ନୂଆଦିଲ୍ଲୀ,୮ା୪: ଦେଶରେ କୋଭିଡ୍-୧୯ ସଂକ୍ରମଣ ବଢ଼ିଚାଲିଛି। ଏହାକୁ ଦୃଷ୍ଟିରେ ରଖି କେନ୍ଦ୍ର ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ମନ୍ସୁଖ ମାଣ୍ଡବ୍ୟ ହସ୍ପିଟାଲଗୁଡ଼ିକରେ ଆସନ୍ତା ସପ୍ତାହରେ ମକ୍ଡ୍ରିଲ୍ କରାଇବା ପାଇଁ ରାଜ୍ୟ ସ୍ବାସ୍ଥ୍ୟମନ୍ତ୍ରୀମାନଙ୍କୁ ପରାମର୍ଶ ଦେଇଛନ୍ତି। ଏପ୍ରିଲ ୧୦ ଓ ୧୧ରେ ଏହି ମକ୍ଡ୍ରିଲ କରାଯିବ। ଏଥିସହ ଏପ୍ରିଲ ୮ ଓ ୯ରେ ଜିଲା ପ୍ରଶାସନ ଏବଂ ସ୍ବାସ୍ଥ୍ୟ ଅଧିକାରୀମାନେ ପରିଚାଳନା ତଥା ପ୍ରସ୍ତୁତିର ସମୀକ୍ଷା କରିବେ। ଶୁକ୍ରବାର ଅନୁଷ୍ଠିତ ବୈଠକରେ ଭିଡିଓ କନ୍ଫରେନ୍ସ ଜରିଆରେ ରାଜ୍ୟ ସ୍ବାସ୍ଥ୍ୟମନ୍ତ୍ରୀ, ମୁଖ୍ୟ ସଚିବ ଓ ଅତିରିକ୍ତ ମୁଖ୍ୟ ସଚିବମାନଙ୍କ ସହ ଆଲୋଚନା ପରେ ମାଣ୍ଡବ୍ୟ ଏହି ପରାମର୍ଶ ଦେଇଛନ୍ତି। ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳକୁ ସତର୍କ ରହିବାକୁ କୁହାଯାଇଛି। ସେହିପରି ଇନ୍ଫ୍ଲୁଏଞ୍ଜା-ଲାଇକ୍ ଇଲ୍ନେସ୍ (ଆଇଏଲ୍ଆଇ) ଏବଂ ସିଭିଅର୍ ଆକ୍ୟୁଟ୍ ରେସ୍ପିରେଟୋରି ଇନ୍ଫେକ୍ସନ୍ (ଏସ୍ଏଆର୍ଆଇ)ର ଟ୍ରେଣ୍ଡ୍କୁ ଅନୁଧ୍ୟାନ କରି ଏମର୍ଜେନ୍ସି ହଟ୍ସ୍ପଟ୍ଗୁଡ଼ିକୁ ଚିହ୍ନଟ ସକାଶେ ମାଣ୍ଡବ୍ୟ ଗୁରୁତ୍ୱାରୋପ କରିଛନ୍ତି। କେବଳ ଏତିକି ନୁହେଁ, ଟେଷ୍ଟିଂ, ଟିକାକରଣ, ହସ୍ପିଟାଲ ଭିତ୍ତିଭୂମିର ପ୍ରସ୍ତୁତି ସୁନିଶ୍ଚିତ କରିବା ପାଇଁ ମଧ୍ୟ ମାଣ୍ଡବ୍ୟ ନିର୍ଦ୍ଦେଶ ଦେଇଛନ୍ତି। ଜେନୋମ୍ ସିକ୍ୱେନ୍ସିଂକୁ ତ୍ୱରାନ୍ବିତ କରି ପଜିଟିଭ୍ ସାମ୍ପୁଲଗୁଡ଼ିକୁ କ୍ରମାନ୍ବୟରେ ରଖିବା ଏବଂ କୋଭିଡ୍-ଉପଯୁକ୍ତ ବ୍ୟବହାର ଉପରେ ଜନସଚେତନତା ସୃଷ୍ଟି ପାଇଁ ସ୍ବାସ୍ଥ୍ୟମନ୍ତ୍ରୀ ପରାମର୍ଶ ଦେଇଛନ୍ତି। ମହାମାରୀ ମୁକାବିଲା ପାଇଁ କେନ୍ଦ୍ର ଓ ରାଜ୍ୟଗୁଡ଼ିକ ମଧ୍ୟରେ ସମନ୍ବୟ ରଖିବାକୁ ସେ କହିଛନ୍ତି। ଏହି ଭର୍ଚୁଆଲ ବୈଠକରେ ପଣ୍ଡିଚେରୀ ମୁଖ୍ୟମନ୍ତ୍ରୀ ଏନ୍.