ମୋହାଲି,୫।୩: ଭାରତୀୟ ଅଲରାଉଣ୍ଡର ରବୀନ୍ଦ୍ର ଜାଡେଜା ଶ୍ରୀଲଙ୍କା ବିପକ୍ଷ ପ୍ରଥମ ଟେଷ୍ଟରେ ଦମଦାର ବ୍ୟାଟିଂ କରିଛନ୍ତି । ପ୍ରଥମ ଇନିଂସରେ ଅପରାଜିତ ୧୭୫ ରନ୍ର ଇନିଂସ ଖେଳି ଜାଡେଜା ଏକାଧିକ ରେକର୍ଡ ନିଜ ନାମରେ କରିଛନ୍ତି । ସେ କିମ୍ବଦନ୍ତୀ କ୍ରିକେଟର କପିଲ ଦେବଙ୍କ ରେକର୍ଡ ମଧ୍ୟ ଭାଙ୍ଗି ଦେଇଛନ୍ତି ।
ବର୍ତ୍ତମାନ ଜାଡେଜା ଭାରତ ପାଇଁ ୭ମ ଉଇକେଟରେ ସର୍ବାଧିକ ବ୍ୟକ୍ତିଗତ ସ୍କୋର କରିଥିବା ଖେଳାଳି ପାଲଟିଛନ୍ତି। ଜାଡେଜାଙ୍କ ପୂର୍ବରୁ କପିଲ ଦେବଙ୍କ ନାମରେ ଏହି ରେକର୍ଡ ଥିଲା । ସେ ୧୯୮୬ରେ ଶ୍ରୀଲଙ୍କା ବିପକ୍ଷ ଟେଷ୍ଟରେ ୧୬୩ ରନ୍ର ଇନିଂସ ଖେଳିଥିଲେ । ସେବେଠାରୁ କୌଣସି ଭାରତୀୟ ୭ମ ସ୍ଥାନରେ ବ୍ୟାଟିଂ କରି ଏତେ ରନ୍ କରି ପାରି ନଥିଲେ । ହେଲେ ଶନିବାର ଜାଡେଜା ଶ୍ରୀଲଙ୍କା ବିପକ୍ଷରେ ଏହି ରେକର୍ଡକୁ ଭାଙ୍ଗିଛନ୍ତି ।
ସେହିପରି ଜାଡେଜା ପ୍ରଥମ ଖେଳାଳି ଭାବେ ୭ ନଂରେ ବ୍ୟାଟିଂ କରି କୌଣସି ଇନିଂସରେ ୩ ଖେଳାଳିଙ୍କ ସହ ଶତକୀୟ ଭାଗିଦାରୀ କରି ବିଶ୍ୱ ରେକର୍ଡ କରିଛନ୍ତି । ପ୍ରଥମେ ସେ ଋଷଭ ପନ୍ତ(୯୬)ଙ୍କ ସହ ମିଶି ଶତକୀୟ ଭାଗିଦାରୀ କରିଥିଲେ । ଏହାପରେ ରବି ଅଶ୍ୱିନ(୬୧) ଓ ଶେଷରେ ମହମ୍ମଦ ଶାମି(୨୦)ଙ୍କ ସହ ମିଶି ୧୦୦ ରନ୍ର ଭାଗିଦାରୀ କରିଛନ୍ତି । କପିଲ ଦେବ ଓ ଜାଡେଜାଙ୍କ ବ୍ୟତୀତ ୭ମ ସ୍ଥାନରେ ଭାରତ ପାଇଁ ସର୍ବାଧିକ ରନ୍ କରିଥିବା ତାଲିକାର ତୃତୀୟ ସ୍ଥାନରେ ଋଷଭ ପନ୍ତ(୧୫୬) ରନ୍ ରହିଛନ୍ତି ।
କହିରଖୁଛୁ, ଜାଡେଜାଙ୍କ ଅପରାଜିତ ୧୭୫ ରନ୍ ବଳରେ ଭାରତ ପ୍ରଥମ ପାଳିରେ ୮ ଉଇକେଟ ହରାଇ ୫୭୪ ରନ୍ କରିଥିବା ବେଳେ ଅଧିନାୟକ ରୋହିତ ଶର୍ମା ଇନିଂସ ଘୋଷଣା କରିଥିଲେ । ଅନ୍ୟମାନଙ୍କ ମଧ୍ୟରେ ପନ୍ତ ୯୬, ରବି ଅଶ୍ୱିନ ୬୧, ହନୁମା ବିହାରୀ ୫୮, ବିରାଟ କୋହଲି ୪୫, ମୟଙ୍କ ଅଗ୍ରୱାଲ ୩୩, ରୋହିତ ଶର୍ମା ୩୯ ଓ ଶ୍ରେୟସ ଆୟାର ୨୭ ରନ୍ ଇନିଂସ ଖେଳିଛନ୍ତି ।
