ଫୁଲବାଣୀ ଅଫିସ/ କୋଟଗଡ଼(ଡି.ଏନ୍.ଏ.)୨୧ା୯: ଲଘୁଚାପ ପ୍ରଭାବରେ କନ୍ଧମାଳ ଜିଲାରେ ସୋମବାର ରାତିରୁ ପ୍ରବଳ ବର୍ଷା ହେଉଛି। ବର୍ଷା ଯୋଗୁ ଜିଲାର ବିଭିନ୍ନ ନଦୀରେ ଜଳସ୍ତର ବଢ଼ିବାରେ ଲାଗିଛି। ଫିରିଙ୍ଗିଆ ବ୍ଲକ ବାଲନ୍ଦାପଡା ବାଘଡୁଙ୍ଗୁରି ଗ୍ରାମର ୫ଜଣ ଲୋକ ମଙ୍ଗଳବାର ସକାଳେ ବାଘ ନଦୀ ପାର ହୋଇ କାମ କରିବାକୁ ଯାଉଥିଲେ। ତେବେ ହଠାତ ପାଣି ଆସିଯିବାରୁ ସେମାନେ ନଦୀ ପାଖରେ ଥିବା ପମ୍ପ ହାଉସ ଛାତରେ ଚଢ଼ିଯାଇ ଜୀବନ ବଞ୍ଚାଇଛନ୍ତି। ଏମାନେ ଫସି ରହିଥିବା ଖବରପାଇ ଫିରିଙ୍ଗିଆ ଅଗ୍ନିଶମ ବାହିନୀ ଓ ଟିମ୍ ହ୍ୟୁମାନିଟି ସଦସ୍ୟମାନେ ପହଞ୍ଚି ତୁରନ୍ତ ଉଦ୍ଧାର କରିଛନ୍ତି। ଅନ୍ୟପକ୍ଷରେ ଲଗାଣ ବର୍ଷା ଯୋଗୁ ତୁମୁଡ଼ିବନ୍ଧ ବ୍ଲକ ଅନ୍ତର୍ଗତ କୁର୍ତ୍ତମଗଡ଼ ଠାରୁ ସିର୍ଲା ଓ କୋଟଗଡ଼ ବ୍ଲକ ଅନ୍ତର୍ଗତ ପାରିଗଡ଼ ପଞ୍ଚାୟତକୁ ସଂଯୋଗ କରୁଥିବା ମୁଖ୍ୟ ରାସ୍ତାର ବତେଡ଼ିମୁଣ୍ଡା ନିକଟସ୍ଥ ପୋଲ ଧୋଇଯାଇଛି। ଫଳରେ ଦୁଇ ପଞ୍ଚାୟତର ବୁଢ଼ାଖାମ୍ବା, ପାରିଗଡ଼, ଗୁଗୁଡ଼ା, ମଣ୍ଡାସିଙ୍ଗି, ସରସିଙ୍ଗିଆ, ବାଲିଗାଡ଼ା ଆଦି ଅନେକ ଗ୍ରାମବାସୀ ଜଳବନ୍ଦୀ ହୋଇ ରହିବା ସହ ବାହ୍ୟ ଜଗତରୁ ବିଚ୍ଛିନ୍ନ ହୋଇପଡିଛନ୍ତି। ଲୋକେ ନାହିଁ ନ ଥିବା ହଇରାଣ ହେଉଛନ୍ତି।
ଜିଲା ପ୍ରଶାସନ ପକ୍ଷରୁ ମିଳିଥିବା ସୂଚନା ଅନୁସାରେ, ବାଲିଗୁଡା ବ୍ଲକରେ ସର୍ବାଧିକ ୩୦୨ ମିଲିମିଟର ବର୍ଷା ରେକର୍ଡ କରାଯାଇଛି। ସେହିପରି ଜି.ଉଦୟଗିରି ବ୍ଲକରେ ୧୧.୨ମିମି, ଫୁଲବାଣୀରେ ୨୨.୨ମିମି, ଖଜୁରିପଡାରେ ୪.୨ମିମି, ରାଇକିଆରେ ୨୨.୪,ମିମି, କ.ନୂଆଗାଁରେ ୯୦.୨ମିମି, ଫିରିଙ୍ଗିଆରେ ୮୯.୨ମିମି, ଚକାପାଦରେ ୩ ମିମି, କୋଟଗଡ ୮୭ମିମି, ଦାରିଙ୍ଗିବାଡି ୬୩ମିମି ଓ ଟିକାବାଲିରେ ୧୦ ମିଲିମିଟର ବର୍ଷା ରେକର୍ଡ କରାଯାଇଛି। ତେବେ ଏ ପର୍ଯ୍ୟନ୍ତ କୌଣସି କ୍ଷୟକ୍ଷତିର ସୂଚନା ମିଳିନାହିଁ।
