ନୂଆଦିଲ୍ଲୀ,୨୪।୧ : ଆଇନ ମନ୍ତ୍ରୀ କିରେନ ରିଜିଜୁ ସୁପ୍ରିମକୋର୍ଟ କଲେଜିୟମ ବିରୋଧରେ କ୍ରମାଗତ ଭାବରେ ବିବୃତ୍ତି ଦେଉଛନ୍ତି। ଏବେ ପୁଣି ଥରେ ଆଇନ ମନ୍ତ୍ରୀ ସୁପ୍ରିମକୋର୍ଟ କଲେଜିୟମକୁ ଟାର୍ଗେଟ କରିଛନ୍ତି। ମଙ୍ଗଳବାର ଏକ କାର୍ଯ୍ୟକ୍ରମରେ ସେ କହିଛନ୍ତି ଯେ ଇଣ୍ଟେଲିଜେନ୍ସ ବ୍ୟୁରୋ ଏବଂ ‘ର’ ର କିଛି ସମ୍ବେଦନଶୀଳ ଗୁପ୍ତ ରିପୋର୍ଟର କିଛି ଅଂଶ ସୁପ୍ରିମକୋର୍ଟ କଲେଜିୟମ ପ୍ରକାଶ କରିବା ଅତ୍ୟନ୍ତ ଚିନ୍ତାର ବିଷୟ। ଗୁପ୍ତଚର ଏଜେନ୍ସିମାନେ ଗୁପ୍ତ ଢଙ୍ଗରେ କାମ କରନ୍ତି ଏବଂ ଯଦି ସେମାନଙ୍କ ରିପୋର୍ଟ ସାର୍ବଜନୀନ ହୁଏ ତେବେ ଏହା ଚିନ୍ତା ଜନକ। ଭବିଷ୍ୟତରେ ଏଭଳି ନ ହେବା ଉଚିତ।
ସୁପ୍ରିମକୋର୍ଟ କଲେଜିୟମ ନିକଟରେ ଆଇବି ଏବଂ ‘ର’ର ରିପୋର୍ଟର କିଛି ଅଂଶ ସାର୍ବଜନୀନ କରିଛନ୍ତିି। ଏହି ରିପୋର୍ଟଗୁଡିକରେ ସୁପ୍ରିମକୋର୍ଟରେ ନିଯୁକ୍ତି ପାଇଁ ପଠାଯାଇଥିବା ନାମଗୁଡ଼ିକ ବିଷୟରେ ସୂଚନା ଦିଆଯାଇଥିଲା। ବାସ୍ତବରେ କେନ୍ଦ୍ର ସରକାର ଗୁପ୍ତଚର ରିପୋର୍ଟ ଦର୍ଶାଇ କଲେଜିୟମ ଦ୍ୱାରା ପଠାଯାଇଥିବା କିଛି ନାମକୁ ପ୍ରତ୍ୟାଖ୍ୟାନ କରିଥିଲେ। ଏହା ସତ୍ତ୍ୱେ କଲେଜିୟମ ପୁନର୍ବାର ଏହି ନାମଗୁଡ଼ିକୁ ସରକାରଙ୍କ ନିକଟକୁ ପଠାଇଥିଲେ। ଏହା ଉପରେ ଆଇନ ମନ୍ତ୍ରୀ କହିଛନ୍ତି ଯେ ଆଇବି ଏବଂ ’ର’ ର ସମ୍ବେଦନଶୀଳ ରିପୋର୍ଟ ପ୍ରକାଶ କରିବା ଅତ୍ୟନ୍ତ ଚିନ୍ତାଜନକ ଏବଂ ମୁଁ ଠିକ ସମୟରେ ଏହା ଉପରେ ପ୍ରତିକ୍ରିୟା ଦେବି।
ସୂଚନାଯୋଗ୍ୟ ଯେ ଆଇବି ଏବଂ ‘ର’ର ବିଚାରପତିଙ୍କ ନିଯୁକ୍ତିକୁ ନେଇ ସୁପ୍ରିମକୋର୍ଟ କଲେଜିୟମ ପ୍ରଥମ ଥର ପାଇଁ ରିପୋର୍ଟ ପ୍ରକାଶ କରିଛନ୍ତି। ଏହା ସହିତ ସୁପ୍ରିମକୋର୍ଟ ମଧ୍ୟ ବିଚାରପତି ନିଯୁକ୍ତି ଉପରେ କେନ୍ଦ୍ର ସରକାରଙ୍କ ଆପତ୍ତି ଉପରେ ବିସ୍ତୃତ ଉତ୍ତର ଦେଇଛନ୍ତି। ପ୍ରଧାନ ବିଚାରପତିଙ୍କ ନେତୃତ୍ୱରେ ସୁପ୍ରିମକୋର୍ଟ କଲେଜିୟମ ଏଥର ସମଗ୍ର ମାମଲାକୁ ସାର୍ବଜନୀନ କରିବାକୁ ନିଷ୍ପତ୍ତି ନେଇଛି। ଏହା ସହିତ ଗୁପ୍ତଚର ବିଭାଗର ରିପୋର୍ଟ ମଧ୍ୟ ସାର୍ବଜନୀନ କରାଯାଇଛି।
