ର ମହାପାତ୍ର ପୋଲିସ ଟିମ୍ ସହ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲେ। କାର୍ଯ୍ୟାଳୟରେ ଲାଗିଥିବା ସିସିଟିଭି କ୍ୟାମେରା ପୋଲିସ୍ ଯାଞ୍ଚ କରୁଛି।
