ଭୁବନେଶ୍ୱର, ୩୦।୧ (ବ୍ୟୁରୋ):ପବିତ୍ର କୁମ୍ଭମେଳାର ଦ୍ୱିତୀୟ ଦିନରେ ମନ୍ତ୍ରଧ୍ୱନି, ପାରାୟଣ, ପ୍ରବଚନ ଓ ଭଜନ କୀର୍ତ୍ତନରେ ଖଣ୍ଡଗିରି ପାହାଡ଼ ପ୍ରକମ୍ପିତ ହେଉଛି। ସକାଳରୁ ରାତି ଯାଏ ଭକ୍ତମାନେ ବାରଭୂଜା ପୀଠରେ ରାମଚରିତ ମାନସ ପାଠ ଶୁଣୁଛନ୍ତି। ସାରା ଦେଶରୁ ସାଧୁ ଓ ସନ୍ନ୍ୟାସିନୀ ଯୋଗ ଦେଇଥିବାବେଳେ ଶ୍ରଦ୍ଧାଳୁମାନେ ସେମାନଙ୍କ ଆଶୀର୍ବାଦ ନେଉଛନ୍ତି। ଦିନରେ ନାରୟଣ ସେବା ଓ ସାଧୁ ସେବାରେ ହଜାର ହଜାର ଲୋକ ସାମିଲ ହେଉଛନ୍ତି। ରଙ୍ଗୀନ ଆଲୋକରେ ସଜ୍ଜିତ ଉଦୟଗିରି ରାଣୀ ଗୁମ୍ଫା ଓ ହାତୀ ଗୁମ୍ଫାର ରାତି ଦୃଶ୍ୟ ଲୋକଙ୍କୁ ଆକୃଷ୍ଟ କରୁଛି। ସେପଟେ ଟ୍ରାଫିକ ଛକରୁ ଚାରିଛକ ପର୍ଯ୍ୟନ୍ତ ବାଏ ଓ୍ବାନ୍ ଗେଟ୍ ଓ୍ବାନ…ହରେକ୍ ମାଲ ଡ଼ାକରେ ଫାଟି ପଡୁଛି ଅଞ୍ଚଳ। ରବିବାରଠାରୁ ଦୋକାନ ବଜାର ଖୋଲିଥିବାବେଳେ ପ୍ରଥମ ଦିନରୁ ହିଁ ଗ୍ରାହକଙ୍କ ଆଖିଦୃଶିଆ ଭିଡ଼ ଦେଖିବାକୁ ମିଳିଛି। ମନ ପସନ୍ଦର ଘରୋଇ ଉପକରଣ, ପ୍ରସାଧନ ସାମଗ୍ରୀ, ଖେଳଣା ଆଦିି କିଣାକିଣିର ସୁଯୋଗ ପାଇଛନ୍ତି ସହରବାସୀ। କହିବାକୁ ଗଲେ, ଆଧ୍ୟାମିତ୍କ, ସାଂସ୍କୃତିକ ଓ ବ୍ୟବସାୟିକ ପରିବେଶ ମଧ୍ୟରେ ଜମୁଛି ପ୍ରସିଦ୍ଧ ଖଣ୍ଡଗିରି କୁମ୍ଭମେଳା।
ମୌନ ବ୍ରତଧାରୀ ଷ୍ଟାଣ୍ଡିଂ ବାବା
ସବୁ କୁମ୍ଭମେଳାରେ ଚର୍ଚ୍ଚାରେ ଥିବା ଷ୍ଟାଣ୍ଡିଂ ବାବା ଚନ୍ଦନ ଗିରି ଚଳିତବର୍ଷ ମଧ୍ୟ ସମାନ ଢ଼ଙ୍ଗରେ ତପସ୍ୟା କରୁଛନ୍ତି। ବିଶ୍ୱବାସୀଙ୍କ କଲ୍ୟାଣ ପାଇଁ ସେ ଗୋଟିଏ ଗୋଡ଼ରେ ଠିଆ ହୋଇ ଈଶ୍ୱରଙ୍କ ନିକଟରେ ପ୍ରାର୍ଥନା କରୁଛନ୍ତି। ନବରାତ୍ର କୁମ୍ଭମେଳାରେ ପ୍ରତିବର୍ଷ ସେ ଏପରି ତପସ୍ୟା ଜାରି ରଖିବେ ବୋଲି ବାବାଙ୍କ ସହଯୋଗୀ କହିନ୍ତି। ଏହି ତପସ୍ୟା କାଳରେ ସେ ସମ୍ପୂର୍ଣ୍ଣ ମୌନ ରହିଥା’ନ୍ତି । ଦୀର୍ଘ ୩୩ ବର୍ଷ ଧରି ଏହି ନାଗା ସାଧୁଙ୍କ ଏପରି ତପସ୍ୟା ଜାରି ରହିଛି। ତେବେ ଏହାକୁ ସେ ବୃକ୍ଷାସନ ବୋଲି କହିଛନ୍ତି। ସେହିପରି ରୁଦ୍ରାକ୍ଷ ବାବା, କଦଳୀ ବାବା, ଡ଼ାକ୍ତର ବାବା, ବିଭୂତି ବାବାଙ୍କ ସମେତ ବଙ୍ଗାଳି ମାତା, ଜଟାଧାରୀ ମାତା ଓ ଅନ୍ୟ ସନ୍ନ୍ୟାସୀ ମଧ୍ୟ ଭକ୍ତଙ୍କୁ ଆଶୀର୍ବଚନ ଦେଉଛନ୍ତି।
ଆଜିଠାରୁ ଯାତ୍ରା ମହାସମର
ସୋମବାରଠାରୁ ଖଣ୍ଡଗିରି ପାଦଦେଶରେ ଆରମ୍ଭ ହେବାକୁଯାଉଛି ଯାାତ୍ରା ମହାସମର। ୬ଟି ପେଣ୍ଡାଲରେ ନାଚଗୀତ ସହ ଶୁଭିବ ଦମଦାର୍ ସଂଳାପ। ଡ. ହରେକୃଷ୍ଣ ମହତାବ ପେଣ୍ଡାଲରେ ୩୦ରୁ ୩ ତାରିଖ ପର୍ଯ୍ୟନ୍ତ ଯାତ୍ରାଶ୍ରୀ ବିଶ୍ୱ ଦରବାର, ୪ରୁ ୬ ତାରିଖ ଯାଏ ସାଇ ସମ୍ରାଟ ଓ ୭ରୁ ୧୦ ତାରିଖ ପର୍ଯ୍ୟନ୍ତ ତୁଳସୀ ଗଣନାଟ୍ୟ ମନୋରଞ୍ଜନ କରିବ। ସେହିପରି ସନାତନ ମଣ୍ଡପରେ ୩୦ରୁ ୪ ତାରିଖ ପର୍ଯ୍ୟନ୍ତ ସୂର୍ଯ୍ୟ ମନ୍ଦିର ଏବଂ ୫ରୁ ୧୦ ତାରିଖ ପର୍ଯ୍ୟନ୍ତ କୋଣାର୍କ ଗଣନାଟ୍ୟ ଦମଦାର ନାଟକ ପରିଦର୍ଶନ କରିବ। ଅନ୍ୟପଟେ ଇନ୍ଦିରା ସାଂସ୍କୃତିକ ମଣ୍ଡପରେ ୩୦ରୁ ୬ ତାରିଖ ଯାଏ ଶିବାନୀ ଗଣନାଟ୍ୟ ଏବଂ ୭ରୁ ୧୦ ତାରିଖ ପର୍ଯ୍ୟନ୍ତ କଳିଙ୍ଗ ଗଣନାଟ୍ୟ ମଞ୍ଚ ଦୁଲୁକାଇବ। ମା’ ମଙ୍ଗଳା ମଣ୍ଡପରେ ରାଜଧାନୀ ଅପେରା ୩୧ରୁ ୪ ତାରିଖ ପର୍ଯ୍ୟନ୍ତ ଏବଂ ସ୍ବର୍ଣ୍ଣ ମହଲ ୫ରୁ ୧୦ ତାରିଖ ପର୍ଯ୍ୟନ୍ତ ଦର୍ଶକଙ୍କୁ ବାନ୍ଧି ରଖିବ। ତେବେ ଜୟଦୁର୍ଗା ମଣ୍ଡପରେ ୧ରୁ ୧୦ ତାରିଖ ଯାଏ ରଙ୍ଗମହଲ ଗଣନାଟ୍ୟ ପ୍ରସ୍ତୁତ ନାଟକ ଦେଖିବାକୁ ମିଳିବ।
