ସିଡ୍ନୀ,୮।୧- ସ୍ଥାନୀୟ ସିଡ୍ନୀ କ୍ରିକେଟ ଗ୍ରାଉଣ୍ଡରେ ଚାଲିଥିବା ଅଷ୍ଟ୍ରେଲିଆ ବିପକ୍ଷ ତୃତୀୟ ଟେଷ୍ଟର ଦ୍ୱିତୀୟ ଦିନରେ ପୂରା ଛାଇ ରହିଥିଲେ ଭାରତୀୟ ଅଲରାଉଣ୍ଡର ରବୀନ୍ଦ୍ର ଜାଡେଜା। ବୋଲିଂ ହେଉ କି ଫିଲ୍ଡିଂ, ସବୁ ବିଭାଗରେ ତାଙ୍କ ପ୍ରଦର୍ଶନ ଥିଲା ଉଚ୍ଚକୋଟିର। ବୋଲିଂରେ ୪ ଉଇକେଟ ନେଇଥିବା ଜାଡେଜାଙ୍କ ଏକ ଡାଇରେକ୍ଟ ଥ୍ରୋରେ ଷ୍ଟିଭ ସ୍ମିଥ ରନ୍ ଆଉଟ୍ ହୋଇ ପ୍ୟାଭିଲିଅନ ଫେରିଥିଲେ।
ଅଷ୍ଟ୍ରେଲିଆ ଅଲଆଉଟ୍ ହେବା ପରେ ୪ ଉଇକେଟ ସଫଳତା ନା ଡାଇରେକ୍ଟ ଥ୍ରୋ ମଧ୍ୟରୁ କାହାକୁ ବାରମ୍ବାର ଦେଖିବାକୁ ପସନ୍ଦ କରିବେ ବୋଲି ପ୍ରଶ୍ନ କରାଯାଇଥିଲା। ଉତ୍ତରରେ ସିନିୟର ଅଲରାଉଣ୍ଡର ଜାଡେଜା କହିଛନ୍ତି, ଏହା ମୋ କ୍ୟାରିୟରର ଶ୍ରେଷ୍ଠ ଥ୍ରୋ। ମୁଁ ଏହି ରନ୍ ଆଉଟ୍କୁ ବାରମ୍ବାର ଦେଖିବାକୁ ଚାହେଁ। ୩୦ ୟାର୍ଡ ସର୍କଲ ବାହାରୁ ଡାଇରେକ୍ଟ ଥ୍ରୋ କରି ରନ୍ ଆଉଟ୍ କରିବା ଏକ ସନ୍ତୋଷର ବିଷୟ। ୩ରୁ ୪ ଉଇକେଟ ନେବା ମୋ ପାଇଁ ଖୁସିର କଥା। କିନ୍ତୁ ଏହି ରନ୍ ଆଉଟ୍ ମୋର ସାରା ଜୀବନ ମନେ ରହିବ।
ଜାଡେଜାଙ୍କ ରକେଟ୍ ଥ୍ରୋ ଦ୍ୱାରା ସ୍ମିଥଙ୍କୁ ରନ୍ଆଉଟ୍ କରିବାର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଯାଇଛି। ଏହାକୁ କ୍ରିକେଟ ପ୍ରଶଂସକମାନେ ଖୁବ୍ ପ୍ରଶଂସା କରୁଛନ୍ତି।
