ଭୁବନେଶ୍ୱର,୨।୬: ଓଡ଼ିଶାର ଛାତ୍ରଛାତ୍ରୀଙ୍କ ପାଇଁ ଏକ ବଡ଼ ଖବର। ରାଜ୍ୟର ବିଭିନ୍ନ ବୃତ୍ତିଗତ ଶିକ୍ଷାନୁଷ୍ଠାନ (Professional Educational Institutions) ରେ ନାମଲେଖା ପାଇଁ ସଂରକ୍ଷଣ ପ୍ରତିଶତକୁ ବୃଦ୍ଧି କରାଯାଇଛି। ସରକାରଙ୍କ ଏହି ନୂତନ ନିଷ୍ପତ୍ତି ଅନୁଯାୟୀ ଅନୁସୂଚିତ ଜନଜାତି (ST), ଅନୁସୂଚିତ ଜାତି (SC) ଏବଂ ସାମାଜିକ ଓ ଶିକ୍ଷାଗତ ପଛୁଆ ବର୍ଗ (SEBC)ର ଛାତ୍ରଛାତ୍ରୀମାନେ ଏବେ ଅଧିକ ସଂରକ୍ଷଣର ସୁବିଧା ପାଇପାରିବେ।
ନୂତନ ସଂରକ୍ଷଣ ବ୍ୟବସ୍ଥାର ବିବରଣୀ ଅନୁଯାୟୀ, ଅନୁସୂଚିତ ଜନଜାତି (ST) ବର୍ଗର ଛାତ୍ରଛାତ୍ରୀଙ୍କ ପାଇଁ ସଂରକ୍ଷଣ ସୀମା ୧୨% ରୁ ୨୨.୫ ପ୍ରତିଶତକୁ ବୃଦ୍ଧି କରାଯାଇଛି। ଅନୁସୂଚିତ ଜାତି (SC) ବର୍ଗର ପିଲାଙ୍କ ପାଇଁ ପୂର୍ବରୁ ଥିବା ୮% ସଂରକ୍ଷଣକୁ ବଢ଼ାଇ ଏବେ ୧.୨୫ ପ୍ରତିଶତ କରାଯାଇଛି। ପଛୁଆ ବର୍ଗ (SEBC)ର ଛାତ୍ରଛାତ୍ରୀଙ୍କ ପାଇଁ ୧୧.୨୫ ପ୍ରତିଶତ ସଂରକ୍ଷଣ ଲାଗୁ କରିବାକୁ ନିଷ୍ପତ୍ତି ନିଆଯାଇଛି।
ଏହି ନୂତନ ସଂରକ୍ଷଣ ବ୍ୟବସ୍ଥା ରାଜ୍ୟର ସମସ୍ତ ପ୍ରମୁଖ ଉଚ୍ଚଶିକ୍ଷା ଓ ବୃତ୍ତିଗତ ଶିକ୍ଷାନୁଷ୍ଠାନରେ କାର୍ଯ୍ୟକାରୀ ହେବ। ରାଜ୍ୟର ସବୁ ବିଶ୍ୱବିଦ୍ୟାଳୟ (Universities) ଏବଂ ଏହା ଅଧୀନରେ ଥିବା ସମସ୍ତ ଅନୁବନ୍ଧିତ ଶିକ୍ଷାନୁଷ୍ଠାନରେ ଏହି ନିୟମ ଲାଗୁ କରାଯାଇ ନାମଲେଖା କରାଯିବ। ବିଶେଷକରି ଆଇଟିଆଇ (ITI), ପଲିଟେକ୍ନିକ (Polytechnic), ନର୍ସିଂ (Nursing), ଫାର୍ମାସୀ (Pharmacy) ଏବଂ ମ୍ୟାନେଜମେଣ୍ଟ (Management) ଭଳି ସମସ୍ତ ବୃତ୍ତିଗତ ପାଠପଢ଼ା ପାଇଁ ଏହି ସଂରକ୍ଷଣ ନିୟମ ପ୍ରଯୁଜ୍ୟ ହେବ।
ସରକାରଙ୍କ ଏହି ସଂସ୍କାରମୂଳକ ପଦକ୍ଷେପ ଫଳରେ ରାଜ୍ୟର ପଛୁଆ ଓ ଅବହେଳିତ ବର୍ଗର ହଜାର ହଜାର ମେଧାବୀ ଛାତ୍ରଛାତ୍ରୀମାନେ ବୃତ୍ତିଗତ ଶିକ୍ଷା ଗ୍ରହଣ କରିବା ସହ ନିଜର ଭବିଷ୍ୟତ ଗଢ଼ିବାରେ ବେଶ ସହାୟତା ପାଇପାରିବେ ବୋଲି କୁହାଯାଉଛି।