ଜେନିନ୍(ଓ୍ବେଷ୍ଟବ୍ୟାଙ୍କ), ୧୨ା୫: ପାଲେଷ୍ଟାଇନ କବ୍ଜାରେ ଥିବା ଓ୍ବେଷ୍ଟବ୍ୟାଙ୍କରେ ଅଲ୍-ଜଜିରା ସାମ୍ବାଦିକା ଶିରିନ୍ ଅବୁ ଅକ୍ଲେହ(୫୧) ଇସ୍ରାଏଲ ସେନା ଗୁଳିରେ ବୁଧବାର ପ୍ରାଣ ହରାଇଛନ୍ତି। ଜେନିନ୍ ସହରରେ ଇସ୍ରାଏଲ ପ୍ରତିରକ୍ଷା ବଳ (ଆଇଡିଏଫ୍) ଟାର୍ଗେଟ କରିବାବେଳେ ଶିରିନ୍ ଏହାର ରିପୋର୍ଟ କରିବାକୁ ଯାଇଥିଲେ। ସେହି ସମୟରେ ତାଙ୍କ ମୁହଁରେ ଗୁଳି ବାଜିଥିଲା। ସେଠାରେ ହିଁ ତାଙ୍କର ମୃତ୍ୟୁ ଘଟିଥିଲା। ଏଥିରେ ପାଲେଷ୍ଟାଇନର ଆଉ ଜଣେ ରିପୋର୍ଟର ଅଲି ସମାଉଦି ଆହତ ହୋଇଛନ୍ତି। ଶିରିନ୍ଙ୍କ ହତ୍ୟା ପାଇଁ ପାଲେଷ୍ଟାଇନ ଇସ୍ରାଏଲକୁ ଦାୟୀ କରିଛି। ପାଲେଷ୍ଟାଇନ ପକ୍ଷରୁ ଚଳା ଯାଇଥିବା ଗୁଳି ଶିରିନ୍ଙ୍କ ମୁହଁରେ ବାଜିଥିବା ଇସ୍ରାଏଲ ପାଲଟା ଅଭିଯୋଗ ଆଣିଛି।
ଏହି ଆମେରିକୀୟ-ପାଲେଷ୍ଟିନୀୟ ସାମ୍ବାଦିକାଙ୍କ ମୃତ୍ୟୁକୁ ନେଇ ସାରା ବିଶ୍ୱରେ ପ୍ରତିକ୍ରିୟା ପ୍ରକାଶ ପାଇଛି। ଘଟଣାକୁ କାତାର ଡେପୁଟି ବହିର୍ବ୍ୟାପାର ମନ୍ତ୍ରୀ ଲଲ୍ଓ୍ବାହ ଅଲ୍ଖତର ନିନ୍ଦା କରିଛନ୍ତି। ଏହାକୁ ସେ ଇସ୍ରାଏଲ ପ୍ରାୟୋଜିତ ଆତଙ୍କବାଦ ଆଖ୍ୟା ଦେବା ସହ ଏହି ଦେଶ ପ୍ରତି ସମର୍ଥନ ବନ୍ଦ କରାଯିବାକୁ ସେ ଆହ୍ବାନ ଦେଇଛନ୍ତି। ଜେନିନ୍ରେ ଅପରେଶନ ଚାଲିଥିବାବେଳେ ଇସ୍ରାଏଲ ସେନା ଉପରକୁ ଗୁଳି, ବିସ୍ଫୋରକରେ ଅତର୍କିତ ଭାବେ ଆକ୍ରମଣ କରାଯାଇଥିଲା। ତେଣୁ ଆଇଡିଏଫ୍ ମଧ୍ୟ ଜବାବୀ କାର୍ଯ୍ୟାନୁଷ୍ଠାନ ନେଇଥିଲା। କିନ୍ତୁ ପାଲେଷ୍ଟିନୀୟଙ୍କ ଗୁଳିରେ ଶିରିନ ନିହତ ହୋଇଥିବା ଇସ୍ରାଏଲ ମିଲିଟାରି ପକ୍ଷରୁ କୁହାଯାଇଛି। ପାଲେଷ୍ଟାଇନ ସହ ଘଟଣାର ମିଳିତ ତଦନ୍ତ ପାଇଁ ଇସ୍ରାଏଲ ବହିର୍ବ୍ୟାପାର ମନ୍ତ୍ରୀ ୟେର୍ ଲାପିଡ୍ ଦାବି କରିଛନ୍ତି। ଏଥିସହ ଆତଙ୍କବାଦ ଏବଂ ଇସ୍ରାଏଲ ନାଗରିକଙ୍କ ହତ୍ୟା ରୋକିବା ପାଇଁ ଆଇଡିଏଫ୍ ଏହାର କାର୍ଯ୍ୟ ଜାରି ରଖିବ ବୋଲି ସେ କହିଛନ୍ତି। ପାଲେଷ୍ଟାଇନ ପକ୍ଷରୁ ଆଖିବୁଜା ଆକ୍ରମଣରେ ଶିରିନ୍ ନିହତ ହୋଇଥିବା ନେଇ ଯଥେଷ୍ଟ ଆଶଙ୍କା ଥିବା ପ୍ରାପ୍ୟ ସୂଚନାରୁ ଜଣାପଡ଼ିଛି ବୋଲି ଇସ୍ରାଏଲ ପ୍ରଧାନମନ୍ତ୍ରୀ ନାଫ୍ଟାଲି ବେନେଟ୍ କହିଛନ୍ତି।
