ବାଲେଶ୍ବର ଅଫିସ ୩୧।୫: ବାଲେଶ୍ବର ଜିଲା ବରପୁର ଥାନା ଅଧୀନ ଛତ୍ରପୁର ଅଞ୍ଚଳରେ ଜଣେ ଅବସରପ୍ରାପ୍ତ ସୈନିକ ନାବାଳିକାଙ୍କୁ ଅସଦାଚରଣ କରିଥିବା ଅଭିଯୋଗ ହୋଇଛି। ଏନେଇ ବରହମ୍ପୁର ପୋଲିସ ଏକ ମାମଲା(ନଂ.୬୨/୨୦୨୨) ରୁଜୁ କରି ଅବସରପ୍ରାପ୍ତ ସୈନିକ ରାଜକିଶୋର ବେହେରା(୬୨)ଙ୍କୁ ଅଟକ ରଖି ତଦନ୍ତ ଚଳାଇଛି।
ଅଭିଯୋଗ ମୁତାବକ, ନାବାଳିକାଙ୍କ ମା’ ଝିଅ(୧୧ବର୍ଷ)ଙ୍କୁ ପଡ଼ୋଶୀ ରାଜକିଶୋର ବେହେରାଙ୍କ ଘରୁ କଦଳୀ ଏବଂ ସପୁରି ଆଣିବାକୁ ପଠାଇଥିଲେ। ନାବାଳିକା ଜଣକ ରାଜକିଶୋରଙ୍କୁ ସପୁରି ଓ କଦଳୀ ମାଗିଥିଲେ। ଏନେଇ ସେ ନାବାଳିକାଙ୍କୁ ବାଡ଼ିକୁ ଡାକି ନେଇଥିଲେ। ସେଠାରେ ସେ ତାଙ୍କୁ ଅସଦାଚରଣ କରିଥିଲେ। ଘରକୁ ଆସି ଘଟଣା ସମ୍ପର୍କରେ ନାବାଳିକା ମା’ଙ୍କୁ ଜଣାଇଥିଲେ। ଏନେଇ ଗାଁରେ ଏକ ସଭା ହୋଇଥିଲା। ସଭାରେ କୌଣସି ସମାଧାନ ନ ହେବାରୁ ନାବାଳିକାଙ୍କ ମା’ ବରହମ୍ପୁର ଥାନାରେ ଅଭିଯୋଗ କରିଛନ୍ତି। ପୋଲିସ ଅଭିଯୋଗକୁ ଭିତ୍ତିକରି ରାଜକିଶୋରଙ୍କୁ ଅଟକ ରଖି ପଚରାଉଚରା କରୁଛି।
