ବାରିପଦା ଅଫିସ,୧୫।୩ ମୟୂରଭଞ୍ଜ ଜିଲାରେ ପଞ୍ଚାୟତ ନିର୍ବାଚନ ସରିବା ପରେ ପୌର ନିର୍ବାଚନ ଉଷ୍ମତା ବୃଦ୍ଧି ପାଇଛି। ଜିଲା ପରିଷଦ ନିର୍ବାଚନରେ ଅପୂର୍ବ ସଫଳତା ହାସଲ କରିଥିବା ବିଜେଡି କର୍ମକର୍ତ୍ତାଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଛି। ଅନ୍ୟପକ୍ଷରେ ବିଫଳତାକୁ ନେଇ ଭାଜପା ଓ କଂଗ୍ରେସ କର୍ମୀଙ୍କ ଶିବିରରେ ନୈରାଶ୍ୟ ଖେଳି ଯାଇଥିବା ବେଳେ ପ୍ରସଙ୍ଗକୁ ଖୋଜି ଭୋଟରଙ୍କ ନିକଟତର ହେବାରେ ଲାଗି ପଡ଼ିଛନ୍ତି। ଏପରିକି ସକାଳୁ ରାତି ପର୍ଯ୍ୟନ୍ତ ପ୍ରାର୍ଥୀଙ୍କ ସହ ସମର୍ଥକମାନେ ସାହି ସାହିରେ ସଭାସମିତି କରି ଭୋଟରଙ୍କୁ ମନାଇବାକୁ ପ୍ରୟାସ ଜାରି ରଖିଛନ୍ତି। ସରକାରୀ ଯୋଜନାରେ ଥିବା ସମସ୍ତ ସୁବିଧା ସୁଯୋଗ ଲୋକଙ୍କ ପାଖରେ ପହଞ୍ଚାଇବା ପାଇଁ ପ୍ରାର୍ଥୀମାନେ ପ୍ରତିଶ୍ରୁତିରେ ପୋତି ପକାଉଛନ୍ତି। ତେବେ ବାରିପଦା ପୌର ପରିଷଦ ଅଞ୍ଚଳରେ ଥିବା ବସ୍ତିବାସିନ୍ଦାଙ୍କ ମୌଳିକ ସମସ୍ୟା ପ୍ରତି ଗୁରୁତ୍ୱ ଦିଆଯାଇ ନ ଥିବାରୁ ନେତା ବାଛିବାରେ ସେମାନଙ୍କ ଭୂମିକା ନିର୍ଣ୍ଣାୟକ ହୋଇ ପାରେ ବୋଲି ଆକଳନ କରାଯାଉଛି ା
ୱାର୍ଡକୁ ନେଇ ବାରିପଦା ପୌର ପରିଷଦ ଗଠିତ। ଏଠାରେ ୨୪ହଜାର ୭୧୮ପରିବାରରେ ୧ଲକ୍ଷ ୧୦ହଜାର ୧୪୩ଜଣ ଲୋକ ବସବାସ କରୁଥିବା ବେଳେ ଭୋଟର ତାଲିକାରେ ୮୧ହଜାର ୨୨୨ଜଣ ରହିଛନ୍ତି। ଏହି ୱାର୍ଡ ଗୁଡ଼ିକରେ ଦୀର୍ଘ ଦିନ ଧରି ବସବାସ କରୁଥିବା ୪୬ ବସ୍ତିବାସିନ୍ଦାଙ୍କ ମୌଳିକ ସମସ୍ୟା ଭରପୁର ରହିଛି। ମିଳିଥିବା ସୂଚନା ଅନୁଯାୟୀ, ୪୩ଟି ବସ୍ତିରେ ରହୁଥିବା ୭ହଜାର ୮୯୧ ପରିବାରଙ୍କ ମଧ୍ୟରୁ ୫ହଜାର ୬୭୩ଜଣ ଭୂମିହୀନ ରହିଛନ୍ତି। ଅନ୍ୟ ତିନୋଟି ବସ୍ତିର ରିପୋର୍ଟ ମିଳି ନ ଥିବା ବେଳେ ବହୁ ଲୋକ ଜମିପଟ୍ଟାରୁ ବଞ୍ଚିତ ହେବା ଦ୍ୱାରା ବିଭିନ୍ନ ସରକାରୀ ଯୋଜନାରୁ ଦୂରେଇ ଯାଇଛନ୍ତି। ଏପରିକି ବାସସ୍ଥାନ ପ୍ରମାଣ ପତ୍ର ପାଇଁ ଛାତ୍ରୀଛାତ୍ରମାନେ ଉନ୍ନତମାନର ଶିକ୍ଷା ସହ ଛାତ୍ରାବାସରେ ରହିବା ସୁବିଧାରୁ ବଞ୍ଚିିତ ରହିଛନ୍ତି। ଜମିପଟ୍ଟା ନ ଥିବାରୁ ଆବାସ ଗୃହ, ବିଦ୍ୟୁତ୍, ପାନୀୟ ଜଳ ପାଇପାରୁ ନାହାନ୍ତି। ଅଳିଆ ଆବର୍ଜନାରେ ଭରପୁର ରହୁଥିବାରୁ ଅସ୍ବାସ୍ଥ୍ୟକର ପରିବେଶରେ ସେମାନଙ୍କ ଜୀବନ ଦୁର୍ବସହ ହୋଇପଡ଼ିଛି। ସେହିପରି ସାହି ବସ୍ତିକୁ କଂକ୍ରିଟ ରାସ୍ତା ସଂଯୋଗୀକରଣ, ଆଲୋକୀକରଣ ବ୍ୟବସ୍ଥା କରାଯାଇ ନ ଥିବାରୁ ଲୋକେ ଅନ୍ଧାରରେ ଯିବାଆସିବା କରୁଛନ୍ତି। ଏପରିକି ବହୁ ଲୋକ ଭୋଟର କାର୍ଡ ଓ ଆଧାର କାର୍ଡରୁ ବଞ୍ଚିତ ହୋଇ ଅଫିସ ଓ ଅଧିକାରୀଙ୍କ ନିକଟକୁ ଯାଇ ହଇରାଣ ହରକତ ହେଉଛନ୍ତି। ସହର ମଧ୍ୟଦେଇ ଯାଇଥିବା ନଦୀ ଗୁଡ଼ିକରେ ବନ୍ୟା ନିୟନ୍ତ୍ରଣ ପାଇଁ ଆଡ଼ିବନ୍ଧ କରାଯାଇ ନ ଥିବାରୁ ବନ୍ୟା ଓ ଡ୍ରେନ ପାଣି ଘରେ ପଶୁଛି। ଫଳରେ ବସ୍ତିବାସିନ୍ଦା ବର୍ଷାଦିନେ ପାଣି କାଦୁଅରେ ରହି ବହୁ ଅସୁବିଧାର ସମ୍ମୁଖିନ ହୋଇଥାନ୍ତି। ଏହିପରି ଅନେକ ସମସ୍ୟା ମୁଣ୍ଡ ଟେକିଥିବା ବେଳେ ଦକ୍ଷତା ସମ୍ପନ୍ନ କାଉନସିଲର ଓ ପୌରାଧ୍ୟକ୍ଷ ବାଛିବାକୁ ବସ୍ତି ଭୋଟର ନିଷ୍ପତ୍ତି ନେଇଥିବା ଆଲୋଚନାରୁ ଜଣାପଡ଼ିଛି। ଏହି ବସ୍ତିରେ ପାଖାପାଖି ୧୮ହଜାରରୁ ଊର୍ଦ୍ଧ୍ୱ ଭୋଟର ରହିଥିବାରୁ ସେମାନଙ୍କୁ ମନେଇବାକୁ ପ୍ରାର୍ଥୀଙ୍କ ଗହଳି ଦେଖିବାକୁ ମିଳିଛି। ତେଣୁ ପୌର ନିର୍ବାଚନରେ ବସ୍ତିବାସିନ୍ଦା ଯାହାଙ୍କ ପ୍ରତି ଢଳିବେ ସେହି ପ୍ରାର୍ଥୀ ହିଁ ବିଜୟ ମୁକୁଟ ପିନ୍ଧିବେ ବୋଲି କୁହାଯାଉଛି।
