ଜି.ଉଦୟଗିରି,୧୪ା୧(ଶିଶିର ପଟ୍ଟନାୟକ/ଚିନ୍ମୟ କୁମାର ସେଠୀ): କନ୍ଧମାଳ ଏମ୍ପି ସୁକାନ୍ତ ପାଣିଗ୍ରାହୀ ବୁଧବାର ଜି.ଉଦୟଗିରି ପରିଷଦ ଅନ୍ତର୍ଗତ ଦୁଇଟି ପିଚୁ ରାସ୍ତା ନିର୍ମାଣ ପ୍ରକଳ୍ପର ଶିଳାନ୍ୟାସ କରିଥିବା ଦେଖିବାକୁ ମିଳିଛି। ଜି.ଉଦୟଗିରି ବିଜ୍ଞାପିତ ଅଞ୍ଚଳ ପରିଷଦ ଅନ୍ତର୍ଗତ ପାହାଡ଼ ସାହି ଏବଂ ବାଲୁପାଙ୍ଗା ଗ୍ରାମକୁ ପିଚୁ ରାସ୍ତା ନିର୍ମାଣ ପାଇଁ କରାଯାଇଥିବା ଦୀର୍ଘଦିନର ଦାବି ନେଇ ଧରିତ୍ରୀ ଖବରକାଗଜରେ ଖବର ପ୍ରକାଶ ପାଇଥିଲା। ପରିଷଦ ଅଧ୍ୟକ୍ଷା ସୁଶ୍ରୀ ଦେବସ୍ମିତା ଶତପଥୀ,ଉପାଧ୍ୟକ୍ଷ ସନ୍ତୋଷ କୁମାର ବାଘ, କାଉନ୍ସିଲର ଜାକେଶ କୁମାର ପ୍ରଧାନ, ଦୀପକ କୁମାର ନାୟକ, କାର୍ଯ୍ୟନିର୍ବାହୀ ଅଧିକାରୀ ଆଶୁତୋଷ ଗୌରବ କର, କନିଷ୍ଠ ଯନ୍ତ୍ରୀ ସୁଶାନ୍ତ ସାହୁ ଓ ଏମଇ ଅସିତ୍ କୁମାର ସେଠୀଙ୍କ ବିକାଶମୂଳକ କାର୍ଯ୍ୟ କରିବା ତତ୍ପରତା ଯୋଗୁ ଉକ୍ତ ରାସ୍ତାଗୁଡ଼ିକ ନିର୍ମାଣ ହେବାକୁ ଯାଉଛି।
ସୂଚନାନୁସାରେ, ୮ ନମ୍ବର ଓ୍ବାର୍ଡ ପାହାଡ଼ ସାହି ରାସ୍ତା ବ୍ଲକ ଛକଠାରୁ ନୂଆସାହି ଚର୍ଚ୍ଚ ପର୍ଯ୍ୟନ୍ତ ପ୍ରାୟ ୧୪ ଲକ୍ଷ ଟଙ୍କା ଓ ୧୩ ନମ୍ବର ଓ୍ବାର୍ଡ ବାଲୁପାଙ୍ଗା ରାସ୍ତା ପୂର୍ତ୍ତ ବିଭାଗ ମୁଖ୍ୟ ସଡ଼କଠାରୁ ଗ୍ରାମ ପର୍ଯ୍ୟନ୍ତ ଦେଢ଼ କିଲୋମିଟର ପାଇଁ ପ୍ରାୟ ୫୨ ଲକ୍ଷ ବ୍ୟୟରେ ପିଚୁ ରାସ୍ତା ନିର୍ମାଣ ପାଇଁ ବିଶେଷ ରୀତିନୀତିରେ ପୂଜାର୍ଚ୍ଚନା ସହ କନ୍ଧମାଳ ଏମ୍ପି ସୁକାନ୍ତ ପାଣିଗ୍ରାହୀ ଭିତ୍ତିପ୍ରସ୍ତର ଦେଇଛନ୍ତି।
ଏହି କାର୍ଯ୍ୟକ୍ରମରେ ସ୍ଥାନୀୟ ବିଧାୟକ ପ୍ରଫୁଲ୍ଲ ଚନ୍ଦ୍ର ପ୍ରଧାନ କୌଣସି କାରଣ ବଶତଃ ଆସିପାରି ନ ଥିବା ବେଳେ ସ୍ଥାନୀୟ କାଉନସିଲର ସିଦ୍ଧେଶ୍ୱରୀ ନାୟକ, ନନ୍ଦିତା ପ୍ରଧାନ, ମୋନାଲିସା ଦଳବେହେରା, କୁନ୍ତିମା ମଲ୍ଲିକ,ପରିଷଦର କର୍ମଚାରୀ, ଏମ୍ପି ପ୍ରତିନିଧି ଦେବବ୍ରତ ସାହୁ, ଉଦ୍ଦେଶନ ପ୍ରଧାନ, ରସାନନ୍ଦ ନାୟକଙ୍କ ସମେତ ସାହିବାସିନ୍ଦା ଉପସ୍ଥିତ ଥିଲେ। ଏହି ଅବସରରେ ଏମ୍ପି, ଅଧ୍ୟକ୍ଷା, ଉପାଧ୍ୟକ୍ଷ, କାର୍ଯ୍ୟନିର୍ବାହୀ ଅଧିକାରୀ, କନିଷ୍ଠ ଯନ୍ତ୍ରୀ ପରିଷଦର ସମସ୍ତଙ୍କୁ କାଉନସିଲର ଓ ସାହି ବାସିନ୍ଦା ଧନ୍ୟବାଦ ଜଣାଇଛନ୍ତି।
