ଫୁଲବାଣୀ ଅଫିସ, ୯।୧୧- ଏକ ଲାଞ୍ଚ ମାମଲାର ବିଚାର କରି ମଙ୍ଗଳବାର ଫୁଲବାଣୀ ଭିଜିଲାନ୍ସ ସ୍ବତନ୍ତ୍ର ବିଚାରପତି ଶୁଭଦର୍ଶୀ ପଟ୍ଟନାୟକ ଜଣେ ରାଜସ୍ବ ନିରୀକ୍ଷକ(ଆର୍ଆଇ)ଙ୍କୁ ୩ ବର୍ଷ ସଶ୍ରମ କାରାଦଣ୍ଡରେ ଦଣ୍ଡିତ କରିବା ସହ ୧୦ ହଜାର ଟଙ୍କା ଜରିମାନା କରିଛନ୍ତି। ଜରିମାନା ଅନାଦାୟ ଅଧିକ ୬ ମାସ ଜେଲ ଭୋଗିବାକୁ ରାୟରେ ଉଲ୍ଲେଖ କରିଛନ୍ତି। ଅଭିଯୁକ୍ତ ଆର୍ଆଇ ଜଣକ ହେଲେ ଗଜେନ୍ଦ୍ର ଦିଗାଲ। ୨୦୧୭ରେ ସେ ଲାଞ୍ଚ ମାମଲାରେ ନିଲମ୍ବିତ ହୋଇଥିଲେ। ପୁନଃ ନିଯୁକ୍ତି ପାଇ ବୌଦ୍ଧ ଜିଲାର ଦହିଆ ଅଞ୍ଚଳରେ କାର୍ଯ୍ୟରତ ଥିଲେ। ଗତ କିଛିମାସ ତଳେ ପୁଣି ଏକ ଲାଞ୍ଚ ମାମଲାରେ ଫସିଛନ୍ତି।
୨୦୧୭ରେ ଗଜେନ୍ଦ୍ର ବୌଦ୍ଧ ଜିଲା ବଗିଆପଡ଼ା ରାଜସ୍ବ ସର୍କଲର ଆର୍ଆଇ ଥିଲେ । ତାଙ୍କ ସର୍କଲରେ ସନ୍ତୋଷ କୁମାର ମଲ୍ଲିକ ନାମକ ଜଣେ ଯୁବକ ସରକାରୀ ୨ଏକର ଜମିକୁ ଦଖଲ କରି ସେଠାରେ ଚାଷ କରିବା ସହ ରହୁଥିଲେ । ତହସିଲଦାର ତାଙ୍କୁ ତୁରନ୍ତ ସରକାରୀ ଜାଗା ଛାଡିବାକୁ ନିର୍ଦ୍ଦେଶ ଦେଇଥିଲେ । ଏହାକୁ ନେଇ ସନ୍ତୋଷ ଆର୍ଆଇ ଗଜେନ୍ଦ୍ରଙ୍କୁ ଭେଟିଥିଲେ। ଗଜେନ୍ଦ୍ର ତାଙ୍କୁ ଭୂମିହୀନ ବୋଲି ଦରଖାସ୍ତ ଦେଲେ ସରକାରଙ୍କ ପାଖରେ ସୁପାରିସ କରିିବେ ଓ ଏଥିପାଇଁ ୧୦ ହଜାର ଟଙ୍କା ଦେବାକୁ ପଡିିବ ବୋଲି ସନ୍ତୋଷଙ୍କୁ କହିଥିଲେ। ପରେ ଉଭୟଙ୍କ ମଧ୍ୟରେ ୭ ହଜାର ଟଙ୍କାରେ କଥା ଛିଡିଥିଲା। ଘଟଣାକୁ ନେଇ ସନ୍ତୋଷ ଭିଜିଲାନ୍ସର ଦ୍ୱାରସ୍ଥ ହୋଇଥିଲେ। ଯୋଜନା ମୁତାବକ ୨୦୧୭ ଡିସେମ୍ବର ୨୯ରେ ଆର୍ଆଇଙ୍କୁ ସନ୍ତୋଷ ଟଙ୍କା ଦେଇଥିଲେ। ପୂର୍ବରୁ ପ୍ରସ୍ତୁତ ଥିବା ଭିଜିଲାନ୍ସ କର୍ମଚାରୀ ଆର୍ଆଇ ଗଜେନ୍ଦ୍ରଙ୍କୁ ଗିରଫ କରିବା ସହ ଟଙ୍କା ଜବତ କରିଥିଲେ। ଏ ନେଇ ଭିଜିଲାନ୍ସ ପକ୍ଷରୁ ନଂ.୫୪/୧୭ରେ ମାମଲା ରୁଜୁ ହୋଇଥିଲା। ଉପଯୁକ୍ତ ସାକ୍ଷ୍ୟ ପ୍ରମାଣକୁ ଭିତ୍ତିକରି ବିଚାରପତି ଉପରୋକ୍ତ ଦଣ୍ଡାଦେଶ ଶୁଣାଇଛନ୍ତି। ସରକାରଙ୍କ ପକ୍ଷରୁ ଭିଜିଲାନ୍ସ ସ୍ବତନ୍ତ୍ର ପିପି ଭିଭି.ରାମଦାସ ମାମଲା ପରିଚାଳନା କରୁଥିଲେ।