ମେଳା ବୁଲିଲେ ବିଏମ୍ସି କମିଶନର
ଭୁବନେଶ୍ୱର ମହାନଗର ନିଗମ(ବିଏମସି) କମିଶନର ବିଜୟ ଅମୃତା କୁଳାଙ୍ଗେ ଖଣ୍ଡଗରି ପାହାଡ଼ ବୁଲି ମେଳା ଆୟୋଜନର ତଦାରଖ କରିଛନ୍ତି। କମିଶନରଙ୍କ ସହ ଜୋନାଲ ଡେପୁଟି କମିଶନର ରବିନାରାୟଣ ଜେଠୀ ଏବଂ ପୂର୍ବତନ କର୍ପୋରେଟର ରଘୁନାଥ ମହାନ୍ତି ପ୍ରମୁଖ ସ୍ଥିତି ସମୀକ୍ଷା କରିଥିଲେ। ତେବେ ମେଳାର ସୁପରିଚାଳନା ପାଇଁ ବିଏମସି ପକ୍ଷରୁ ଆବଶ୍ୟକ ପଦକ୍ଷେପ ନିଆଯାଇଥିବା ଜେଡିସି ଜେଠୀ ସୂଚନା ଦେଇଛନ୍ତି। ଆବଶ୍ୟକସ୍ଥଳେ ଅଧିକ ମାନବ ସମ୍ବଳ ବିନିଯୋଗ କରାଯିବ। ପାର୍କିଂ, ସ୍ବଚ୍ଛତା ଓ ଅନ୍ୟାନ୍ୟ କ୍ଷେତ୍ରରେ ନଜର ରଖାଯାଇଥିବା ସେ କହିଛନ୍ତି।
୩୧ରୁ ଖଣ୍ଡଗିରି-ଉଦୟଗିରି ମହୋତ୍ସବ
ପୂର୍ବ ସ୍ଥାନ ଖଣ୍ଡଗିରିସ୍ଥିତ ପାନ୍ଥିକାକୁ ଫେରିଛି ଖଣ୍ଡଗିରି-ଉଦୟଗିରି ମହୋତ୍ସବ। ଏହି ୩ ଦିନିଆ ମହୋତ୍ସବରେ ଓଡ଼ିଶାରୁ ବଛାବଛା କଳାକାର ଯୋଗ ଦେବାର କାର୍ଯ୍ୟକ୍ରମ ରହିଛି। ଚଳିତ ବର୍ଷ ଭୁବନେଶ୍ୱର ଆଞ୍ଚଳିକ କମିଟି ପକ୍ଷରୁ ଏହାର ଆୟୋଜନ କରାଯାଇଛି। ପୂର୍ବରୁ ଖାରବେଳ ମହୋତ୍ସବ ନାମରେ ପାନ୍ଥିକା ପରିସରରେ ଏହି ବିଶ୍ୱସ୍ତରୀୟ କାର୍ଯ୍ୟକ୍ରମ ଆୟୋଜନ ହେଉଥିଲା। ପରବର୍ତ୍ତୀ ସମୟରେ ବିଜୁପଟ୍ଟନାୟକ ଶକ୍ତି ଉଦ୍ୟାନରେ ଏହି କାର୍ଯ୍ୟକ୍ରମ ହୋଇଥିଲା। ପରେ ମହୋତ୍ସବର ନାମ ପରିବର୍ତ୍ତନ ହୋଇ ଖଣ୍ଡଗିରି-ଉଦୟଗିରି ମହୋତ୍ସବ ରଖାଯାଇଥିଲା। ଶେଷ ୨ ବର୍ଷ ଧରି ଗାନ୍ଧି ଶାନ୍ତି କେନ୍ଦ୍ରରେ ଏହି ମହୋତ୍ସବ ଆୟୋଜନ ହୋଇଥିଲେ ମଧ୍ୟ ସେଠାରେ ସଂଗ୍ରହାଳୟ ନିର୍ମାଣ ପରଠାରୁ ବନ୍ଦ ହୋଇଯାଇଥିଲା। ଗତ ୨ ବର୍ଷରେ କରୋନା କଟକଣା ପାଇଁ ଉତ୍ସବ ହୋଇପାରି ନ ଥିଲା।
