ମେଲବୋର୍ନ,୩।୧(ପି.ଟି.): ଉପଅଧିନାୟକ ରୋହିତ ଶର୍ମାଙ୍କ ସମେତ ୫ଜଣ ଭାରତୀୟ ଖେଳାଳିଙ୍କୁ ମେଲବୋର୍ନରେ ଆଇସୋଲେଶନରେ ରଖାଯାଇଛି। ଜୈବ ସୁରକ୍ଷା ପ୍ରୋଟୋକଲର ସମ୍ଭାବ୍ୟ ଉଲ୍ଲଂଘନ ପାଇଁ ଉଦୀୟମାନ ଓପନର ଶୁବମନ ଗିଲ, ଉଇକେଟକିପର ବ୍ୟାଟ୍ସମ୍ୟାନ ରିଷଭ ପନ୍ତ, ନବଦୀବ ସଇନି, ପୃଥ୍ବୀ ଶ ଓ ରୋହିତଙ୍କୁ ଆଇସୋଲେଶନରେ ରଖାଯାଇଛି ବୋଲି ଶନିବାର କ୍ରିକେଟ ଅଷ୍ଟ୍ରେଲିଆ (ସିଏ) ତରଫରୁ କୁହାଯାଇଛି। ଏହି ଖେଳାଳିମାନଙ୍କ ମେଲବୋର୍ନରେ ଏକ ଇନ୍ଡୋର ରେଷ୍ଟୁରାଣ୍ଟରେ ଖାଇବାର ଏକ ଭିଡିଓ ଭାଇରାଲ ହେବା ପରେ ଏଭଳି ନିଷ୍ପତ୍ତି ନିଆଯାଇଛି।
ଫଳରେ ଏହି ୫ ଖେଳାଳି ଦଳର ବାକି ସଦସ୍ୟମାନଙ୍କଠାରୁ ଅଲଗା ରହିବା ସ୍ପଷ୍ଟ ହୋଇଛି। ପ୍ରଥମେ ଏ ନେଇ କୌଣସି ତଦନ୍ତର ଆବଶ୍ୟକତା ନାହିଁ ବୋଲି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ତରଫରୁ କୁହାଯାଉଥିଲେ ମଧ୍ୟ କ୍ରିକେଟ ଅଷ୍ଟ୍ରେଲିଆ କିନ୍ତୁ ଭିନ୍ନ ମତ ଦେଇଛି। ଅଷ୍ଟ୍ରେଲୀୟ ଗଣମାଧ୍ୟମ ଏ ନେଇ ପ୍ରକାଶ କରିଥିବା ରିପୋର୍ଟକୁ ବିସିସିଆଇ ଖଣ୍ଡନ କରିଥିଲା। ଖେଳାଳିମାନେ ପ୍ରୋଟୋକଲର ଉଲ୍ଲଂଘନ କରିନାହାନ୍ତି ବୋଲି ବିସିସିଆଇ ସ୍ପଷ୍ଟ ଭାବେ କହିଥିଲା। ତେବେ ବିସିସିଆଇ ସହିତ ମିଳିତ ଭାବେ ଏ ତଦନ୍ତ କରିବେ ବୋଲି ସିଏ ତରଫରୁ କୁହାଯାଇଛି। ଫଳରେ ଘଟଣା ଭିନ୍ନ ମୋଡ ନେଇଛି। ଯଦି ଖେଳାଳିମାନଙ୍କ ତ୍ରୁଟି ପ୍ରମାଣିତ ହୁଏ ତେବେ ଟିମ୍ ଇଣ୍ଡିଆ ପାଇଁ ନିଶ୍ଚିତ ଭାବେ ସମସ୍ୟା ସୃଷ୍ଟି ହେବ। କାରଣ ଏହି ୫ଜଣ ଖେଳାଳିଙ୍କ ମଧ୍ୟରୁ ୩ଜଣ ତୃତୀୟ ଟେଷ୍ଟ ଖେଳିବା ଏକ ପ୍ରକାର ନିଶ୍ଚିତ ଥିଲା।
ନବଦୀପ ସିଂ ନାମକ ଜଣେ ପ୍ରଶଂସକ ଟୁଇଟରରେ ଏହି ଖେଳାଳିମାନେ ମେଲବୋର୍ନରେ ଏକ ଇନ୍ଡୋର ରେଷ୍ଟୁରାଣ୍ଟରେ ଖାଇବାର ଭିଡିଓ ଶେୟାର କରିଥିଲେ। ଏହି ଭିଡିଓ ଭାଇରାଲ ମଧ୍ୟ ହୋଇଥିଲା। ପନ୍ତଙ୍କୁ ସମ୍ପୃକ୍ତ ପ୍ରଶଂସକ ଜଣକ ଆଲିଙ୍ଗନ କରିଥିବା ଦାବି କରିଥିଲେ ମଧ୍ୟ ପରେ ସେ ଏହାକୁ ଅସ୍ବୀକାର କରିଛନ୍ତି। ନୂଆବର୍ଷ ଦିନ ଏହି ଖେଳାଳିମାନେ ରେଷ୍ଟୁରାଣ୍ଟରେ ଖାଇବା ନେଇ ଭାଇରାଲ ହୋଇଥିବା ଭିଡିଓ ନେଇ ବିସିସିଆଇ ଓ ସିଏ ଅବଗତ ଥିବା କଥା କହିଛନ୍ତି। ଉଲ୍ଲେଖଥାଉ କି, ତୃତୀୟ ଟେଷ୍ଟ ଜାନୁୟାରୀ ୭ ତାରିଖରୁ ସିଡ୍ନୀରେ ଆରମ୍ଭ ହେବାକୁ ଯାଉଛି।
ପ୍ରୋଟୋକଲ ଅନୁସାରେ ଖେଳାଳିମାନେ ଆଉଟଡୋରରେ ସାମାଜିକ ଦୂରତା ରକ୍ଷା କରି ଖାଇବାର ନିୟମ ରହିଛି। ଖେଳାଳିମାନଙ୍କୁ ବାହାରକୁ ଯିବାର ଅନୁମତି ଦିଆଯାଇଛି। ତେବେ ରେଷ୍ଟୁରାଣ୍ଟ ବାହାରେ ହିଁ ଖେଳାଳିମାନେ ରହିବେ ବୋଲି ସ୍ପଷ୍ଟ ଭାବେ ପୂର୍ବରୁ କୁହାଯାଇଛି। ବିସିସିଆଇ ଓ ସିଏ ଏ ନେଇ ତଦନ୍ତ ଜାରି ରଖିଛନ୍ତି ଓ ପ୍ରକୃତରେ ଏ ନେଇ ଜୈବ ସୁରକ୍ଷା ପ୍ରୋଟୋକଲର ଉଲ୍ଲଂଘନ ହୋଇଛି କି ନା ସେ ନେଇ ରିପୋର୍ଟକୁ ଅପେକ୍ଷା କରିଛନ୍ତି। ତେଣୁ ଅଷ୍ଟ୍ରେଲୀୟ ଓ ଭାରତୀୟ ମେଡିକାଲ ଟିମ୍ ଦ୍ୱୟର ପରାମର୍ଶକ୍ରମେ ଏହି ସାବଧାନତାକୁ ଦୃଷ୍ଟିରେ ରଖି ଖେଳାଳିମାନଙ୍କୁ ଆଇସୋଲେଶନକୁ ପଠାଇ ଦିଆଯାଇଛି। ଫଳରେ ଟ୍ରେନିଂ ଭେନ୍ୟୁକୁ ଏହି ଖେଳାଳିମାନେ ଅଷ୍ଟ୍ରେଲିଆ ଓ ଭାରତୀୟ ଦଳଠାରୁ ପୃଥକ୍ ଭାବେ ଯିବେ ଓ ଅଭ୍ୟାସ କରିବେ। ଅବଶ୍ୟ ଏହି ୫ ଖେଳାଳି ପ୍ରୋଟୋକଲ ଅନୁସାରେ ଟ୍ରେନିଂ କରିପାରିବେ ବୋଲି କୁହାଯାଇଛି।
ତେବେ ଖେଳାଳିମାନଙ୍କ ଏହି କାର୍ଯ୍ୟକଳାପକୁ ନେଇ ଦଳର ଆଡମିନିଷ୍ଟ୍ରେଟିଭ ମ୍ୟାନେଜର ଓ କ୍ରିକେଟ ଅପରେଶନ ଅଧିକାରୀ ଅବଗତ ଥିଲେ କି ନା ସେ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। କାରଣ ଏହି ଅଧିକାରୀମାନେ ଖେଳାଳିମାନଙ୍କ ଗତିବଧି ସମ୍ପର୍କରେ ଅବଗତ ରହିବା ସହ ଖେଳାଳିମାନେ ବାହାରକୁ ଯିବା ପାଇଁ ବା ଖାଇବା ନେଇ ରିପୋର୍ଟ ଦେବାର ନିୟମ ରହିଛି।
ନବଦୀପ ସିଂ ନାମକ ଜଣେ ଭାରତୀୟ ପ୍ରଶଂସକ ଏହି ଭିଡିଓ ପୋଷ୍ଟ କରିଥିଲେ ଓ ସେ ଖେଳାଳିଙ୍କ ୧୧୮. ୬୯ ଡଲାରର ବିଲ୍ ପୈଠ କରିଥିଲେ। ସେ ଖେଳାଳିମାନଙ୍କ ଶପିଂର ଫଟୋ ବି ପୋଷ୍ଟ କରିଛନ୍ତି। ରେଷ୍ଟୁରାଣ୍ଟରେ ଭାରତୀୟ ଖେଳାଳିମାନେ କରିଥିବା ଏହି ପ୍ରୋଟୋକଲର ଉଲ୍ଲଂଘନକୁ ବେଶ୍ ଗମ୍ଭୀରତା ସହ ଗ୍ରହଣ କରାଯାଇଛି।
