ମୁମ୍ବାଇ,୧୭।୧:ସଡକ ଦୁର୍ଘଟଣା ପରେ ଭାରତୀୟ କ୍ରିକେଟର ରିଷଭ ପନ୍ତଙ୍କ ଗୋଡ ଅସ୍ତ୍ରୋପଚାର କରାଯାଇଛି। ତାଙ୍କର ଅସ୍ତ୍ରୋପଚାର ସଫଳ ହୋଇଛି ଏବଂ କ୍ରିକେଟ ପଡ଼ିଆକୁ ଫେରିବା ପାଇଁ ତାଙ୍କର ଯାତ୍ରା ମଧ୍ୟ ଆରମ୍ଭ ହୋଇଛି ବୋଲି ସେ ସୋସିଆଲ ମିଡିଆରେ ସୂଚନା ଦେଇଛନ୍ତି। ଏହା ପରେ ପନ୍ତ ସଡ଼କ ଦୁର୍ଘଟଣା ପରେ ତାଙ୍କୁ ସାହାଯ୍ୟ କରିଥିବା ସମସ୍ତ ଲୋକଙ୍କୁ ଧନ୍ୟବାଦ ଜଣାଇଛନ୍ତି। ପନ୍ତ ମଧ୍ୟ ଏକ ପୋଷ୍ଟରେ ତାଙ୍କ ଜୀବନ ପଞ୍ଚାଇଥିବା ଦୁଇ ବ୍ୟକ୍ତିଙ୍କ ଫଟୋ ଶେୟାର କରି ଏକ ଭାବପ୍ରବଣ ବାର୍ତ୍ତା ଲେଖିଛନ୍ତି।
ପନ୍ତ ନିଜ ପୋଷ୍ଟରେ ଉଭୟ ରଜତ କୁମାର ଏବଂ ନିଶୁ କୁମାରଙ୍କୁ ଧନ୍ୟବାଦ ଜଣାଇଛନ୍ତି। ପନ୍ତ ଲେଖିଛନ୍ତି ମୁଁ ସମସ୍ତଙ୍କୁ ବ୍ୟକ୍ତିଗତ ଭାବେ ଧନ୍ୟବାଦ ଦେଇ ପାରିବି ନାହିଁ, କିନ୍ତୁ ଦୁର୍ଘଟଣା ସମୟରେ ମୋତେ ସାହାଯ୍ୟ କରିଥିବା ଏବଂ ମୋତେ ହସ୍ପିଟାଲରେ ପହଞ୍ଚାଇଥିବା ଏହି ଦୁଇ ବୀର ରଜତ କୁମାର ଏବଂ ନିଶୁ କୁମାରଙ୍କୁ ଧନ୍ୟବାଦ ଦେବି। ମୁଁ ସର୍ବଦା ଆପଣଙ୍କ ନିକଟରେ ଋଣୀ ରହିବି।
ସୂଚନାଯୋଗ୍ୟ, ରିଷଭ ପନ୍ତଙ୍କ କାର ଦୁର୍ଘଟଣା ପରେ ଦୁଇ ଯୁବକ ରଜତ ଏବଂ ନିଶୁ ପ୍ରଥମେ ତାଙ୍କୁ ବଞ୍ଚାଇବାକୁ ଆସିଥିଲେ। ଦୁହେଁ ପନ୍ତଙ୍କ ଲଗେଜ ପ୍ୟାକ କରି ଡାକ୍ତରଖାନାରେ ପହଞ୍ଚିବାରେ ସାହାଯ୍ୟ କରିଥିଲେ। ଏହା ପରେ ଦୁହେଁ ଦୁର୍ଘଟଣା ସମୟରେ ପନ୍ତଙ୍କ ହଜିଯାଇଥିବା ଚାରି ହଜାର ଟଙ୍କା ମଧ୍ୟ ପୋଲିସକୁ ଦେଇଥିଲେ। ପନ୍ତଙ୍କ ଅବସ୍ଥା ବିପଦରୁ ବାହାରିବା ପରେ ଦୁହେଁ ତାଙ୍କୁ ଭେଟିବା ପାଇଁ ଡାକ୍ତରଖାନାରେ ପହଞ୍ଚିଥିଲେ। ରଜତ ଏବଂ ନିଶୁ ଉତ୍ତରପ୍ରଦେଶର ମୁଜାଫରନଗରର ପୁରକାଜିର ବାସିନ୍ଦା।