ସପ୍ତାହ ହେଲା ଇସ୍ରାଏଲ ସେନା ପକ୍ଷରୁ ଓ୍ବେଷ୍ଟ ବ୍ୟାଙ୍କରେ ବାରମ୍ବାର ଅପରେଶନ ଚଳାଯାଉଛି। ଇସ୍ରାଏଲରେ ଆତଙ୍କବାଦୀ ଆକ୍ରମଣ ବଢ଼ିବାରେ ଲାଗିଛି। ଆତଙ୍କବାଦୀଙ୍କ ମଧ୍ୟରୁ ଅଧିକାଂଶ ପାଲେଷ୍ଟାଇନ ପକ୍ଷରୁ ଆସୁଛନ୍ତି। ଜେନିନ୍ରେ ଥିବା ଶରଣାର୍ଥୀ ଶିବିରକୁ ଆତଙ୍କବାଦୀଙ୍କ ଗଡ଼ କୁହାଯାଉଥିବାବେଳେ ଇସ୍ରାଏଲ ସେନା ପକ୍ଷରୁ ଓ୍ବେଷ୍ଟବ୍ୟାଙ୍କରେ ବାରମ୍ବାର ଚଢ଼ାଉ ସହ ଏଭଳି ସର୍ଚ୍ଚ ଅପରେଶନ କରାଯାଉଛି। ଶିରିନ୍ଙ୍କ ଶେଷକୃତ୍ୟବେଳେ ଶତାଧିକ ପାଲେଷ୍ଟାଇନ ନାଗରିକ, ମୁଖାପିନ୍ଧା ବନ୍ଧୁକଧାରୀ ଜେନିନ୍ରେ ସାମିଲ ହୋଇଥିଲେ।
ସାହସୀ ରିପୋର୍ଟର
ଶିରିନ୍ ଅବୁ ଅକ୍ଲେହ ଜଣେ ଜଣାଶୁଣା ରିପୋର୍ଟର। ଜେରୁଜେଲମରେ ଜନ୍ମିତ ଶିରିନ୍ ୧୯୯୭ରୁ ସେ ଆରବୀ ଭାଷାରେ ପ୍ରସାରିତ ଅଲ୍ଜଜିରାରେ କାର୍ଯ୍ୟ କରୁଥିଲେ। ତାଙ୍କ ସାହସିକତା ପାଇଁ ସେ ଜଣାଶୁଣା। ସେ ପ୍ରାୟ ୧୫ ବର୍ଷ ଧରି ଇସ୍ରାଏଲ-ପାଲେଷ୍ଟାଇନ୍ ମଧ୍ୟରେ ଚାଲିଆସୁଥିବା ସଂଘର୍ଷ ଉପରେ ରିପୋର୍ଟିଂ କରି ଆସୁଥିଲେ। ପାଲେଷ୍ଟାଇନ ଓ ଇସ୍ରାଏଲ ମଧ୍ୟରେ ସଂଘର୍ଷକୁ ନେଇ ଶିରିନ୍ଙ୍କ ବଳିଷ୍ଠ ଉପସ୍ଥାପନ ଉଚ୍ଚ ପ୍ରଶଂସିତ ହୋଇଥିଲା।
ଓ୍ବେଷ୍ଟବ୍ୟାଙ୍କ ବିବାଦ କ’ଣ
ଇସ୍ରାଏଲର ପୂର୍ବରେ ଓ୍ବେଷ୍ଟବ୍ୟାଙ୍କ ଅବସ୍ଥିତ। ଜୋର୍ଡାନ ନଦୀର ପଶ୍ଚିମ ପଟରେ ଥିବାରୁ ଏହାକୁ ଓ୍ବେଷ୍ଟ୍ବ୍ୟାଙ୍କ କୁହାଯାଏ। ୧୯୪୮ରେ ପ୍ରଥମ ଆରବ-ଇସ୍ରାଏଲ ଯୁଦ୍ଧରେ ମଧ୍ୟପ୍ରାଚ୍ୟ ଦେଶ ଜୋର୍ଡାନ ଓ୍ବେଷ୍ଟବ୍ୟାଙ୍କକୁ କବ୍ଜା କରିଥିଲା। କିନ୍ତୁ ୧୯୬୭ରେ ଆରବ-ଇସ୍ରାଏଲ ମଧ୍ୟରେ ହୋଇଥିବା ୬ ଦିନିଆ ଯୁଦ୍ଧରେ ଇସ୍ରାଏଲ ଓ୍ବେଷ୍ଟବ୍ୟାଙ୍କକୁ ନିଜ ନିୟନ୍ତ୍ରଣକୁ ଆଣିଥିଲା। ଇସ୍ରାଏଲ ସେଠାରେ ଶତାଧିକ ବସ୍ତି ସ୍ଥାପନ କରି ନିଜ ନାଗରିକଙ୍କୁ ଥଇଥାନ କରିଛି। ଏଠାରେ ୩୦ ଲକ୍ଷରୁ ଊର୍ଦ୍ଧ୍ୱ ପାଲେଷ୍ଟାଇନ ନାଗରିକ ମଧ୍ୟ ରହୁଛନ୍ତି। ସମ୍ପୂର୍ଣ୍ଣ ଓ୍ବେଷ୍ଟବ୍ୟାଙ୍କକୁ ଇସ୍ରାଏଲ ନିଜର ଦାବି କରୁଥିବାବେଳେ ପାଲେଷ୍ଟାଇନ ଏହାକୁ ନିଜର ଅଂଶ କରିବାକୁ ଚାହୁଁଛି।
