ଘଟଗାଁ,୫ା୫(ଡି.ଏନ.ଏ.): କେନ୍ଦୁଝର ଜିଲା ଘଟଗାଁ ବ୍ଲକ୍ ବସନ୍ତପୁର ପଞ୍ଚାୟତରରେ ଏମ୍ଜିଏନ୍ଆର୍ଇଜିଏସ୍ (ମହାତ୍ମା ଗାନ୍ଧୀ ନିଶ୍ଚିତ ଗ୍ରାମୀଣ କର୍ମ ନିଯୁକ୍ତି ଯୋଜନା)ବାଟବଣା ହୋଇଛି। ଏଠାରେ ଶ୍ରମିକଙ୍କୁ ଅଣଦେଖା କରାଯାଇ ଜେସିବି ଓ ଟ୍ରାକ୍ଟର ଦ୍ୱାରା ମାଟି, ମୋରମ ପକାଯାଇଥିବା ଅଭିଯୋଗ ହୋଇଛି। ଏସବୁ କାର୍ଯ୍ୟ ଦିନ ଦ୍ୱିପ୍ରପହରରେ କରାଯାଉଥିବା ବେଳେ ଜିଆରଏସ, ପିଇଓ ଓ ବ୍ଲକ୍ ପ୍ରଶାସନ ପାଖରେ ଖବର ନାହିଁ।
ପ୍ରକାଶ ଯେ, ପତ୍ର ୩୦୩ ଅନୁଯାୟୀ ବାସନ୍ତପୁର ପଞ୍ଚାୟତ ଅନ୍ତର୍ଗତ ଉକୁଛାବେଡ଼ା ଚତୁରୀ ସାହିଠାରୁ କ୍ରସର ରୋଡ଼ ରାସ୍ତା ସାହି ରାସ୍ତା କାର୍ଯ୍ୟ ଆର୍ଥିକ ବର୍ଷ ୨୦୨୧-୨୨ ଏମଜିଏନ୍ଆର୍ଇଜିଏସରେ ୧୦ ଲକ୍ଷ ଟଙ୍କା ବ୍ୟୟ ବରାଦ ହୋଇଥିଲା। ମାତ୍ର ସୂଚନା ଫଳକରେ କାର୍ଯାରମ୍ଭ ତାରିଖ ଉଲ୍ଲେଖ ହୋଇନାହିଁ। କିମ୍ବା ଅନ୍ୟ କୌଣସି ସୂଚନା ଠିକ୍ ଭାବେ ଦିଆଯାଇନାହିଁ। ଉକ୍ତ କାର୍ଯ୍ୟର କୋଡ଼ ନଂ. ୨୪୦୩୦୦୪୦୦୬/ଆରସି/୧୦୪୭୮୯୯୧ ଦ୍ୱାରା ଏମ୍ଜିଏନ୍ଆର୍ଇଜିଏସ ୱେବ ସାଇଟ୍ରୁ କାର୍ଯ୍ୟଟି ଗତ ୧୩ ଜୁଲା ୨୧ ପ୍ରକଳ୍ପ ବ୍ୟୟ ମଞ୍ଜୁରୀ ଆଧାରରେ କରାଯାଇ ୧୦ ଦିନ ମଧ୍ୟରେ ଅର୍ଥାତ ୨୨ ଜୁଲାଇ ୨୧ରେ ୪ ଲକ୍ଷ ୫୯ହଜାର ୬୩୩ ଖର୍ଚ୍ଚ କରାଯାଇଥିବା ଜଣାପଡ଼ିଛି। ଦୀର୍ଘ ୯ ମାସ କାମ ବନ୍ଦ ପରେ ଗତ ସପ୍ତାହରେ ଗୋଟିଏ ଜେସିବି ମେଶିନ ଓ ୨ ଟ୍ରାକ୍ଟର ଲଗାଇ ଏକ ପୋଖରୀ ହୁଡ଼ାରୁ ମାଟିମିଶା ମୋରମ ଉକ୍ତ ରାସ୍ତା ବିଛେଇ ଦିଆଯାଇଛି। ଯାହାକୁ ନେଇ ସ୍ଥାନୀୟ ଶ୍ରମିକମାନଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି। କାର୍ଯ୍ୟ ଚାଲୁଥିବା ସମୟରେ ଶ୍ରମିକମାନଙ୍କ ଫଟୋ ସକାଳେ ସନ୍ଧ୍ୟାରେ ଉଠାଯାଇ ଏହାକୁ ଏମ୍ଜିଏନ୍ଆର୍ଇଜିଏସ ସାଇଟ୍ରେ ଅପଲୋଡ଼ ପାଇଁ ନିର୍ଦ୍ଦେଶ ଥିବାବେଳେ ଏହାକୁ ଉଲଂଘନ କରାଯାଇଛି। ସମ୍ପୃକ୍ତ ପଞ୍ଚାୟତ ନିର୍ବାହୀ ଅଧିକାରୀ ମନୋରଞ୍ଜନ ବେହେରାଙ୍କୁ ପଚାରିବାରୁ ସେ କାର୍ଯ୍ୟରେ ନୂତନ ଭାବେ ଯୋଗ ଦେଇଛନ୍ତି। ଏ ବାବଦରେ ଜାଣି ନ ଥିବା ପ୍ରକାଶ କରିଥିଲେ। ଏ ସଂକ୍ରାନ୍ତରେ ପୂର୍ବତନ ପିଇଓ ବୁଦ୍ଧଦେବ ମହାକୁଡ଼ଙ୍କୁ ପଚାରିବାରୁ ସେ ଏହା ଗତବର୍ଷର କାର୍ଯ୍ୟ ଏଣୁ ଏବେ କାମ ବିଷୟରେ ସେ ଜାଣି ନ ଥିବା କହିଥିଲେ। ପଞ୍ଚାୟତର ଜିଆରଏସ୍ଙ୍କୁ ପଚାରିବାରୁ ସେ ମଧ୍ୟ ନୂଆ ଆସିଥିବା ଓ ଏ କାର୍ଯ୍ୟ ପାଇଁ ଡିମାଣ୍ଡ ହୋଇ ନ ଥିବା ସୂଚନା ଦେଇଥିଲେ।
