ମହାକାଳପଡ଼ା,୩୦ା୪(ପ୍ରତାପ ଚନ୍ଦ୍ର ସ୍ବାଇଁ): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ମା’ ରାମଚଣ୍ଡୀ ମନ୍ଦିର ନବୀକରଣ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚିଛି। ଏହାକୁ ଦୃଷ୍ଟିରେ ରଖି ବୁଧବାର ଏମ୍ପି ବୈଜୟନ୍ତ ପଣ୍ଡା ଓ ବିଧାୟକ ଡ. ଦୁର୍ଗାପ୍ରସନ୍ନ ନାୟକ ମା’ଙ୍କ ମନ୍ଦିର ପରିଦର୍ଶନ କରିଥିଲେ। ପରେ ମନ୍ଦିର ପରିସର ବୈଠକ ଗୃହରେ ନବୀକରଣ ଉପରେ ସମୀକ୍ଷା କରିଥିଲେ। ମା’ଙ୍କ ଚନ୍ଦନପୋଖରୀ ଖନନ କରାଯିବା ପାଇଁ ପୂର୍ତ୍ତ ବିଭାଗ ଅଧିକାରୀଙ୍କ ସହ ସେମାନେ ଆଲୋଚନା କରିଥିଲେ। ପୂର୍ତ୍ତ ବିଭାଗ ପକ୍ଷରୁ ସାଢ଼େ ୩କୋଟି ଟଙ୍କା ବ୍ୟୟ ଅଟକଳରେ ନବୀକରଣ ଚାଲିଛି। କିନ୍ତୁ ମା’ଙ୍କ ନୂତନ ଭବ୍ୟ ଓ ଦିବ୍ୟ ମନ୍ଦିର ନିର୍ମାଣ ସମ୍ପର୍କରେ ସମୀକ୍ଷା ବୈଠକରେ ଆଲୋଚନା ହେଲାନାହିଁ। ପ୍ରାଥମିକ ଆକଳନ ଅନୁସାରେ, ୧୦କୋଟି ବ୍ୟୟରେ ରାଜସ୍ଥାନର ଖଣ୍ଡେଲାଇଟ ଲାଲ୍ ପଥର ଓ ମୟୂରଭଞ୍ଜ ଖିଚିଂ କଳା ମୁଗୁନି ପଥରରେ ନୂତନ ମନ୍ଦିର କେବେ ନିର୍ମାଣ ହେବ ତାହା ସମୀକ୍ଷା ବୈଠକରେ ସ୍ପଷ୍ଟ ଜଣା ପଡ଼ିନାହିଁ ବୋଲି କହିଛନ୍ତି ଉପସ୍ଥିତ ଅଧିକାରୀମାନେ। ସମୀକ୍ଷା ବୈଠକ ପରେ ରାମନଗର ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ପରିସର ମଧ୍ୟରେ ୬୫ ଲକ୍ଷ ଟଙ୍କା ବ୍ୟୟରେ ଏକ ନୂତନ ଆୟୁଷ୍ମାନ୍ ଆରୋଗ୍ୟ ମନ୍ଦିର(ବହିର୍ବିଭାଗ)କୁ ଏମ୍ପି ପଣ୍ଡା ଓ ବିଧାୟକ ନାୟକ ଲୋକାର୍ପିତ କରିଥିଲେ।
ଅପରାହ୍ନରେ ବଉଳକଣି ପଞ୍ଚାୟତରେ ୩୦ଲକ୍ଷ ଟଙ୍କା ବ୍ୟୟରେ ଏକ ନୂତନ ଗୃହ ବିଧାୟକ ନାୟକ ଲୋକାର୍ପଣ କରିଥିଲେ। ଅନ୍ୟମାନଙ୍କ ମଧ୍ୟରେ ତହସିଲ୍ଦାର ତଥା ମନ୍ଦିର ଟ୍ରଷ୍ଟି ରବି ନାରାୟଣ ଶତପଥୀ, ଜିଲା ମୁଖ୍ୟ ଚିକିତ୍ସା ଅଧିକାରୀ ଡ. ମନୋରଞ୍ଜନ ରାଉତ, ପୂର୍ତ୍ତ ବିଭାଗ ଅଧୀକ୍ଷଣ ଯନ୍ତ୍ରୀ ରବୀନ୍ଦ୍ର ନାୟକ, ସହକାରୀ ନିର୍ବାହୀ ଯନ୍ତ୍ରୀ ଦୈତାରି ଟୁଡୁ, କନିଷ୍ଠ ଯନ୍ତ୍ରୀ ଦେବାଶିଷ ସାମଲ, ମହାକାଳପଡ଼ା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧିକାରୀ ନିରଞ୍ଜନ କର, ବ୍ଲକ ଅଧ୍ୟକ୍ଷା ମୀରାରାଣୀ ମହାନ୍ତି, ଯୁବନେତା ପ୍ରଶାନ୍ତ କୁମାର ସେଠୀ, ସରୋଜକାନ୍ତ ସାହୁ , ବାରେଣୀ ଭୂୟାଁ, ମିଲନ ଦେବନାଥ, ବିକ୍ରମାଦିତ୍ୟ ସାହୁ, ତରୁଣକାନ୍ତ କାଞ୍ଜଲାଲ, ରଶ୍ମିରଞ୍ଜନ ସାମଲ, କ୍ରିଷ୍ଣପଦ ମଣ୍ଡଳ, ସାଲବେଗ ମାହାଳିଙ୍କ ସମେତ ବହୁ ସଂଖ୍ୟାରେ ଦଳୀୟ କାର୍ଯ୍ୟକର୍ତ୍ତା ଉପସ୍ଥିତ ଥିଲେ।