ରଙ୍ଗାସ୍ବାମୀଙ୍କ ସମେତ ଉତ୍ତରାଖଣ୍ଡର ଧନ ସିଂ ରାଓ୍ବତ୍, ଆସାମର କେଶବ ମହନ୍ତ, ଗୋଆର ବିଶ୍ୱଜିତ୍ ରାଣେ, ଝାଡ଼ଖଣ୍ଡର ବନ୍ନା ଗୁପ୍ତା, ମଧ୍ୟପ୍ରଦେଶର ପ୍ରଭୁରାମ ଚୌଧୁରୀ, ପଞ୍ଜାବର ବଲବୀର ସିଂ, ମଣିପୁରର ସପନ ରଞ୍ଜନ ସିଂ, ହରିୟାଣାର ଅନିଲ ଭିଜ୍, ତାମିଲନାଡୁର ଥିରୁ ମା ସୁବ୍ରମଣ୍ୟମ୍ ଏବଂ ତେଲଙ୍ଗାନାର ଥାନିରୁ ହରିଶ ରାଓ ପ୍ରମୁଖ ସ୍ବାସ୍ଥ୍ୟମନ୍ତ୍ରୀମାନେ ସାମିଲ ହୋଇଥିଲେ।
ବିଶ୍ୱ ସ୍ବାସ୍ଥ୍ୟ ସଙ୍ଗଠନ (ଡବ୍ଲ୍ୟୁଏଚ୍ଓ) ବର୍ତ୍ତମାନ ଭାରିଆଣ୍ଟ୍ ଅଫ୍ ଇଣ୍ଟ୍ରେଷ୍ଟ (ଭିଓଆଇ), ଏକ୍ସବିବି.୧.୫ ଏବଂ ଅନ୍ୟ ୬ଟି ଭାରିଆଣ୍ଟ (ବିକ୍ୟୁ.୧, ବିଏ.୨.୭୫, ସିଏଚ୍.୧.୧, ଏକ୍ସବିବି, ଏକ୍ସବିଏଫ୍ ଏବଂ ଏକ୍ସବିବି.୧.୧୬) ଉପରେ ଅନୁଧ୍ୟାନ କରୁଥିବା ବିଷୟ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳଗୁଡ଼ିକୁ ଉକ୍ତ ବୈଠକରେ ଅବଗତ କରାଯାଇଛି। ଓମିକ୍ରନ୍ ଏବଂ ଏହାର ସବ୍ଲିନିଏଜ୍ଗୁଡ଼ିକ ସବୁଠୁ ଘାତକ ଭାରିଆଣ୍ଟ। ଏକ୍ସବିବି.୧.୧୬ ଫେବୃୟାରୀରେ ୨୧.୬% ଥିବାବେଳେ ମାର୍ଚ୍ଚରେ ଏହା ୩୫.୮%କୁ ବୃଦ୍ଧି ପାଇଛି। ବୈଠକରେ ଆହୁରି କୁହାଯାଇଛି ଯେ, ୨୩ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ପ୍ରତି ୧ ନିୟୁତ ଜନସଂଖ୍ୟାରେ ହାରାହାରି ଟେଷ୍ଟ ଜାତୀୟ ହାର ତୁଳନାରେ କମ୍ ରହିଥିବା ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ଜାରି ଏକ ବିବୃତିରେ କୁହାଯାଇଛି।
