ନୂଆଦିଲ୍ଲୀ, ୧୨ା୮: ୭୪ତମ ସ୍ବାଧୀନତା ଦିବସରେ ଲାଲ୍କିଲ୍ଲାରେ ନିଷିଦ୍ଧ ଶିଖ୍ ଫର୍ ଜଷ୍ଟିସ (ଏସ୍ଏଫ୍ଜେ) ଖଲିସ୍ତାନ ପତାକା ଉଡ଼ାଇବା ଲାଗି ଷଡ଼ଯନ୍ତ୍ର କରୁଛି। ଯଦି କେହି ଏଭଳି କାର୍ଯ୍ୟରେ ସଫଳ ହୁଏ, ତେବେ ତାଙ୍କୁ ୧.୨୫ ହଜାର ଡଲାର ପୁରସ୍କାର ପ୍ରଦାନ କରାଯିବ ବୋଲି ଏସ୍ଏଫ୍ଜେ ପକ୍ଷରୁ ଘୋଷଣା କରାଯାଇଛି। ଏଭଳି ଖବର ମିଳିବା ପରେ ସୁରକ୍ଷା ସଂସ୍ଥାଗୁଡ଼ିକ ଅଧିକ ସକ୍ରିୟ ହୋଇପଡ଼ିଛନ୍ତି। ଏଥିଲାଗି ଲାଲ୍କିଲ୍ଲାରେ ହାଇ ଆଲର୍ଟ ଜାରି କରାଯାଇଛି।
ସ୍ବାଧୀନତା ଦିବସ ଲାଗି ଦିଲ୍ଲୀର ପ୍ରତି ଗଳିକନ୍ଦିରେ ୪୫ ହଜାରରୁ ଊର୍ଦ୍ଧ୍ୱ ସୁରକ୍ଷାକର୍ମୀ ମୁତୟନ କରାଯିବ ବୋଲି ଜଣାପଡ଼ିଛି। ଏମାନଙ୍କ ସହ ଲାଲ୍କିଲ୍ଲା ପରିସରରେ ୫ କି.ମି. ପରିସର ମଧ୍ୟରେ ଥିବା ବିଭିନ୍ନ ଗୁରୁତ୍ୱପୂର୍ଣ୍ଣ ସ୍ଥାନ, ଅଟ୍ଟାଳିକାରେ ୨ ହଜାରରୁ ଅଧିକ ସ୍ନିପର ମୁତୟନ ହେବେ। ଏସ୍ଏଫଜେ କେବଳ ଭୟ ସୃଷ୍ଟିକରିବା ଲାଗି ଏଭଳି ପ୍ରୟାସ କରିଛି ବୋଲି ଦିଲ୍ଲୀର ଜଣେ ବରିଷ୍ଠ ପୋଲିସ ଅଧିକାରୀ ପ୍ରକାଶ କରିଛନ୍ତି। ସ୍ବାଧୀନତା ଦିବସରେ ସୁରକ୍ଷାବଳୟ ଭେଦ କରିବା ସହଜ ନୁହେଁ, ଯଦି କୌଣସି ସନ୍ଦିଗ୍ଧଙ୍କୁ ଧରାଯିବ, ତାଙ୍କୁ ହାଜତକୁ ନିଆଯିବ ବୋଲି ସେ କହିଛନ୍ତି।
ଏସ୍ଏଫ୍ଜେର ଆଟର୍ନି ଆଣ୍ଡ ଜେନେରାଲ କାଉନ୍ସେଲ ଗୁର୍ପତ୍ଓ୍ବନ୍ତ ସିଂ ପନ୍ନୁନ୍ ସୋସିଆଲ ନେଟ୍ଓ୍ବର୍କ ସାଇଟ୍ସରେ ଏଭଳି ମେସେଜ୍ ଦେବା ସହ ପୁରସ୍କାର ଘୋଷଣା କରିବା ପରେ ଏନେଇ ବିଶେଷ ସତର୍କତା ଗ୍ରହଣ କରାଯାଇଛି। ଖଲିସ୍ତାନ ସପକ୍ଷବାଦୀମାନେ ଗତ ମାସରେ ବିଚ୍ଛିନ୍ନତାବାଦୀ ଏଜେଣ୍ଡା ସମ୍ପର୍କରେ ଦର୍ଶାଇ ବିଭିନ୍ନ ଦେଶରେ ଥିବା ଭାରତୀୟ ଦୂତାବାସଠାରେ ସ୍ବାଧୀନତା ଦିବସରେ ଭୋଟର ପଞ୍ଜୀକରଣ କ୍ୟାମ୍ପ କରିବା ଲାଗି ଘୋଷଣା କରିଥିଲେ। ଏଥିଲାଗି ବିଭିନ୍ନ ଦେଶରେ ଥିବା ଭାରତୀୟ ଦୂତାବାସଗୁଡ଼ିକୁ ସତର୍କ କରାଯାଇଥିଲା। ପାକିସ୍ତାନରୁ ଏସ୍ଏଫ୍ଜେକୁ ବିପୁଳ ଟଙ୍କା ଓ ନୈତିକ ସମର୍ଥନ ମିଳୁଥିବାବେଳେ ଖଲିସ୍ତାନ ଆନ୍ଦୋଳନକୁ ଏମାନେ ବ୍ୟାପକ କରିବା ଲାଗି ପ୍ରୟାସ ଜାରି ରଖିଛନ୍ତି।
