ନୂଆଦିଲ୍ଲୀ,୧।୩: ଆଇପିଏଲ୍ ୨୦୨୦ରେ ପଞ୍ଜାବ କିଙ୍ଗ୍ସରେ ସାମିଲ ଥିଲେ ଅଷ୍ଟ୍ରେଲିଆ ଅଲ୍ରାଉଣ୍ଡର ଗ୍ଲେନ୍ ମାକ୍ସଓ୍ବେଲ୍। ହେଲେ ଆସନ୍ତା ଆଇପିଏଲ୍ରେ ସେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର(ଆର୍ସିବି) ପକ୍ଷରୁ ଖେଳିବେ। ଆର୍ସିବି ଏହି ଖେଳାଳିଙ୍କୁ ୧୪.୨୫ କୋଟି ଟଙ୍କାରେ କିଣିଥିଲା। ଏବେ ସେ ବିରାଟ କୋହଲିଙ୍କ ନେତୃତ୍ୱରେ ଖେଳିବା ପାଇଁ ଉତ୍ସାହିତ ଥିବା କହିବା ସହ ଅଧିନାୟକଙ୍କ ଭୂରି ପ୍ରଶଂସା କରିଛନ୍ତି।
୩୨ ବର୍ଷୀୟ କ୍ରିକେଟର ମାକ୍ସଓ୍ବେଲ କହିଛନ୍ତି, ଆର୍ସିବି ଚଳିତ ବର୍ଷ ପୂର୍ବାପେକ୍ଷା ଭଲ ପ୍ରଦର୍ଶନ କରିବାକୁ ଯାଉଛି। ବିରାଟ ଏବେ ତିନି ଫର୍ମାଟରେ ଶୀର୍ଷରେ ଅଛନ୍ତି। ଟେଷ୍ଟରୁ ଆରମ୍ଭ କରି ଟି-୨୦ ପର୍ଯ୍ୟନ୍ତ ସବୁଥିରେ ସେ ଜଣେ ମଲ୍ଟି-ଫର୍ମାଟ ପ୍ଲେୟର। ସେ ନିଜ ଖେଳକୁ ନିଜ ହିସାବରେ ଖେଳିଥାନ୍ତି। ଜଣେ ଭଲ ବ୍ୟାଟ୍ସମ୍ୟାନ୍ ସହ ଅଧିନାୟକ ଭାବେ ନିଜର ଦାୟିତ୍ୱ ସେ ବେଶ୍ ଭଲଭାବେ ତୁଲାଇ ଆସୁଛନ୍ତି। ତାଙ୍କ ସହ ଖେଳିବାକୁ ଉତ୍ସାହିତ ଅଛି। ସେ ମ୍ୟାଚ୍, ଅଭ୍ୟାସ ସେଶନ୍ ଏବଂ ଟ୍ରେନିଂ ପାଇଁ ସେ କିଭଳି ନିଜକୁ ପ୍ରସ୍ତୁତ କରନ୍ତି ତାଙ୍କଠାରୁ ଶିଖିବି ବୋଲି ମାକ୍ସଓ୍ବେଲ୍ କହିଛନ୍ତି।
