ବୌଦ୍ଧ,୧୮ା୯: ମାତ୍ର ୧୫-୨୦ ଦିନର ଏକ ନିରୀହ ହାତୀଛୁଆ, ଯିଏ ଏବେ ମା’ର ଆଲିଙ୍ଗନରେ ପ୍ରକୃତିରେ ଖେଳୁଥାନ୍ତା, ସେ ପଲ୍ଲୀରୁ ବିଚ୍ଛିନ୍ନ ହୋଇ ବୌଦ୍ଧ ବନ ବିଭାଗର ଆଶ୍ରୟରେ ଚାରି କାନ୍ଥ ମଧ୍ୟରେ ଜୀବନ କାଟୁଛି। ଆଠମଲ୍ଲିକର ପଞ୍ଚଧରା ପାହାଡ଼ରୁ କୁସୁମକୁହୁରୀ ଗାଁକୁ ଆସୁଥିବା ହାତୀପଲ୍ଲୀରୁ ଏହି ଛୁଆଟି ଏକ ନାଳୀରେ ପଡ଼ିଯାଇଥିଲା। ସେପ୍ଟେମ୍ବର ୧୧ ସକାଳେ ଗାଁ ଲୋକେ ତାକୁ ଉଦ୍ଧାର କରି ବନ ବିଭାଗକୁ ଖବର ଦେଇଥିଲେ।
କିନ୍ତୁ ବାରମ୍ବାର ଚେଷ୍ଟା ସତ୍ତ୍ୱେ ମା’ ହାତୀଣୀ ଛୁଆକୁ ଗ୍ରହଣ କରିନଥିଲା। ବିଶେଷଜ୍ଞଙ୍କ ମତରେ, ଛୁଆ ଶରୀରରେ ମଣିଷର ଗନ୍ଧ ଲାଗିଯିବାରୁ ମା’ ତାକୁ ଅସ୍ୱୀକାର କଲା। ଆଠମଲ୍ଲିକ ଏସିଏଫ ସଚିଦାନନ୍ଦ ସେଠୀ କହିଛନ୍ତି, “ହାତୀପଲ୍ଲୀ ସେପ୍ଟେମ୍ବର ୧୨ ଦିନ ମଧ୍ୟାହ୍ନରେ ଆସିଥିଲା, କିନ୍ତୁ ଛୁଆକୁ ନେଇନଥିଲେ। ପରେ ରାତିରେ ମଧ୍ୟ ପଲ୍ଲୀ ଦୂରରେ ରହି ଜଙ୍ଗଲକୁ ଫେରିଗଲେ।”
ପରିବେଶବିତ ପ୍ରବୀଣ କୁମାର ଦାସ କହିଛନ୍ତି, “ମା’ଠାରୁ ବିଚ୍ଛିନ୍ନ ହୋଇ ଛୁଆର ଆଖିରୁ ଲୁହ ଝରୁଥିବା ଦୃଶ୍ୟ ହୃଦୟବିଦାରକ। ଏହାର ଭାବନା ଅକଥନୀୟ ହେଲେ ମଧ୍ୟ ତା’ର ଯନ୍ତ୍ରଣା ଅନୁଭବ ହୁଏ।”
ବନ ବିଭାଗ ଏହି ଛୁଆକୁ ‘ପ୍ରିୟାଂଶୀ’ ନାମ ଦେଇ ଯତ୍ନ ନେଉଛି। ପରିଚର୍ଯ୍ୟାକାରୀଙ୍କ ସହ ପ୍ରିୟାଂଶୀ ବନ୍ଧନ ଗଢ଼ିଛି ଏବଂ ସେମାନେ ଦୃଷ୍ଟିରୁ ଓହରିଲେ ବିଭିନ୍ନ ଶବ୍ଦରେ ଡାକୁଛି। ସ୍ଥାନୀୟ ବାସିନ୍ଦା ରତ୍ନାକର ବେହେରା କହିଛନ୍ତି, “ବନ ବିଭାଗର ଏହି ଯତ୍ନ ପ୍ରଶଂସନୀୟ ଓ ଏକ ସୁନ୍ଦର ବାର୍ତ୍ତା ଦେଉଛି।”
ବନ ଅଧିକାରୀଙ୍କ କହିବାନୁସାରେ, ଉଚ୍ଚ କର୍ତ୍ତୃପକ୍ଷଙ୍କ ନିର୍ଦ୍ଦେଶ ପାଇଲେ ପ୍ରିୟାଂଶୀକୁ ଦୀର୍ଘମିଆଦି ଯତ୍ନ ପାଇଁ କପିଳାସ ଚିଡ଼ିଆଖାନା କିମ୍ବା ନନ୍ଦନକାନନ ଜୁଓଲୋଜିକାଲ ପାର୍କକୁ ସ୍ଥାନାନ୍ତର କରାଯାଇପାରେ।
