କାଶୀନଗର,୨୩।୧: ଗତ ଡିସେମ୍ବର ୩୧ ତାରିଖରୁ ମିଲରମାନେ ମଣ୍ଡିରୁ ଧାନ କିଣୁ ନ ଥିବା କାଶୀନଗର ବ୍ଲକ ବଥବା ଗ୍ରାମର ଚାଷୀମାନେ ଶୁକ୍ରବାର ଅଭିଯୋଗ କରିଛନ୍ତି । ଏ ନେଇ ବଥବା ଗ୍ରାମର ବହୁ ଚାଷୀ କାଶୀନଗର ବିଡିଓଙ୍କ ଜରିଆରେ ଗଜପତି ଜିଲାପାଳଙ୍କ ଉଦ୍ଦେଶ୍ୟରେ ଏକ ସ୍ମାରକ ପତ୍ର ଦେଇଛନ୍ତି। ସମବାୟ ସମିତି ତରଫରୁ ଚାଷୀମାନଙ୍କୁ ଟୋକନ ମିଳିଥିଲେ ମଧ୍ୟ ମିଲରମାନେ ଧାନ କିଣୁ ନାହାନ୍ତି। ସେମାନଙ୍କୁ ପଚାରିଲେ ଦିଆଯାଇଥିବା ଟାର୍ଗେଟ ସରିଗଲା ଆଉ ଧାନ କିଣିବା ସମ୍ଭବ ନାହିଁ ବୋଲି କହୁଛନ୍ତି। ସମିତିର ସେକ୍ରେଟାରୀ ଟି.ରାଘବ ରାଓ କିନ୍ତୁ କହିଛନ୍ତି ଯେ, ତାଙ୍କ ପାଖରେ ବର୍ତ୍ତମାନ ସୁଦ୍ଧା ୯୦ଟି ଟୋକେନ ରହିଛି, ମିଲର ମାନେ ଧାନ କିଣୁ ନ ଥିବାରୁ ସେ ନିରୂପାୟ।
ସେକ୍ରେଟାରୀଙ୍କ ସୂଚନା ଅନୁଯାୟୀ, ବଥବା ସମବାୟ ସମିତିକୁ ମୋଟ ୭୬୩୫ କୁଇଣ୍ଟାଲ ଧାନ କିଣିବାକୁ ଟାର୍ଗେଟ ଦିଆଯାଇଥିଲା। ସମିତି ଅଧୀନରେ ଥିବା କିତିଙ୍ଗି, ଗୋରିବନ୍ଧା, ବଥବା, ଆରକେପୁର, ବୁଦୁରା ଓ ଇଦୁଡିରୁ ମିଲରମାନେ ଉକ୍ତ ପରିମାଣର ଧାନ କିଣିବା କଥା, କିନ୍ତୁ ଏହା ହେଉନାହିଁ। କ୍ରମିକ ସଂଖ୍ୟା ରକ୍ଷା ନ କରି ସେମାନଙ୍କ ବନ୍ଧୁବାନ୍ଧବ ଚାଷୀଙ୍କଠାରୁ ଆଗ ଧାନ କିଣୁଛନ୍ତି। ପ୍ରଥମେ ଗୋରିବନ୍ଧା, ଖୁରିଙ୍ଗା, ଖାଣ୍ଡବା, କିଡିଙ୍ଗାରେ ଥିବା ମିଲମାନଙ୍କୁ ଧାନ କିଣିବାକୁ ନିର୍ଦ୍ଦେଶ ଦିଆଯାଇଥିଲା। ତଥାପି ଚାଷୀ ମାନଙ୍କ ଠାରୁ ଧାନ କିଣାଯାଉ ନାହିଁ। ବିକ୍ରି ସାରିଥିବା ଚାଷୀମାନେ ଜଣାଇଛନ୍ତି ଯେ, ମଣ୍ଡିରେ ଧାନ କୁଇଣ୍ଟାଲ ପିଛା ୧୮୬୮ ଟଙ୍କା ରହିଛି। ପ୍ରତି ବର୍ଷ ୮୦ କେଜି ଧାନବସ୍ତା ଦିଅନ୍ତି, ଚଳିତ ବର୍ଷ କିନ୍ତୁ ୮୧.୫ କେଜି ଧାନ ମିଲରମାନେ ନେଇ ଯାଉଛନ୍ତି। ଚାଷିମାନଙ୍କୁ ମିଲରମାନେ ଗନି ବ୍ୟାଗ ଯୋଗାଇଦେବା ନିୟମ ଥିଲେ ବି ତାହା ଦେଉନାହାନ୍ତି। ଓଲଟା ଗନି ବ୍ୟାଗ ଓ ପରିବହନ ଖର୍ଚ୍ଚ କହି ପ୍ରତି ବସ୍ତାକୁ ୪୦ ଟଙ୍କା କାଟି ଚାଷୀଙ୍କୁ ଦେଉଛନ୍ତି। ଏ ନେଇ ବଥବା ସମବାୟ ସମିତି ପାରାଳାଖେମୁଣ୍ଡି ଏଆର୍ସିଏସ୍ ନିକଟରେ ବାରମ୍ବାର ଅଭିଯୋଗ ହୋଇଥିଲେ କୌଣସି ସୁଫଳ ମିଳୁନାହିଁ। ଦଲାଲମାନଙ୍କୁ ଧାନ ନ ବିକି ମଣ୍ଡିରେ ଧାନ ବିକିବା ପାଇଁ ଉପଦେଶ ଦେଉଥିବା ବେଳେ ଚାଷୀମାନେ ମଣ୍ଡିରେ ଧାନ ବିକ୍ରି ନ କରିପାରି ହତାଶ ହେଉଛନ୍ତି। ତେବେ ଦୁଇ ଦିନ ଭିତରେ ଉକ୍ତ ସମସ୍ୟାର ସମାଧାନ ନ ହେଲେ ଚାଷୀ ମାନେ ଆନ୍ଦୋଳନର କରିବେ ବୋଲି ଚେତାବନୀ ଦେଇଛନ୍ତି।
